ដើមី្បជាការចូលរួមទ្រទ្រង់សកម្មភាពក្នុងយុទ្ធនាការប្រយុទ្ធប្រឆាំងបង្កាទប់ស្កាត់ជំងឺកូវីដ-១៩ ក្នុងខេត្ត រដ្ឋបាលខេត្តសៀមរាប នៅព្រឹកថ្ងៃទី០៤ ខែឧសភា ឆ្នាំ២០២១នេះ បានទទួលអំណោយជាសម្ភារៈ និងគ្រឿងឧបភោគបរិភោគពីសបុបរសជននានា ក្នុងនោះ អង្គការ UNESCO ប្រចាំនៅកម្ពុជា មាន៖ អង្ករ ៣០០គក្រ ម៉ាស់១៥០ប្រអប់ អាល់កុល១២០លីត្រ មី ៣០កេសតូច ទឹកសុទ្ធ៣០កេស ,ហាងប្តូរប្រាក់ ហ៊ុយ គាំង មាន៖ អង្ករ១តោន ត្រីខ១០កេស មី៥០កេសតូច ទឹកសុទ្ធ២៥កេស និងវ៉េនតារបាំមុខ៥០ និងក្រុមហ៊ុនបញ្ចាំ វីតា ឃែស មាន៖ អង្ករ៥០០គក្រ មី ៥០កេសតូច ត្រីខ១០កេស ទឹកសុទ្ធ២០កេស ម៉ាស់១កេស និងអាល់កុល១កានផងដែរ។
មានប្រសាសន៍នោះដែរ លោក ពិន ប្រាកដ អភិបាលរងខេត្តសៀមរាប ក៏បានធ្វើការថ្លែងអំណរគុណដល់ទឹកចិត្តដ៏សប្បុរសធម៌ របស់អង្គការ យូនីស្កូ (UNESCO) និង ហាងប្តូរប្រាក់ ហ៊ុយ គាំង និងក្រុមហ៊ុនបញ្ចាំ វីតា ឃែស ដែលបានផ្តល់ជូននូវសម្ភារៈបម្រើការក្នុងការប្រយុទ្ធប្រឆាំងបង្កាទប់ស្កាត់ជំងឺកូវីដ-១៩ ដល់រដ្ឋបាលខេត្តសៀមរាប ។ ស្ថិតក្នុងខណៈដែរកម្ពុជាយើងបានកំពុងជួបនូវវិបត្តិជំងឺកូវីដ-១៩ ស្របពេលដែលអាជ្ញាធរខេត្តបានផ្តល់នូវសម្ភារៈ និងឧបករណ៍ប្រើប្រាស់ទាំងនេះជូនទៅតាមបណ្តាក្រុង/ស្រុក រួមទាំងគ្រឿងឧបភោគបរិភោគ ក្នុងការផ្គត់ផ្គង់ដល់បងប្អូនដែលបានវិលមកពីក្រៅប្រទេស និងរាជធានីខេត្ត ដែលជួបនូវហានីភ័យខ្ពស់នៃជំងឺកូវីដ-១៩ ដែលកំពុងធ្វើចត្តាឡីស័កនៅតាមមណ្ឌលក្រុង/ស្រុក ជាពិសេសតំបន់បិទខ្ទប់ក្នុងភូមិសាស្ត្រខេត្តសៀមរាបផងដែរ។
លោក ពិន ប្រាកដ បានបញ្ជាក់ថា ករណីអ្នកជំងឺកូវីដម្នាក់ស្លាប់នោះ ដោយបុគ្គលរូបនោះមានជំងឺរាំរ៉ៃ ដោយជំងឺខូចក្រលៀនមកពីខេត្តកំពង់ធំ ទោះជាខេត្តសៀមរាប មានមោទនភាពក្នុងការគ្រប់គ្រងស្ថានភាពកូវីដ-១៩ នៅក្នុងដៃយ៉ាងណាក៏ដោយ ក៏ប៉ុន្តែវាក៏កំពុងស្ថិតក្នុងការហ៊ុមព័ទ្ធដោយហានីភ័យយ៉ាងធ្ងន់ធ្ងរជាមួយនឹងការព្រួយបារម្ភ។ ក្រោមការគិតគូរទុកជាមុនថា បង្កើនសមត្ថភាពកាត់ផ្តាច់ខ្សែចម្លង វាប្រសើរជាងការប្រមូលកម្លាំងទៅទប់ទល់ ក្នុងពេល និង ក្រោយពេល មានការ ផ្ទុះជម្ងឺកូវីដ-១៩ ក្នុងសហគមន៍ ។ ក្នុងព្រឹត្តិការណ៍សហគមន៍២០កុម្ភៈ ខេត្តសៀមរាប បានរកឃើញអ្នកមានជំងឺកូវីដ-១៩ សរុបចំនួន៤៦នាក់ ព្យាបាលបានជាសះស្បើយចំនួន ១៥នាក់ ស្លាប់ ១នាក់ និងកំពុងសម្រាកព្យាបាលនៅក្នុងមន្ទីរពេទ្យបង្អែកខេត្តចំនួន ៣០នាក់ ។
ព័ត៌មានជាតិ ថ្មីៗ
ក្នុងឱកាសនោះដែរ លោកអភិបាលរងខេត្ត ក៏បានអំពាវនាវដល់បងប្អូនប្រជាពលរដ្ឋទាំងអស់ ជាពិសេសបងប្អូនជាម្ចាស់សណ្ឋាគារ ផ្ទះសំណាក់ ភោជនីយដ្ឋាន រមណីដ្ឋាននានា ត្រូវរៀបចំធ្វើការសម្អាតសម្លាប់មេរោគនៅតាមទីតាំងរបស់ខ្លួនឲ្យបានល្អ ក្នុងការទទួលស្វាគមន៍ភ្ញៀវទេសចរណ៍ឡើងវិញ នៅក្នុងបរិបទកូវីដ-១៩ ជាមួយនឹងការរស់នៅតាមបែបគន្លងថ្មី (The New Normal) និង សូមបងប្អូនត្រូវចូលរួមអនុវត្តវិធានការណ៍របស់ រាជរដ្ឋាភិបាល ៣កុំ ៣ការពារ និង២ចូលរួម ឲ្យមានប្រសិទ្ធភាពខ្ពស់បំផុត និងបន្តប្រកាន់នូវវិធានសុខាភិបាល ឲ្យបានខ្ជាប់ខ្ជួនទៀតផង៕
