នៅព្រឹកថ្ងៃទី២២ ខែឧសភា ឆ្នាំ២០២១ ឯកឧត្តមឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ បានដឹកនាំនាយទាហានជាន់ខ្ពស់ចំណុះទីបញ្ជាការយោធភូមិភាគទី៤ អញ្ជើញចុះត្រួតពិនិត្យ និងសាកសួរសុខទុក្ខនាយទាហាន នាយទាហានរង ពលទាហាន ដែលជាក្រុមគ្រូពេទ្យកំពុងបំពេញភារកិច្ចនៅមណ្ឌលចត្តាឡីស័កនៅក្នុងសាលាបឋមសិក្សា វត្តស្វាយ ដែលស្ថិតនៅក្នុងក្រុង/ខេត្តសៀមរាប និងបាននាំយកនូវអំណោយជាសម្ភារបរិក្ខាពេទ្យ និងគ្រឿងឧបភោគបរិភោគដែលជាជំនួយរបស់ ឯកឧត្តម មេបញ្ជាការកងទ័ពជើងគោក ប្រគល់ជូនក្រុមគ្រូពេទ្យកំពុងបំពេញភារកិច្ចនៅមណ្ឌលចត្តាឡីស័ក ដោយក្នុងនោះរួមមាន៖ មី១៥កេស ,ថ្នាំបាញ់សម្លាប់មេរោគ ២ធុង, ម៉ាសចំនួន ១០០០ម៉ាស, អាវការពារមេរោគចំនួន ២០ឈុត, ជែលសម្លាប់មេរោគចំនួន ៣កេស, ម៉ាស៊ីនបាញ់ថ្មាំសម្លាប់មេរោគចំនួន ៣គ្រឿង និងត្រី ខ (ខ ភ ម) ២កេស ស្មើនឹង ៤០គីឡូក្រាម ។
ក្នុងឱកាសនោះដែរ ឯកឧត្តមឧត្តមសេនីយ៍ឯក ពៅ ហេង បានពាំនាំនូវសារផ្ដាំផ្ញើរសួរសុខទុក្ខពីសំណាក់ ឯកឧត្តមឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងមេបញ្ជាការកងទ័ពជើងគោក និងថ្នាក់ដឹកនាំគ្រប់លំដាប់ថ្នាក់ជូនដល់ក្រុមគ្រូពេទ្យដែលកំពុងបំពេញភារកិច្ចដ៏សកម្មក្នុងការជួយប្រជាពលរដ្ឋដែលកំពុងធ្វើចត្តាឡីស័កនៅក្នុងមណ្ឌលសាលាបឋមសិក្សាវត្តស្វាយ ដើម្បីការពារ និងទប់ស្កាត់ការរាលដាលនៃជំងឺកូវីដ-១៩។ ជាមួយនោះឯកឧត្តមឧត្តមសេនីយ៍ឯក ក៏បានក្រើនរំលឹកបន្ថែមដល់យោធិនជាក្រុមគ្រូពេទ្យទាំងអស់គ្នាដែលកំពុងបំពេញភារកិច្ចត្រូវយកអស់ស្មារតី ចំណេះដឹង បទពិសោធន៍ បំពេញភារកិច្ចតាមដានអោយមានប្រសិទ្ធភាព ជាពិសេសគោរពឲ្យបាននូវក្រមសីលធម៌ វិជ្ជាជីវៈ ជាគ្រូពេទ្យ និងត្រូវមានកិច្ចសហការល្អជាមួយមិត្តរួមការងារ និងមន្រ្តីអាជ្ញាធរពាក់ព័ន្ធផងដែរ។
សូមបញ្ជាក់ផងដែរថា ដោយស្ថានភាពវិវត្តនៃការរីករាលដាលនៃជំងឺកូវីដ-១៩ នៅកម្ពុជា ជាពិសេសយោងតាមការដឹកនាំប្រកបដោយភាពម៉ត់ចត់របស់ប្រមុខ រាជរដ្ឋាភិបាលកម្ពុជា និងការយកចិត្តទុកដាក់របស់ក្រសួងការពារជាតិ អគ្គបញ្ជាការដ្ឋាន បញ្ជាការដ្ឋានកងទ័ពជើងគោក ដោយមានយន្តការច្បាស់លាស់របស់ក្រសួងស្ថាប័នគ្រប់លំដាប់ថ្នាក់ ដើម្បីបង្កើនប្រសិទ្ធភាពក្នុងការប្រយុទ្ធទប់ស្កាត់ ការរីករាលដាលដោយជំងឺដ៏កាចសាហាវនេះដោយឡែកនៅថ្ងៃទី១០ ខែឧសភា ឆ្នាំ២០២១ រដ្ឋបាលខេត្តសៀមរាប បានប្រគល់មណ្ឌលចត្តាឡីស័ក សាលាបឋមសិក្សាវត្តស្វាយមកឲ្យអង្គភាពយោធភូមិភាគទី៤ ធ្វើការគ្រប់គ្រង និងបន្តនិរន្តរភាពការងារ ហើយសម្ភារវេជ្ជសាស្រ្តមួយចំនួនអាជ្ញាធរខេត្តសៀមរាប បានផ្ដល់ជូនដល់ក្រុមគ្រូពេទ្យយោធភូមិភាគទី៤ ជាបន្តបន្ទាប់ដើម្បីបំពេញភារកិច្ច៕
អត្ថបទ និង រូបភាព៖ ឈិត សាវី
កែសម្រួល៖ អ៊ុន ណារាជ្យ
