កាលពីរសៀលថ្ងៃទី០២ ខែឧសភា ឆ្នាំ២០២១នេះ ឯកឧត្តម អែល សៀត សមាជិកក្រុមប្រឹក្សាខេត្ត និងជាអនុប្រធានសាសនិកឥស្លាមខេត្ត និងលោកស្រី លឹម ផល្លីកា អភិបាលរង នៃគណៈអភិបាលក្រុងសៀមរាប បានអញ្ជើញជួបសំណេះសំណាល និងនាំយកនូវអំណោយរបស់សប្បុរសជនក្នុងខេត្ត មកចែកជូនដល់បងប្អូនសាសនិកឥស្លាមក្រីក្ររស់នៅក្នុងខេត្តសៀមរាបចំនួន ១១០គ្រួសារ ដោយក្នុង១គ្រួសារទទួលបាន៖ អង្ករចំនួន១០គីឡូក្រាម ទឹកដោះគោខាប់២កំប៉ុង និងស្ករស ១គីឡូក្រាម។
លោកស្រី លឹម ផល្លីកា ក៍បានពាំនាំនូវការសួរសុខទុក្ខរបស់ថ្នាក់ដឹកនាំក្រុង និងព្រមទាំងបានថ្លែងអំណរគុណដល់សប្បុរសជន ដែលបានយកចិត្តទុកដាក់ក្នុងចែករំលែក និងបរិច្ចាគទ្រព្យធនផ្សេងៗ ដល់បងប្អូនខ្មែរសាសនិកឥស្លាមក្រីក្រទាំងអស់នៅក្នុងខេត្ត ហើយបើទោះបីអំណោយទាំងនេះវាមិនអាចឆ្លើយតបបានទៅនឹងតម្រូវការរបស់បងប្អូនបានក៏ពិតមែន តែនេះបង្ហាញនូវការគិតគូរយកចិត្តទុកដាក់របស់ថ្នាក់ដឹកនាំ និងបងប្អូនសប្បុរសជនចំពោះសុខទុក្ខ និងការលំបាករបស់បងប្អូនក្រីក្រ ក្នុងដំណាក់កាលវបត្តិជំងឺកូវី-១៩កំពុងឆ្លងរីករាលដាលជាសាកល។ ជាមួយនោះលោកស្រីអភិបាលរងក្រុង ក៍បានអំពាវនាវដល់សាសនិកឥស្លាមមទាំងអស់ ត្រូវបញ្ចៀសការជួបជុំក្នុងខែបួសរ៉ាម៉ាឌន ដោយត្រូវយកចិត្តទុកដាក់ថែទាំសុខភាព និងសូមបង្កើនការប្រុងប្រយ័ត្នខ្ពស់ដោយត្រូវចូលរួមអនុវត្តវិធានការការពាររបស់រាជរដ្ឋាភិបាល និងក្រសួងសុខាភិបាលគឺ ៣ការពារ ៣កុំ និងត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាពឲ្យបានជាប្រចាំផងដែរ។
ក្នុងឱកាសនោះដែរ ឯកឧត្តម អែល សៀត មានប្រសាសន៍ថា ក្នុងនាមថ្នាក់ដឹកនាំសាសនិកឥស្លាមក្នុងខេត្ត តែងតែយកចិត្តទុកដាក់ គិតគូរពីសុខទុក្ខក្នុងការរស់នៅរបស់បងប្អូននៅតាមសហគមន៍ខ្មែរឥស្លាមជានិច្ច ហើយនៅក្នុងកាលៈទេសៈដ៏លំបាកនេះ ក្រោមការគិតគូរយ៉ាងយកចិត្តទុក្ខដាក់ពីប្រមុខរាជរដ្ឋាភិបាល ក៍ដូចជាថ្នាក់ដឹកនាំខេត្តសៀមរាប ក្នុងការបញ្ចប់ព្រឹត្តិការណ៍២០កុម្ភៈនេះបាន គឺត្រូវទាមទាឲ្យមានការចូលរួមពីសំណាក់បងប្អូនទាំងអស់គ្នា ដើម្បីឲ្យស្ថានភាពបិទខ្ទប់នេះវិលមករកស្ថានភាពធម្មតាវិញផងដែរ៕
អត្ថបទ និង រូបភាព៖ទ្រា ពន្លឺ
កែសម្រួល៖ អ៊ុន ណារាជ្យ
