រដ្ឋបាលរខេត្តសៀមរាប នៅថ្ងៃទី០៤ ខែឧសភា ឆ្នាំ២០២១ បានប្រកាសពីការរកឃើញអ្នកវិជ្ជមានជំងឺកូវីដ-១៩ ថ្មី ចំនួន៤នាក់ បន្ថែម នៃព្រឹត្តិការណ៍ការសហគមន៍ ២០កុម្ភៈ ដែរ២ករណីជាការនាំចូលពីខេត្តដទៃ និង២ករណីជាការឆ្លងក្នុងខេត្ត ដែរអ្នកវិជ្ជមានជំងឺកូវីដ-១៩ ទាំង៤នាក់ កំពុងទទួលការពាបាលនៅមន្ទីរពេទ្យបង្អែកខេត្តសៀមរាប។
តាមសេចក្ដីប្រកាសព័ត៌មានរបស់រដ្ឋបាលខេត្តបានបញ្ជាក់ថា ចំពោះករណីឆ្លងក្នុងខេត្ត២ករណី មានឈ្មោះ លីស ជី ភេទស្រី អាយុ៣១ឆ្នាំ អាសយដ្ឋាននៅភូមិគោកត្នោត សង្កាត់គោកចក ជាអ្នកបម្រើការងារនៅមន្ទីរសម្រាកព្យាបាល គង់ រិទ្ធី II និងឈ្មោះ ហឿល សុភាព ភេទប្រុស អាយុ៤០ឆ្នាំ អាសយដ្ឋាននៅភូមិស្វាយដង្គំ សង្កាត់ស្វាយដង្គំ ជាអ្នកដែលគាត់បានជូនប្រពន្ធទៅទទួលសេវាពិនិត្យ និងព្យាបាលជំងឺនៅមន្ទីរសម្រាកព្យាបាល គង់ រិទ្ធី II កាលពីព្រឹកថ្ងៃទី០១ ខែឧសភា ឆ្នាំ២០២១ ។ ចំពោះករណីមកពីខេត្តដទៃ មានឈ្មោះ ក្រៀល ហឿត ភេទប្រុស អាយុ ៣៩ឆ្នាំ បានធ្វើដំណើរមកពីភូមិសន្សំកុសល១ សង្កាត់បឹងទំពុន១ ខណ្ឌមានជ័យ រាជធានីភ្នំពេញ មកដល់ខេត្តសៀមរាបនៅវេលាម៉ោង១៨:៥៨នាទី នៅព្រំប្រទល់ខេត្តសៀមរាប-ខេត្តកំពង់ធំ (ស្រុកជីក្រែង-ស្រុកស្ទោង) និងឈ្មោះ ពៅ សុគន្ធ ភេទប្រុស អាយុ២ឆ្នាំ អាសយដ្ឋាននៅភូមិរុនតាឯក ឃុំរុនតាឯក ស្រុកបន្ទាយស្រី មកពីខេត្តកោះកុងជាមួយឪពុក និងម្តាយ មកដល់ខេត្តសៀមរាប កាលពីថ្ងៃទី៣០ ខែមេសា ឆ្នាំ២០២១ តាមរយៈរថយន្តក្រុងក្រុមហ៊ុនអូឡាំពិច។ អ្នកបើកបរ និងអ្នកដំណើរក្នុងរថយន្តក្រុងនោះ ត្រូវបានបញ្ជូលទៅមណ្ឌលចត្តាឡីស័កគរុកោសល្យ ដើម្បីយកសំណាក និងធ្វើចត្តាឡីស័កពេលមកដល់ខេត្តសៀមរាប លើកលែងអ្នកដំណើរ ៤នាក់បានបន្តដំណើរទៅខេត្តព្រះវិហារ។
ចំពោះការកើនឡើងនៃការឆ្លងជំងឺកូវីដ-១៩ ថ្មី ចំនួន៤នាក់បន្ថែមចូលសហគមន៍នេះ រដ្ឋបាលខេត្ដ ក៏សូមណែនាំឱ្យបងប្អូនប្រជាពលរដ្ឋ រស់នៅក្នុងខេត្តសៀមរាប សូមបង្កើនការប្រុងប្រយ័ត្នខ្ពស់ចូលរួមអនុវត្តវិធានការការពារ ៣ការពារ ៣កុំ និងត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ជាពិសេសត្រូវអនុវត្តវិធានការរដ្ឋបាល និងវិធានការចត្តាឡីស័ក។ ក្នុងនោះដែរបុគ្គលទាំងឡាយណាល្មើសនឹងវិធានការនេះ នឹងប្រឈមទទួលការផ្តន្ទាទោសពិន័យអន្តរការណ៍ ឬដាក់ពន្ធនាគារ ដោយអនុលោមតាមខ្លឹមសារច្បាប់ និងលិខិតបទដ្ឋានគតិយុត្តជាធរមាន។
សូមជម្រាបថា គិតត្រឹមថ្ងៃទី០៤ ខែឧសភា ឆ្នាំ២០២១ ខេត្តសៀមរាប មានអ្នកវិជ្ជមានជំងឺកូវីដ-១៩ សរុបចំនួន៥១នាក់ បានព្យាបាលជាសះស្បើយចំនួន១៦នាក់ ស្លាប់១នាក់ដោយអ្នកជំងខូចតម្រងធ្ងន់ធ្ងរ និង៣៤នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប៕
អត្ថបទ៖ ងឹន គីមឡេង
កែសម្រួល៖ អ៊ុន ណារាជ្យ
