មានប្រសាសន៍នៅក្នុងកិច្ចប្រជុំសាមញ្ញលើកទី២៤ របស់ក្រុមប្រឹក្សាខេត្តសៀមរាប អណត្តិទី៣ នាព្រឹកថ្ងៃទី០៦ ខែឧសភា ឆ្នាំ២០២១នេះ ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានជំរុញបន្ថែម ត្រូវអនុវត្តសេចក្តីណែនាំលេខ០៣ សណន ចុះថ្ងៃទី០៤ ខែឧសភា ឆ្នាំ២០២១ របស់រាជរដ្ឋាភិបាលឲ្យមានប្រសិទ្ធភាពខ្ពស់ ស្តីពីការពង្រឹង អនុវត្តវិធានការចាំបាច់នានាមួយចំនួន ដើម្បីទប់ស្កាត់ ការឆ្លងរាលដាលនៃជម្ងឺកូវីដ-១៩ បន្ទាប់ពីរាជរដ្ឋាភិបាល បានសម្រេចបញ្ចប់ ការបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅ ខេត្តកណ្តាល ។
ឯកឧត្តម អ៊ាន ឃុន មានប្រសាសន៍បន្ថែមថា បញ្ហាកូវីដ-១៩ គឺជាកម្មវត្ថុដ៏ក្តៅគគុក ដែលកំពុងកើតឡើងក្នុងព្រឹត្តិការណ៍សហគមន៍២០កុម្ភៈ ខណៈកន្លងមកនេះ ខេត្តសៀមរាបយើង អ្នកវិជ្ជមានជំងឺកូវីដ-១៩ ចំនួនជាង៦០នាក់ ដែលជាតឋួលេខខ្ពស់សម្រាប់ខេត្តយើង និង មានការបិទផ្អាកបណ្តោះអាសន្ន អាជីកម្មដ្ឋាន មន្ទីរពេទ្យឯកជន ផ្ទះសំណាក់ ផ្សារ និងបិទខ្ទប់ភូមិ-សង្កាត់មួយចំនួនផងដែរ ដើម្បីកាត់បន្ថយហានីភ័យ និងកាត់ផ្តាច់ខ្សែចម្លងជំងឺកូវីដ-១៩នេះ ។
មានប្រសាសន៍នៅក្នុងឱកាសនោះដែរ ឯកឧត្តម ទៀ សីហា អភិបាលខេត្តសៀមរាប បានបញ្ជាក់ថា ដោយអនុវត្តតាមសេចក្តីណែនាំលេខ០៣ សណន របស់រាជរដ្ឋភិបាល ចុះថ្ងៃទី០៤ ខែឧសភាកន្លងមកថ្មីៗនេះ រដ្ឋបាលខេត្តសៀមរាបបានចេញសេចក្តីណែនាំមួយ ចុះថ្ងៃទី០៥ ខែឧសភា ឆ្នាំ២០២១ ស្តីពីការអនុវត្តវិធានការចាំបាច់នានា បង្ការនិងទប់ស្កាត់ ការឆ្លងរាលដាលនៃជម្ងឺកូវិដ-១៩ នៅក្នុងភូមិសាស្រ្តខេត្តសៀមរាប ដែលមាន៤ចំណុចធំៗ ក្នុងនោះបានប្រាប់ឲ្យដឹងថា អ្នកដំណើរគ្រប់មជ្ឈដ្ឋាន រួមទាំងភ្ញៀវទេសចរជាតិ និងអន្តរជាតិ ដែលមានបំណងចូលក្នុងខេត្តសៀមរាប គឺត្រូវទៅមណ្ឌលចត្តាឡីស័ក ( សាលាគរុកោសល្យ និងវិក្រឹត្យការខេត្ត ) ឲ្យគ្រូពេទ្យ យកសំណាកធ្វើវិភាគរកមេរោគកូវីដ-១៩ និង ការធ្វើចត្តាឡីស័ក១៤ថ្ងៃ នៅតាមផ្ទះ ឬតាមទីកន្លែងស្នាក់នៅរបស់អ្នកដំណើរ នឹងមានការពិនិត្យសម្រេចដោយមន្រ្តីសុខាភិបាល ហើយចំពោះការធ្វើចត្តាឡីស័កនៅមណ្ឌល ត្រូវបានកំណត់ដោយរដ្ឋបាលខេត្ត ។
ឯកឧត្តមអភិបាលខេត្តសៀមរាប មានប្រសាសន៍ទៀតថា៖ កន្លងមកនេះ បើទោះជាការគ្រប់គ្រងទិន្នន័យអ្នកដំណើរ និងការស្រាវជ្រាវរកអ្នកពាក់ព័ន្ធក្នុងករណីឆ្លងជំងឺកូវីដ-១៩ ត្រូវបានរកឃើញឲ្យធ្វើចត្តាឡីស័ក និងយកវត្ថុសំណាកទៅវិភាគ រួមទាំងបានបញ្ជូនអ្នកវិជ្ជមានវីរ៉ុស ទៅព្យាបាលនៅមន្ទីពេទ្យបង្អែកខេត្តជាបន្តបន្ទាប់ ក៏ប៉ុន្តែវានៅតែជាក្តីព្រួយបារម្ភ ដោយសារតែនៅក្នុងចំណោមប្រជាពលរដ្ឋភាគច្រើន ដែលបានយល់ដឹងអំពីកូវីដ-១៩ នៅមានប្រជាពលរដ្ឋអ្នកដំណើរមួយចំនួនតូច មិនបានបង្ហាញអំពីភាពស្មោះត្រង់ មិនព្រមយល់ និងមិនបានចូលរួមសហការទប់ស្កាត់កូវីដ-១៩នោះឡើយ ហើយថែមទាំងបណ្តាលឲ្យសកម្មភាពរបស់ខ្លួន បានក្លាយជាសកម្មភាពនៃភ្នាក់ងារចម្លងជំងឺផងដែរ ។
ជាមួយគ្នានេះដែរ ឯកឧត្តម ទៀ សីហា បានធ្វើការអំពាវនាវដល់បងប្អូនប្រជាពលរដ្ឋរស់នៅក្នុងខេត្តសៀមរាប សូមចូលរួម នឹងបង្កើនការប្រុងប្រយ័ត្នខ្ពស់ ក្នុងការអនុវត្តវិធានការរបស់រាជរដ្ឋាភិបាល គឺ៣ការពារ ៣កុំ និងត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ត្រូវអនុវត្តវិធានការរដ្ឋបាលខេត្ត និងវិធានការឲ្យធ្វើចត្តាឡីស័ករយ:ពេល១៤ ជាកំហិត ហើយចំពោះបុគ្គលទាំងឡាយណាដែលប្រព្រឹត្តល្មើសនឹងវិធានការនេះ នឹងប្រឈមការពិន័យអន្តការណ៍ ឬផ្តន្ទាទោសតាមច្បាប់ និងលិខិតបទដ្ឋានគតិយុត្តជាធរមាន ៕
អត្ថបទ និង រូបភាព ៖ លោក ងិន គឹមឡេង និង លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
