កាលពីរសៀលថ្ងៃទី២៤ ខែឧសភា ឆ្នាំ២០២១ម្សិលមិញនេះ ឯកឧត្តម អ៊ាន ឃុន ប្រធានក្រុមប្រឹក្សាខេត្ត ដឹកនាំប្រតិភូក្រុមប្រឹក្សាខេត្ត បាននាំយកថវិកាជាប្រាក់រៀល ចំនួន១៦.២០០.០០០រៀល និង ប្រាក់ដុល្លារអាមេរិកចំនួន ៤.៤៥០ដុល្លារ និង លោក ពិន ប្រាកដ អភិបាលរង នៃគណៈអភិបាលខេត្ត ដឹកនាំប្រតិភូនៃរដ្ឋបាលខេត្ត បាននាំយកថវិកាជាប្រាក់រៀល ចំនួន៩.៤៨២.០០០រៀល និង ប្រាក់ដុល្លារអាមេរិកចំនួន ១.៣០០ដុល្លារ ប្រគល់ជូនគណៈកម្មាធិការសាខាកាកបាទក្រហមកម្ពុជាខេត្តសៀមរាប ក្រោមអធិបតីភាពឯកឧត្តម ទៀ សីហា ប្រធានគណៈកម្មាធិការសាខានៅទីស្នាក់ការសាខាកាកបាទក្រហមខេត្តសៀមរាប ក្នុងឱកាសខួបទី១៥៨ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ។
មានប្រសាសន៍ក្នុងឱកាសនោះ ឯកឧត្តម អ៊ាន ឃុន ប្រធានក្រុមប្រឹក្សាខេត្ត បានសម្ដែងការកោតសរសើរ និង វាយតម្លៃខ្ពស់អំពីសកម្មភាពរបស់គណៈកម្មាធិការសាខា ក្រោមការដឹកនាំរបស់ឯកឧត្តម ទៀ សីហា ប្រធានគណៈកម្មាធិការសាខា ក្នុងដែលបានយកចិត្តទុកដាក់ និង ខិតខំប្រឹងប្រែងជួយដល់ជនរងគ្រោះ និង ជនងាយរងគ្រោះបានទាន់ពេលវេលា ជាពិសេសការកៀគរប្រមូលមូលនិធិ ដើមី្បទ្រទ្រង់ ចលនាកាកបាទក្រហម និងការប្រយុទ្ធប្រឆាំងបង្ការ ទប់ស្កាត់ជំងឺកូវីដ-១៩ សម្រាប់ព្រឹត្តិការណ៍សហគមន៍ ២០កុម្ភៈ ។
ក្នុងឱកាសនោះដែរ ឯកឧត្តម ទៀ សីហា បានធ្វើការថ្លែងអំណរគុណ ចំពោះឯកឧត្តមប្រធាន និង ឯកឧត្តម លោកជំទាវ ជាសមាជិកសមាជិកាក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំមន្ទីរ អង្គភាព កងកម្លាំងប្រដាប់អាវុធទាំងបីប្រភេទ មន្ត្រីរាជការ បងប្អូនសប្បុរសជន ជាពាណិជ្ជករ អាជីវករ ក្រុមហ៊ុន សិស្ស និសិ្សត ដែលបានបរិចាកធនធានផ្ទាល់ ខ្លួន ក្នុងការទ្រទ្រង់ចលនាកាកបាទក្រហម នេះសបញ្ជាក់ឲ្យឃើញពីទឹកចិត្តដ៏ប្បុរសធម៌ ចំពោះបងប្អូនប្រជាពលរដ្ឋរងគ្រោះ និងងាយរងគ្រោះបំផុត ដែលក្នុងកាយវិការដ៏មនុស្សធម៌នេះ គឺជាការចូលរួមរបស់សប្បុរសជនជាមួយសកម្មភាពមនុស្សធម៌របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ជាពិសេសទោះបីយើងកំពុងជួបនូវវិបត្តិជំងឺកូវីដ-១៩ ក៏ពិតមែន ក៏ប៉ុន្តែចំពោះទឹកចិត្តរបស់បងប្អូន បានបញ្ចេញនូវទឹកចិត្តដ៏សប្បុរសធម៌ ក្នុងការចូលរួមប្រយុទ្ធប្រឆាំង និង កាត់ផ្តាច់ខ្សែចម្លងជំងឺកូវីដ-១៩ ព្រមទាំងបានជួយដល់បងប្អូនប្រជាពលរដ្ឋរងគ្រោះ និងងាយរងគ្រោះដោយគ្រោះធម្មជាតិផងដែរ ។
ព័ត៌មានជាតិ ថ្មីៗ
ឯកឧត្តមប្រធានគណៈកម្មាធិការសាខា មានប្រសាសន៍ទៀតថា រាល់ថវិកាដែលប្រគល់ជូនសាខាកាកបាទក្រហមកម្ពុជាខេត្តសៀមរាប គឺជាការរួមចំណែកមួយ ជាមួយសកម្មភាពមនុស្សធម៌របស់កាកបាទក្រហមកម្ពុជា ដែលថ្នាក់ដឹកនាំ និង កងកម្លាំង សប្បុរសជន បានធ្វើការបរិច្ចាគដោយសទ្ធាជ្រះថ្លា ហើយសកម្មភាពទាំងនេះក៏ជាវប្បធម៌នៃការចែករំលែកជួយគ្នា ទោះតិចក្ដីច្រើនក្ដី តែជាទឹកចិត្តជួយគ្នាក្នុងគ្រាក្រ គ្រាលំបាក ហើយសាខាកាកបាទក្រហមកម្ពុជាខេត្តសៀមរាប នឹងប្រើប្រាស់នូវថវិកាទាំងនេះ ឲ្យចំគោលដៅមនុស្សធម៌ ដោយមិនប្រកាន់ពូជសាសន៍ ពណ៌សម្បុរ និងនិន្នាការនយោបាយណាមួយឡើយ ស្របតាមគោលការណ៍គ្រឹះទាំង៧ប្រការរបស់ចលនាអន្តរជាតិកាកបាទក្រហម អឌ្ឍចន្ទក្រហម ។
សូមបញ្ជាក់ថា ក្នុងនោះនៅឆ្នាំ២០២០ សាខាកាកបាទក្រហមកម្ពុជាខេត្តសៀមរាប បានឧបត្ថម្ភដល់គ្រួសារងាយរងគ្រោះ , អគ្គិភ័យ , ខ្យល់កន្ត្រាក់ , ទឹកជំនន់ និង ឧបទ្ទវហេតុ មានចំនួនសរុប ៤.៧៦៤គ្រួសារ/នាក់ និងពីខែមករា ដល់ថ្ងៃទី ២៤ ខែឧសភាឆ្នាំ២០២១ នេះ បានឧបត្ថម្ភដល់គ្រួសារងាយរងគ្រោះ , អគ្គិភ័យ , ខ្យល់កន្ត្រាក់ និង ឧបទ្ទវហេតុ មានចំនួនសរុប ១.២១០គ្រួសារ/នាក់ ហើយចំពោះមូលនិធិទទួលបាន ក្នុងខួបលើកទី១៥៨ ទិវាកាកបាទ ក្រហម អឌ្ឍចន្ទក្រហម ឆ្នាំ២០២១នេះ គិតជាប្រាក់ដុល្លា មានចំនួនសរុប ២៤០.៧១៣ដុល្លារសហរដ្ឋអាមេរិក រួមទាំងសម្ភារ រួមមាន ៖ អង្ករ ៩តោន , មី ២៥កេស , ទឹកត្រី ១០យួរ ,ម៉ាស់ ១កេស និង អាល់កុល ៣០លីត្រ ៕
អត្ថបទ និង រូបភាព៖ ទ្រា ពន្លឺ
កែសម្រួលអត្ថបទ ៖ លោក លីវ សាន្ត
