បច្ចុប្បន្ននេះ វិស័យសារព័ត៌មាននៅកម្ពុជា គឺមានភាពទូលំទូលាយណាស់ ហើយការបង្កើតអង្គភាពសារព័ត៌មានក៏កាន់តែទូលំទូលាយថែមទៀត តាមរយៈច្បាប់របស់យើងក៏មិនចង្អៀត តាមរយៈបច្ចេកវិទ្យាក៏កាន់តែទំនើប ដែលអ្នកខ្លះមានត្រឹមតែគ្នា២នាក់ ឬមានស្មាតហ្វូន១គ្រឿង ឬ២គ្រឿង ក៏អាចបង្កើតអង្គភាពសារព័ត៌មានបានដែរ ដោយពួកគេបានធ្វើការឡាយពាសវាលពាសកាល ទៅតាមរយៈនៃសេរីភាពអ្នកសារព័ត៌មាន ប៉ុន្តែអ្វីដែលជាកំហុសឆ្គងនោះ ពួកគេនឹងប្រឈមចំពោះមុខច្បាប់ គឺប្រឈមជាមួយតុលាការ ប្រសិនបើមានការបំពាន ឬការប្រើប្រាស់ការសរសេរនោះប៉ះពាល់ទៅដល់ច្បាប់ដែលគេបានហាមឃាត់ ។ នេះបើតាមប្រសាសន៍ ឯកឧត្តម ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន ក្នុងកម្មវិធីសន្ទនាមតិ របស់វិទ្យុFMជាតិនគរភ្នំ និងទូរទស្សន៍ជាតិខេត្ត នៃមន្ទីរព័ត៌មានខេត្តសៀមរាប តាមរយៈប្រព័ន្ធ Zoom កាលពីពេលថ្មីៗកន្លងទៅនេះ ។
ឯកឧត្តមមានប្រសាសន៍ទៀតថា ប្រការដែលសំខាន់ប្រជាពលរដ្ឋទាំងអស់ត្រូវតែស្វែងយល់ឲ្យបានច្បាស់ទៅលើបណ្ដាញផ្សព្វផ្សាយព័ត៌មានទាំងអស់នេះ ជាពិសេសលើព័ត៌មានដែលពាក់ព័ន្ធនឹងបញ្ហាជំងឺកូវីដ-១៩ ដោយយកប្រព័ន្ធផ្សព្វផ្សាយជាតិ ដូចជាទូរទស្សន៍ជាតិ វិទ្យុជាតិ និងទីភ្នាក់សារព័ត៌មានកម្ពុជា ធ្វើជាប្រព័ន្ធផ្សព្វផ្សាយសម្រាប់ផ្ទៀងផ្ទាត់ ថាតើដំណឹង ឬសេចក្ដីជូនដំណឹងនោះ វាត្រឹមត្រូវឬទេ ហើយនៅខេត្តសៀមរាបនេះ មានមន្ទីរព័ត៌មានខេត្ត មានវិទ្យុFMជាតិនគរភ្នំ១០៣ មេហ្គេហឺត និងទូរទស្សន៍ជាតិខេត្តសៀមរាប អំពីការវិវត្តន៍របស់ជំងឺកូវីដ-១៩ តើបានវិវត្តន៍ដល់ណា ហើយរាជរដ្ឋាភិបាលកម្ពុជា បានដោះស្រាយយ៉ាងម៉េច ហើយមានយន្តការយ៉ាងម៉េច នេះគឺជាចំណុចសំខាន់មួយក្នុងការផ្ទៀងផ្ទាត់ព័ត៌មាន ឬដំណឹងស្ដីពីជំងឺកូវីដ-១៩ នៅកម្ពុជា ។
