កាលពីថ្ងៃទី៥ ខែឧសភា ឆ្នាំ២០២១ រដ្ឋបាលខេត្តសៀមរាប បានចេញសេចក្ដីណែនាំបន្ថែមថ្មីមួយទៀត ដល់ក្រុមការងារចម្រុះនៅតាមច្រកត្រួតពិនិត្យសុខភាពបឋម និងស្រង់ស្ថិតិអ្នកដំណើរទាំងពីររបស់ខេត្ត ត្រូវបន្តរឹតបន្តឹង និងណែនាំដល់ អ្នកដំណើរ ជាមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទាំងអស់ ដែលធ្វើដំណើរចូលមកក្នុងខេត្តសៀមរាប ចាំបាច់ត្រូវផ្ដល់សំណាក និងធ្វើចត្តាឡីស័ក ដែលសម្រេចដោយមន្ត្រីសុខាភិបាលខេត្ត។
សេចក្ដីណែនាំស្ដីពី ការអនុវត្តវិធានការចាំបាច់នានាក្នុងការបង្ការ និងទប់ស្កាត់ការឆ្លងរាលដាលនៃជំងឺកូវីដ-១៩ នៅក្នុងភូមិសាស្ត្រខេត្តសៀមរាប របស់រដ្ឋបាលខេត្តនេះ ធ្វើឡើងបន្ទាប់ពីរាជរដ្ឋាភិបាល បានសម្រេចបិទបញ្ចប់ការបិទខ្ទប់ភូមិសាស្ត្ររាជធានីភ្នំពញ និងក្រុងតាខ្មៅនៃខេត្តកណ្តាល ចាប់ពីថ្ងៃទី៦ ខែឧសភា ឆ្នាំ២០២១នេះតទៅ។
តាមការឱ្យដឹងតាមទូរស័ព្ទ លោក សុខ ណារ៉េត អភិបាលរងស្រុកក្រឡាញ់ ប្រចាំការនៅច្រកត្រួតពិនិត្យសុខភាពបឋម នៅព្រំប្រទល់សៀមរាប-បន្ទាយមានជ័យ បង្ហាញថា៖ យោងតាមការណែនាំរបស់រដ្ឋបាលខេត្ត និងយកចិត្តទុកដាក់ខ្ពស់ពីឯកឧត្តម ទៀ សីហា អភិបាលខេត្តសៀមរាប ក្នុងការទប់ស្កាត់ការរាលដាលជំងឺកូវីដ-១៩ នៅទូទាំងខេត្ត ក្រុមការងារចម្រុះប្រចាំការនៅច្រកត្រួតពិនិត្យសុខភាពបឋមនៅព្រំប្រទល់ សៀមរាប-កំពង់ធំ និងសៀមរាប-បន្ទាយមានជ័យ បានសហការគ្នាយ៉ាងរលូន ក្នុងការកំណត់អត្តសញ្ញាណអ្នកដំណើរមកពីតំបន់មានហានិភ័យខ្ពស់ នៃការចម្លងមេរោគកូវីដ-១៩ ដូចជា រូបថត អត្តសញ្ញាណបណ្ណ លេខស្លាកយានយន្ត លេខទំនាក់ទំនង អាស័យដ្ឋានស្នាក់នៅ និងអាស័យដ្ឋានគោលដៅដែលត្រូវទៅ ជាដើម។
លោកអភិបាលរងស្រុក បន្ថែមថា៖ ការប្រើប្រាស់ប្រព័ន្ធ Web App សម្រាប់គ្រប់គ្រង់ព័ត៌មានអ្នកដំណើរ ដែលរៀបចំដោយរដ្ឋបាលខេត្តនេះ បានផ្ដល់ភាពងាយស្រួល ដល់ក្រុមការងារប្រចាំច្រក និងកងកម្លាំងសមត្ថកិច្ច ធ្វើការស្វែងរកអ្នកដំណើរ ដែលសង្ស័យថាមានពាក់ព័ន្ធនឹងជំងឺកូវីដ-១៩ ឬមិនគោរពតាមសេចក្ដីណែនាំរបស់រដ្ឋបាលខេត្ត។ ចំពោះអ្នកដំណើរ ដែលល្មើសនឹងសេចក្ដីណែនាំនេះ ពួកគេនឹងអាចត្រូវទទួលពិន័យអន្តរការណ៍ និងអនុវត្តន៍តាមច្បាប់ លិខិតបទដ្ឋានគតិយុត្ត។
រូបភាព៖ មន្ត្រីព័ត៌មាន
អត្ថបទដោយ៖ លោក សេង ផល្លី
