ព្រឹកថ្ងៃទី០៣ ខែឧសភា ឆ្នាំ២០២១ លោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានទទួលអំណោយពីក្រុមហ៊ុន អង្គរ អ៊ីកូ រ៉េស៊ីដិន ដើម្បីចូលរួមចំណែកជាមួយរាជរដ្ឋាភិបាល និងអាជ្ញាធរខេត្ត ក្នុងការប្រយុទ្ធប្រឆាំងនឹងជំងឺកូវីដ-១៩ នៅក្នុងខេត្តសៀមរាប តាមរយៈលោក សុខ តុញ និងក្រុមការងារ ដោយំណោយរួមមាន៖ អង្ករ ១តោន មីម៉ាម៉ា ៥០កេស ទឹកសុទ្ធ ៣០កេស ត្រីខ ១០កេស ម៉ាស ១០០ប្រអប់ អាល់កុល ៣បាដុង ទឹកស៊ីអ៊ីវ ៣០យួ ទឹកត្រី ៣០យួ និងថវិកា ១លានរៀល ។
លោក សុខតុញ ប្រធានក្រុមប្រឹក្សាភិបាលគម្រោង អង្គរ អ៊ីកូ រ៉េស៊ីដេន បានមានប្រសាសន៍ថា លោក និងក្រុមការពិតជារីករាយណាស់ ដែលមានឱកាសបានចូលរួមជួយឧបត្ថមជាគ្រឿងឧបភោគបរិភោគដល់ថ្នាក់ដឹកនាំ ខេត្តសៀមរាប និងរដ្ឋបាលសាលាក្រុងសៀមរាប ដែរវាជាចូលរួមចំណែកជាមួយរដ្ឋាភិបាល ក្នុងការយុទ្ធនាការប្រយុទ្ធប្រឆាំងនឹងជំងឺកូវីដ-១៩ ហើយអំណោយសប្បុរសនេះ គឺបានឆ្លុះបញ្ចាំងឱ្យឃើញ អំពីការរួមសាមគ្គីគ្នា និងការយកចិត្តទុកដាក់ក្នុងចូលរួមជាមួយរាជរដ្ឋាភិបាលកម្ពុជា ដើម្បីជួយដល់ប្រជាពលរដ្ឋក្នុងកាលៈទេសៈដ៏លំបាកនេះ។ លោកក៍សូមធ្វើការកោតសសើរដល់ថ្នាក់ដឹកនាំរដ្ឋបាលខេត្ត រដ្ឋបាលក្រុងសៀមរាប កងកម្លាំងទាំងបីប្រភេទ ព្រមទាំងក្រុមក្រុមគ្រូពេទ្យទាំងអស់ ដែលបានខិតខំបំពេញភារកិច្ចយ៉ាងសស្រាក់សស្រាំទាំងថ្ងៃ ទាំងយប់ក្នុងការអនុវត្តតាមបទបញ្ជារបស់រដ្ឋាភិបាល គឺក្នុងគោលបំណងកាត់ផ្តាច់ការចម្លងដែលកើតចេញពីព្រឹត្តិការណ៍២០កុម្ភៈ។
ក្នុងឱកាសនោះដែរ លោក ពិន ប្រាកដ បានបញ្ជាក់ថា ក្នុងករណីដែលកម្ពុជាយើង បានកំពុងជួបនូវវិបត្តិជំងឺកូវីដ-១៩នេះ អាជ្ញាធរខេត្តបានផ្តល់នូវសម្ភារៈ ឧបករណ៍ ប្រើប្រាស់ជូនទៅតាមបណ្តាក្រុង ស្រុក រួមទាំងគ្រឿងឧបភោគបរិភោគ ក្នុងការផ្គត់ផ្គង់ដល់បងប្អូនដែលបានវិលត្រឡប់មកពីក្រៅប្រទេស និងរាជធានី ខេត្ត ដែលជួបនូវហានីភ័យខ្ពស់នៃជំងឺកូវីដ-១៩ ដែលកំពុងធ្វើចត្តាឡីស័កនៅតាមមណ្ឌលក្រុង ស្រុក។ ដូច្នេះយើងគ្រប់គ្នាត្រូវគោរពប្រតិបត្តិឲ្យខាងតែបាន នូវវិធានការ ៣កុំ ៣ការពារ របស់ប្រមុខរាជរដ្ឋាភិបាល និង សេចក្តីណែនាំវិធានការរបស់ក្រសួងសុខាភិបាល ។ បច្ចុប្បន្នរដ្ឋបាលខេត្តសៀមរាប បាននឹងកំពុងយកចិត្តទុកដាក់អនុវត្តវិធានការបង្ការទប់ស្កាត់ការឆ្លងរីករាលដាលជម្ងឺកូវីដ ១៩ ចូលដល់សហគមន៍ តាមបទបញ្ជារបស់ប្រមុខរាជរដ្ឋាភិបាល និងវិធានការណែនាំរបស់ក្រសួងសុខាភិបាល ក៏ដូចជាក្រសួងមហាផ្ទៃបានយ៉ាងល្អប្រសើរ។
ក្នុងនាមរដ្ឋបាលខេត្ត លោក ពិន ប្រាកដ ក៏បានថ្លែងអំណរគុណចំពោះ ក្រុមហ៊ុន អង្គរ អ៊ីកូ រ៉េស៊ីដិន ដែលបានផ្តល់ជូននូវអំណោយសម្រាប់បម្រើការក្នុងយុទ្ធនាការប្រយុទ្ធប្រឆាំងបង្កា ទប់ស្កាត់ជំងឺកូវីដ-១៩ ដល់រដ្ឋបាលខេត្តសៀមរាប ។ ចំពោះអំណោយទាំងអស់នេះអាជ្ញាធរខេត្ត ក៏នឹងផ្តល់នូវជូនទៅតាមបណ្តាក្រុង/ស្រុក ក្នុងការផ្គត់ផ្គង់ដល់បងប្អូនដែលបានវិលមកពីក្រៅប្រទេស និងរាជធានីខេត្ត ដែលជួបនូវហានីភ័យខ្ពស់នៃជំងឺកូវីដ-១៩ ដែលកំពុងធ្វើចត្តាឡីស័កនៅតាមមណ្ឌលក្រុង/ស្រុក ជាពិសេសតំបន់បិទខ្ទប់ក្នុងភូមិសាស្ត្រសង្កាត់ទាំង៣ ក្នុងក្រុងសៀមរាប។ ជាមួយគ្នានោះលោកក៏បានអំពាវនាវឲ្យបងប្អូនប្រជាពលរដ្ឋ បន្តអនុវត្តឲ្យបានខ្ជាប់ខ្ជួន និងកុំមើលស្រាលលើជំងឺដ៏កាចសាហាវនេះ និងសូមបងប្អូនត្រូវចូលរួមអនុវត្តវិធានការណ៍របស់ រាជរដ្ឋាភិបាល ៣កុំ ៣ការពារ និង២ចូលរួម ឲ្យមានប្រសិទ្ធភាពខ្ពស់បំផុត និងបន្តប្រកាន់នូវវិធានសុខាភិបាលឲ្យបានខ្ជាប់ខ្ជួន។
នៅដដែលនោះដែរ ក្រុមហ៊ុន អង្គរ អ៊ីកូ រ៉េស៊ីដិន ក៏បាននាំយកអំណោយប្រគល់ជូនដល់រដ្ឋបាលក្រុងសៀមរាប ដោយក្នុងនោះរួមមាន៖ អង្ករនូវចំនួន១តោន មីម៉ាម៉ាចំនួន៥០កេស ទឹកសុទ្ធ៣០កេស ត្រីខចំនួន១០កេស ម៉ាសចំនួន១០០ប្រអប់ អាល់កុល៣បាដុង ទឹកស៊ីអ៊ីវ៣០យួរ ទឹកត្រី៣០យួរ និងថវិកាចំនួន ១លានរៀល ជូនដល់រដ្ឋបាលខេត្តសៀមរាប ហើយព្រមទាំងបានប្រគល់ជូនដល់រដ្ឋបាលសាលាក្រុងសៀមរាប នូវ អង្ករចំនួន១តោន មីម៉ាម៉ាចំនួន៣០កេស ទឹកសុទ្ធ២០កេស ត្រីខចំនួន៦កេស ម៉ាសចំនួន៥០ប្រអប់ អាល់កុល២បាដុង ទឹកស៊ីអ៊ីវ២០យួរ ទឹកត្រី២០យួរ និងថវិកាចំនួន១លានរៀលផងដែរ៕
អត្ថបទ និងរូបភាព៖ ខេង ឧត្តម ទ្រា ពន្លឺ
កែសម្រួល៖ អ៊ុន ណារាជ្យ
