រយ:ពេលមួយខែចាប់ពីថ្ងៃទី១ដល់ថ្ងៃទី៣០ ខែមេសា ឆ្នាំ២០២១នេះ ក្រុមការងារនាយកដ្ឋានរៀបចំដែនដី និងគ្រប់គ្រងលំនៅដ្ឋានក្នុងឧទ្យានអង្គរ នៃអាជ្ញាធរជាតិអប្សរា បានចុះពិនិត្យ និងជួយសម្រួលលក្ខណ:បច្ចេកទេស នៃការសាងសង់លំនៅដ្ឋាន និងសំណង់ឧបសម្ព័ន្ធផ្សេងៗទៀតដល់ប្រជាពលរដ្ឋដែលរស់នៅក្នុងឧទ្យាន និងក្រៅឧទ្យានអង្គរបានចំនួន ៣៧៦គ្រួសារ។
ឯកឧត្តម ឡុង កុសល អគ្គនាយករង នៃអគ្គនាយកដ្ឋានអាជ្ញាធរជាតិអប្សរា និងជាអ្នកនាំពាក្យអាជ្ញាធរជាតិអប្សរា បានអោយដឹងនៅរសៀលថ្ងៃទី០៣ ខែឧសភា ឆ្នាំ២០២១នេះថា ផ្ទះប្រជារដ្ឋចំនួន៣៧៦គ្រួសារនេះ ក្នុងនោះមានប្រជាពលរដ្ឋដែលរស់នៅក្នុងឧទ្យានអង្គរចំនួន ៣៦០គ្រួសារ រួមមានក្រុងសៀមរាប ៨៣គ្រួសារ, ស្រុកប្រាសាទបាគង ៧៩គ្រួសារ, ស្រុកបន្ទាយស្រី ៨៨គ្រួសារ, ស្រុកពួក៤៤គ្រួសារ និងស្រុកអង្គរធំ ៦៦គ្រួសារ។ ចំណែកប្រជាពលរដ្ឋរស់នៅក្រៅឧទ្យានអង្គរចំនួន ១៦គ្រួសារ គឺនៅក្រុងសៀមរាប ៣គ្រួសារ, ស្រុកសូទ្រនិគម ២គ្រួសារ, ស្រុកប្រាសាទបាគង ១គ្រួសារ និងស្រុកស្វាយលើ ១០គ្រួសារ។
ឯកឧត្តម បន្ថែមថា គោលដៅបន្ត ក្រុមការងារសហគមន៍នៃអាជ្ញាធរជាតិអប្សរានឹងបន្តផ្សព្វផ្សាយ អប់រំប្រជាពលរដ្ឋឱ្យយល់កាន់តែច្បាស់ពីតួនាទី ភារកិច្ចរបស់អាជ្ញាធរជាតិអប្សរា ក្នុងការប្រើប្រាស់ដីធ្លីក្នុងតំបន់ការពារ នៃរមណីយដ្ឋានអង្គរ នីតិវិធីនៃការដាក់ពាក្យស្នើសុំជួសជុល និងសាងសង់ផ្ទះក្នុងឧទ្យានអង្គរឱ្យកាន់តែមានប្រសិទ្ធិភាព ទាន់ពេលវេលា។ ឯកឧត្តមបន្តទៀតថា រាល់ការស្នើសុំច្បាប់ជួសជុល គឺពុំមានការបង់ប្រាក់ដល់អាជ្ញាធរជាតិអប្សរា នោះទេ។
សូមបញ្ជាក់ថា ក្នុងរយ:ពេលមួយត្រីមាស ចាប់ពីខែមករា ដល់ខែមីនាឆ្នាំ២០២១ ក្រុមការងារសហគមន៍ នៃអាជ្ញាធរជាតិអប្សរា បានអនុញ្ញាតឱ្យពលរដ្ឋក្នុងតំបន់អង្គរជួសជុលផ្ទះ និងសាងសង់សំណង់ស្រាលចំនួន៦១៦ករណី ក្នុងសំណើរសុំអនុញ្ញាតការជួសជុល និងសាងសង់តូចតាចចំនួន៥គោលដៅស្រុក/ក្រុង ក្នុងតំបន់ឧទ្យានអង្គរ និងក្រៅតំបន់ឧទ្យានអង្គរបានចំនួន៩៣៤សំណើរ ៕
អត្ថបទ និងរូបភាព៖ ឈិត សាវី
កែសម្រួល៖ លីវ សុខុន
