រដ្ឋបាលខេត្តសៀមរាបចេញសេចក្តីប្រកាសព័ត៌មានមួយនេះ មានគោលបំណងជម្រាបជូនដល់បងប្អូនប្រជាពលរដ្ឋ និងសាធារណជន ដើម្បីបានជ្រាប អំពីការបើកឱ្យចេញ-ចូលឡើងវិញ នូវទីតាំងផ្ទះ ចំនួន ១៤កន្លែង ដែលបានបិទខ្ទប់កន្លងមកពាក់ព័ន្ធនឹងអ្នកមានជំងឺកូវីដ-១៩ ចាប់ពីថ្ងៃទី១៨ ខែឧសភា ឆ្នាំ២០២១នេះតទៅ។ ដែលករណីបិទខ្ទប់នេះដោយសារពាក់ព័ន្ធនឹងអ្នកមានវិជ្ជមានជំងឺកូវីដ-១៩ ឈ្មោះ ឈួន សុជាតា ឈ្មោះ លីស ជី និងឈ្មោះ ហឿល សុភាព រដ្ឋបាលខេត្តសៀមរាប សម្រេចបិទការចេញ-ចូល ទីតាំង ផ្ទះចំនួន១៤កន្លែង ក្នុងភូមិសាស្រ្តក្រុងសៀមរាប និងផ្នែកខ្លះនៃស្រុកប្រាសាទបាគង កាលពីថ្ងៃទី០២-០៤ ខែឧសភា ឆ្នាំ២០២១ រយ:ពេល ១៥ថ្ងៃ។
ក្រោមការតាមដានយ៉ាងយកចិត្តទុកដាក់របស់ក្រុមការងារជំនាញ និងវិធានចត្តាឡីស័ក បានធ្វើឲ្យករណីនេះវិលទៅរកភាពប្រក្រតី និងស្ថិតក្រោមការគ្រប់គ្រងបាន។ ដូចនេះ គណ:បញ្ជាការឯកភាពរដ្ឋបាលខេត្ត សម្រេចបើកឱ្យមានការចេញ-ចូល ឬដំណើរការឡើងវិញ ទីតាំង ផ្ទះចំនួន១៤កន្លែង ក្នុងភូមិសាស្រ្តក្រុងសៀមរាប និងផ្នែកខ្លះ នៃស្រុកប្រាសាទបាគង ចាប់ពីចុះកាលបរិច្ឆេទជូនដំណឹងនេះតទៅ។
រដ្ឋបាលខេត្តសៀមរាប ក៏បានអំពាវនាវដល់បងប្អូនប្រជាពលរដ្ឋ និងសាធារណជន ត្រូវយកចិត្តទុកដាក់អនុវត្តនូវវិធានការរបស់ក្រសួងសុខាភិបាល និងអនុសាសន៍ដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រី នៃព្រះរាជាណាចក្រកម្ពុជា គឺ ៣ ការពារ (ត្រូវពាក់ម៉ាស់ ត្រូវលាងដៃជាមួយសាប៊ូ ឬជែល និងត្រូវរក្សាគម្លាតសង្គម) ៣កុំ (កុំចូលទៅកន្លែងបិទជិតគ្មានខ្យល់ចេញ-ចូល កុំទៅកន្លែងមានមនុស្សច្រើនកុះករ និងកុំប៉ះពាល់គ្នា)៕
ប្រភព៖ រដ្ឋបាលខេត្តខេត្តសៀមរាប
កែសម្រួល៖ លីវ សុខុន