ក្នុងឱកាសនោះដែរ ឯកឧត្តម ជា ច័ន្ទបរិបូរណ៍ បានណែនាំដល់អ្នកដែលនិយមបង្កើតនៅព័ត៌មានញុះញង់ បំភ្លៃ បំភ្លើស ពីក្រៅប្រទេស ដែលធ្វើឲ្យប៉ះពាល់ដល់អាយុជីវិត ប៉ះពាល់ដល់ស្ថានភាពសង្គមជាតិយើង ក្រៅពីមានទោសទណ្ឌតាមផ្លូវច្បាប់ ក៏នឹងមានទោសទណ្ឌមួយទៀតតាមផ្លូវសាសនា ព្រោះប្រជាពលរដ្ឋរបស់យើងភាគច្រើន ពេញនិយម និងជឿជាក់ទៅលើបុណ្យ និងបាប ហើយប្រសិនបើអងស់លោកផ្សព្វផ្សាយដំណឹងនេះទៅ វាមិនមែនប៉ះពាល់ត្រឹមតែអ្នកដទៃ គឺវានឹងប៉ះពាល់ដល់បងប្អូនសាច់ញាតរបស់ខ្លួន ព្រោះខ្ញុំជឿជាក់ថា អស់លោកដែលនៅក្រៅប្រទេស ពុំមែននាំយកបងប្អូនរបស់ខ្លួនមួយពូជទៅរសនៅក្រៅប្រទេសនោះទេ គឺគង់តែមានបងប្អូនដែលកំពុងរស់នៅក្នុងប្រទេសកម្ពុជា ហើយនេះក៏ជាអំពើបាបមួយផងដែរនៅក្នុងសាសនា ហើយបងប្អូនប្រជាពលរដ្ឋគ្រប់រូបត្រូវតែចូលរួមអនុវត្តនូវវិធាន និងច្បាប់ដែលរាជរដ្ឋាភិបាលកម្ពុជាបានផ្សព្វផ្សាយ ។
ជុំវិញការលើកឡើងនេះ ប្រជាពលរដ្ឋមួយចំនួនក្នុងខេត្តសៀមរាប បានសម្ដែងនូវនូវការគាំទ្រទាំងស្រុងចំពោះប្រសាសន៍របស់ឯកឧត្តមរដ្ឋលេខាធិការ ព្រោះថាមុននឹងយើងជឿទៅលើព័ត៌មានអ្វីមួយ ដែលពាក់ព័ន្ធនឹងជំងឺកូវីដ-១៩ នោះ យើងត្រូវតែមានការពិចារណា និងផ្ទៀងផ្ទាត់ឲ្យបានច្បាស់លាស់ កុំបំប៉ោងព័ត៌មានដែលនាំឲ្យមានការយល់ច្រឡំ ហើយធ្វើឲ្យបងប្អនប្រជាពលរដ្ឋមានការភ័យខ្លាច ។ ក្នុងនោះដើម្បីទទួលបានព័ត៌មានពិត ពួកគាត់បានប្រកាន់នូវគោលការណ៍មួយ គឺមើលគេហទំព័រក្រសួងសុខាភិបាលជាដំបូង ទើបយកមកផ្ទៀងផ្ទាត់ជាមួយនឹងគេហទំព័រផ្សេងៗ ហើយដោយឡែកសម្រាប់ខេត្តសៀមរាប គឺពួកគាត់តែងតែចូលទៅមើលនៅក្នុងគេហទំព័រមន្ទីរសុខាភិបាលខេត្តសៀមរាប គេហទំព័ររបស់រដ្ឋបាលខេត្តសៀមរាប និងគេហទំព័ររបស់មន្ទីរព័ត៌មានខេត្តសៀមរាប អំពីការវិវត្តន៍របស់ជំងឺកូវីដ-១៩ ព្រោះថាគេហទំព័រទាំងនេះចេញផ្សាយអំពីជំងឺកូវីដ-១៩ លឿន និងរហ័សផងដែរ ៕
អត្ថបទ និង រូបថត ៖ ទិត្យ សំបូរ
កែសម្រួល ៖ លីវ សាន្ត
