កាលថ្ងៃទី២៣ ខែឧសភា ឆ្នាំ២០២១ វត្តចំនួន៣ ក្នុងស្រុកប្រាសាទបាគង រួមមាន វត្តបន្ទាយក្បាលចិន ក្នុងឃុំអំពិល វត្តពង្ររង្សី ក្នុងឃុំកន្ទ្រាំង និងវត្តព្រះខ័នសែនជ័យ ស្ថិតក្នុងឃុំបល្ល័ង្គ បានទទួលទេយ្យវត្ថុជាគ្រឿងឧបភោគបរិភោគ បច្ច័យ និងសម្ភារប្រើប្រាស់ពីរដ្ឋបាលខេត្តសៀមរាប ដោយទេយ្យវត្ថុទាំងនោះក្នុងមួយវត្តទទួលបាន៖ អង្ករពី ២០០ ទៅ ៣០០គីឡូក្រាម ,មី ១០កេស ,ទឹកសុទ្ធ ៥កេស ,ទឹកត្រី ៥កេស,ទឹកស៊ីអ៊ីវ ៥កេស , ត្រីខ ២កេស , ស្ករស ,ទឹកដោះគោ ,ភេសជ្ជៈ ,អាកុល និងបច្ច័យ ២លានរៀល។ ពិធីប្រគេននេះដែរ ប្រព្រឹត្តិទៅក្រោមវត្តមានលោក ពិន ប្រាកដ អភិបាលរងខេត្តសៀមរាប ដោយមានការចូលរួមពីសំណាក់លោក លោកស្រី ជាថ្នាក់ដឹកនាំមន្ទីរ-អង្គភាព អាជ្ញាធរស្រុក និងសហភាពសហព័ន្ធយុវជនកម្ពុជាខេត្ត និងស្រុកផងដែរ។
លោក ពិន ប្រាកដ មានប្រសាសន៍ ក្រោមខិតខំប្រឹងប្រែងរបស់ប្រមុខរាជរដ្ឋាភិបាល ថ្នាក់ដឹកនាំខេត្ត ស្ថាប័នជំនាញពាក់ព័ន្ធ ការលះបង់របស់កងទ័ពជួរមុខ អាជ្ញាធរដែនដី រួមទាំងការចូលរួមសហការពីសហភាពសហព័ន្ធយុវជន និងបងប្អូនប្រជាពលរដ្ឋ ឃើញថា កម្ពុជាកាត់បន្ថយបាននូវចំនួនអ្នកឆ្លងកូវីដ-១៩ ហើយចំនួននៃអ្នកជាសះស្បើយ ក៏បានបង្ហាញនៅក្នុងតារាងតួរលេខប្រចាំថ្ងៃ ដែលនេះ គឺជាមោទកភាពរបស់កម្ពុជាសម្រាប់កាត់ផ្តាច់ព្រឹត្តិការណ៍សហគមន៍ ២០កុម្ភៈ ២០២១ ព្យាបាលមុខរបួសនៃវិបត្តិកូវីដ-១៩ សំដៅឆ្ពោះទៅរកការងើបឈរឡើងវិញ នៃកំណើនសេដ្ឋកិច្ចកម្ពុជា ក្រោមការត្រៀមទុកដោយយន្តការនៃយុទ្ធសាស្រ្ត កែប្រែវិបត្តិកូវីដ ឲ្យក្លាយជាឱកាស នៃការអភិវឌ្ឍន៍ ។
លោក ពិន ប្រាកដ មានប្រសាសន៍ទៀតថា កម្មវិធីប្រគេនទេយ្យវត្ថុមានចង្ហាន់បិណ្ឌបាតជាដើមនេះ ត្រូវបានរដ្ឋបាលខេត្តបានរៀបចំឡើងសម្រាប់បណ្តាវត្តចំនួន៣០ និងអាស្រមចំនួន៦ ដែលបាននឹងកំពុងជួបការលំបាកខ្លាំង ស្ថិតនៅតាមបណ្តាមូលដ្ឋានស្រុកទាំង១១ទូទាំងខេត្ត លើកលែងតែក្រុងសៀមរាប។ ក្នុងឱកាសនោះដែរលោកអភិបាលរងខេត្ត ក៏បានសំណូមពរដល់ព្រះសង្ឃគ្រប់វត្ត ក៏ដូចអាជ្ញាធរឃុំ ភូមិ បង្កើនការយកចិត្តអប់រំ ផ្សព្វផ្សាយបន្តដល់ប្រជាពុទ្ធបរិស័ទ ពីវិធានការ ៣កុំ ៣ការពារ និង ២ចូលរួម និង សេចក្តីណែនាំពីវិធានការការពាររបស់ក្រសួងសុខាភិបាល៕
ព័ត៌មានជាតិ ថ្មីៗ
