ព័ត៌មានជាតិ ថ្មីៗ
លោក ខៀវ បញ្ញាវឌ្ឍន៍ ប្រធានសាខា ការពារអ្នកប្រើប្រាស់ កិច្ចការប្រកួតប្រជែង នឹងបង្រ្កាបការក្លែងបន្លំខេត្តសៀមរាប បានឲ្យដឹងថា ក្នុងឱកាសចុះត្រួតពិនិត្យលើសុវត្ថិភាពចំណីអាហារ ដែលបានដាក់តាំងលក់ក្នុងផ្សាររលួស ស្ថិតក្នុងឃុំរលួស ស្រុកប្រាសាទបាគង កាលពីព្រឹកថ្ងៃទី១៩ ខែឧសភា ឆ្នាំ២០២១ម្សិលមិញនេះ ហើយបន្ទាប់ពីបានធ្វើតេស្តលើទំនិញម្ហូបអាហារចំនួន ៩ គំរូ ក្នុងចំណោមទំនិញហូបចុកទាំង៦មុខរួចមក មន្ត្រីជំនាញបានរកឃើញពពុះសណ្តែកមានផ្ទុកសារធាតុគីមីចំនួន ៣,៨៨០គីឡូក្រាម , បាញ់កាញ់មានផ្ទុកសារធាតុគីមីហាមឃាត់ «បូរ៉ាក់»ទម្ងន់ ៥ គីឡូក្រាម និង ទំនិញដែលជាម្ហូបអាហារពុំមានសុវត្ថិភាព គឺមីម៉ាម៉ាកំប៉ុងទម្ងន់ ១,៥៦០គីឡូក្រាម ។
លោក ខៀវ បញ្ញាវឌ្ឍន៍ មានប្រសាសន៍ទៀតថា ទំនិញទាំងនោះត្រូវបានធ្វើកំណត់ហេតុដកហួតយកទៅរក្សាទុក ដើម្បីដុតកំទេចចោលនៅពេលក្រោយ រីឯអ្នកល់ទាំងអស់ ត្រូវបានមន្ត្រីជំនាញ ពន្យល់អប់រំពីរបៀបនៃការថែរក្សា , របៀបនៃការដាក់តាំងលក់ , របៀបនៃការមើលកាលបរិច្ឆេទ និង ការទទួលខុសត្រូវ ដូចជាទទួលទំនិញចូលត្រូវតែមានវិក័យប័ត្រ និងការទទួលខុសត្រូវផ្លូវច្បាប់ផ្សេងៗទៀត ក្នុងការទទួលនឹងការចែកចាយទំនិញមិនមានភាពប្រក្រតីទៅនឹងបទបញ្ញត្តិនានាផងដែរ ។
ក្នុងឱកាសនោះដែរ លោក ខៀវ បញ្ញាវឌ្ឍន៍ បានថ្លែងអំណរគុណដល់អាជ្ញាធរដែនដី ដែលបានចូលរួមសហការស្អិតរមួតជាមួយស្ថាប័នជំនាញក្នុងការពង្រឹងសុវត្ថិភាពម្ហូបអាហារក្នុងមូលដ្ឋាន លើកកម្ពស់សុខភាពសារធារណៈ ពិសេសក្នុងសម័យកាលនៃការឆ្លងរីករាលដាលនៃជំងឺកូវីដ-១៩ ដែលទាមទារឲ្យប្រជាជនយើងរស់នៅល្អ ហូបចុកល្អ និងអនុវត្តតាមអនុសាសន៍របស់សម្តេចតេជោ ហ៊ុន សែន គឺ ៣ការពារ រួមមាន ៖ ១. ពាក់ម៉ាស់ , ២. លាងដៃ , ៣. រក្សារគម្លាតបុគ្គុល និង៣កុំ រួមមាន ៖ ១. កុំចូលទៅកន្លែងបិទជិត , ២. កុំទៅកន្លែងមានមនុស្សច្រើន , ៣. កុំប៉ះពាល់គ្នា កុំឱបកៀកគ្នា ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
