រដ្ឋបាលខេត្តសៀមរាប បានអនុវត្តគម្រោងរៀបចំនិងប្រើប្រាស់បណ្តាញបំពង់ខ្សែកាបអុបទិកក្រោមដី តាំងពីឆ្នាំ២០១៨ ក្នុងគោលដៅលុបបំបាត់ទាំងស្រុង ការប្រើប្រាស់បណ្តាញទូរគមនាគមន៍ខ្សែកាប្លិ៍អាកាស ដែលវាមានផលប៉ះពាល់ទាំងផ្នែកបច្ចេកទេស និងសោភ័ណភាព។ នេះបើតាមការបញ្ជាក់ពីលោកស្រី យូ សុភា អភិបាលរងខេត្តសៀមរាប ព្រឹកថ្ងៃទី២៤ ខែឧសភា ឆ្នាំ២០២១ ក្នុងឱកាសដឹកនាំក្រុមការងារចុះកាត់ទំលាក់ខ្សែកាប្លិ៍លើអាកាសនៅតាមបណ្តោយផ្លូវសម្តេចសង្ឃ ទេព វង្ស នៃក្រុងសៀមរាប ចាប់ពីចំណុចស្ពានវត្តរាជបួណ៌ រហូតដល់ស្តុបផ្សារកណ្តាល។
លោកស្រី យូ សុភា បញ្ជាក់បន្ថែមថា នៅក្នុងគម្រោងផែនការទាំងនោះ គឺត្រូវអនុវត្តនៅលើបណ្តាផ្លូវចំនួន២៤ខ្សែក្នុងក្រុងសៀមរាប ដែលស្មើនឹងប្រហែលជា ១៥០គីឡីម៉ែត្រ ហើយគម្រោងទាំងនោះ វាគឺជាផ្នែកមួយនៃការកសាងសម្បទាក្រុងសៀមរាប-អង្គរ ឲ្យក្លាយជាទី៏ក្រុងឆ្លាតនៃតំបន់ទេសចរណ៍វប្បធម៌ប្រវត្តិសាស្រ្តកម្ពុជា ណាថ្ងៃអនាគត។ ជាពិសេសនៅពេលដែលហេដ្ឋរចនាសម្ព័ន្ធផ្លូវ៣៨ខ្សែត្រូវបានបញ្ចប់ការដ្ឋានដោយជោគជ័យ សៀមរាប-អង្គរ ពុំមានទៀតឡើយ ខ្សែកាប្លិ៍អាកាស ដើម្បីបង្កើតសោភ័ណភាពថ្មីនៃក្រុងទេសចរណ៍វប្បធម៌ប្រវត្តិសាស្រ្តនៃកម្ពុជា អបអរសាទរ ការងើបឡើងវិញនៃសេដ្ឋកិច្ចសង្គម ក្រោយវិបត្តិកូវីដ-១៩ ។
បើតាមលោក សុខ សីហា ប្រធានមន្ទីរប្រៃសណីយ៍ និងទូរគមនាគមន៍ខេត្ដសៀមរាប បាឲ្យដឹងថា ការអនុវត្តគម្រោងផែនការទាំងនោះ នៅក្នុងឆ្នាំ២០១៨ និងដើមឆ្នាំ២០១៩ ខ្សែកាប្លិ៍អាកាសដែលស្ថិតនៅលើដងផ្លូវចំនួន១៤ខ្សែ ស្មើនឹងប្រហែលជា៧០គីឡូម៉ែត្រ ត្រូវបានកាត់ផ្តាច់បោសសំអាត១០០% និងដាក់ឲ្យដំណើរការតាមបំពង់បណ្តាញបង្កប់ក្រោមដី។ យ៉ាងណាក៏ដោយ លទ្ធផលសម្រេចទាំងនោះ អាចនិយាយបានថាប្រហែលជា៥០% នៃផែនការសរុប មកដល់បច្ចប្បន្ននេះ កំពុងស្ថិតក្នុងដំណាក់ការសង្គ្រោះប្រើប្រាស់ និងត្រូវបានកែលម្អ ឲ្យស្របទៅនឹងប្លង់មេនៃកិច្ចដំណើរការស្ថាបនាផ្លូវអភិវឌ្ឃន៍ក្រុងសៀមរាប ៣៨ខ្សែ។ ក្នុងនោះបណ្តាញទូរគមនាគមន៍ក្រោមដី នឹងត្រូវបានសម្រេចលទ្ធផលជាស្ថាពរ១០០% ស្របជាមួយគ្នានឹងការរះឡើងនៃទីក្រុងឆ្លាត ក្រោយការបញ្ចប់ការដ្ឋានហេដ្ឋារចនាសម្ព័ន្ធផ្លូវ៣៨ខ្សែ និងក្រោយវិបត្តិកូវីដ-១៩។
គួរបញ្ជាក់ដែរថា ខេត្ដសៀមរាបមានក្រុមហ៊ុនចំនួន១១ កំពុងប្រើប្រាស់បណ្តាញខ្សែកាប្លិ៍ទាំងនោះ ហើយក៏មានក្រុមហ៊ុនចំនួន២ក្រុមហ៊ុនផងដែរ ដែលបានទទួលអាជ្ញាប័ណ្ណជីកកប់បំពង់កាប្លិ៍ទូរគមនាគមន៍ក្រោមដី រួមមាន ទូរគមនាគមន៍កម្ពុជា TC របស់រដ្ឋ និងក្រុមហ៊ុន Cambodia Fiber Optic Communication Network (CFOCN )៕
អត្ថបទ និង រូបភាព៖ លោក ងិន គីមឡេង
កែសម្រួល៖ លោក អ៊ុន ណារាជ្យ
