នៅព្រឹកថ្ងៃទី៣០ ខែមេសា ឆ្នាំ២០២១ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្រ្តីក្រសួងការពារជាតិ បានប្រគល់អំណោយជាថវិកា និងគ្រឿងឧបភោគបរិភោគមួយចំនួនចែកជូនដល់មន្ទីរពេទ្យយោធភូមិភាគទី៤ និងបងប្អូនកងទ័ពដែលមានជំងឺកំពុងសម្រាកព្យាបាល នៅក្នុងមន្ទីរពេទ្យយោធភូមិភាគទី៤ តាមរយៈឯកឧត្តម ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក និង មេបញ្ជាការយោធភូមិភាគទី៤ ដោយអំណោយទាំងនោះរួមមាន៖ មន្ទីរពេទ្យយោធភូមិភាគទី៤ ទទួលបានថវិការចំនួន ៥លានរៀល ចំណែកអ្នកជំងឺដែលកំពុងសម្រាកព្យាបាលជំងឺ ក្នុងម្នាក់ទទួលបាន៖ ថវិការចំនួន ៥ម៉ឺនរៀល ,មី ៥កញ្ចប់ ,ត្រីខ ៥កំប៉ុង ,ស្ករស ១គីឡូក្រាម និងទឹកដោះគោ១កប៉ុងផងដែរ។
ក្នុងឱកាសនោះ ឯកឧត្តម ឧត្តមសេនីយ៍ឯក ពៅ ហេង ក៏បាននាំយកនូវការផ្ដាំផ្ញើសួរសុខទុក្ខ និងកោតសរសើរដល់ក្រុមគ្រូពេទ្យដែលតែងតែខិតខំជួយព្យាបាលអ្នកជំងឺ ដែលកំពុងសម្រាកព្យាបាលក៏ដូចជាកិច្ចខិតខំប្រឹងប្រែង ទាំងកម្លាំងកាយ កម្លាំងចិត្ត ក្នុងការចាក់វ៉ាក់សាំងជូនដល់កងទ័ព ក៏ដូចជាគ្រួសារកងទ័ព កន្លងទៅនេះតាមផែនការដែលថ្នាក់លើបាន ប្រគល់ជូន។
ឯកឧត្តម បន្ថែមថា ដោយសារនៅក្នុងខេត្តសៀមរាបយើងមានការកើនឡើងនៅការរីករាលដាលនៃជំងឺកូវីដ-១៩ ជាបន្តបន្ទាប់ ដូច្នេះឯកឧត្តម ក៏បានណែនាំដល់បណ្ដាអង្គភាព ជាពិសេសមន្ទីរពេទ្យយោធភូមិភាគទី៤ សូមអោយមានការប្រុងប្រយ័ត្នខ្ពស់បំផុត ក្នុងពេលបំពេញភារកិច្ចក្នុងអង្គភាព ដោយត្រូវតែមានការវាស់កម្ដៅ និងបាញ់អាកុល សម្អាតដៃជាប្រចាំ និងត្រូវគោរពតាមវិធានការរបស់រាជរដ្ឋាភិបាលគឺ ៣ការពារ និង៣កុំ ឲ្យបានខ្ជាប់ខ្ជួនជាប្រចាំផងដែរ៕
ព័ត៌មានជាតិ ថ្មីៗ
អត្ថបទ និងរូបភាព៖ ឈីត សាវី
កែសម្រួល៖ អ៊ុន ណារាជ្យ
