មានប្រសាសន៍ក្នុងកិច្ចប្រជុំ ស្តីពី ការកែទម្រង់ការអប់រំបណ្តុះបណ្តាលបច្ចេកទេស និងវិជ្ជាជីវៈ(TVET)តាមវីឌីអូ Zoom នាព្រឹកថ្ងៃទី២៥ ខែឧសភា ឆ្នាំ២០២១នេះ ឯកឧត្តមបណ្ឌិត ពេជ សោភ័ន រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវ បានមានប្រសាសន៍ថា ការអប់រំបណ្តុះបណ្តាលបច្ចេក ទេស និងវិជ្ជាជីវៈ គឺជាកត្តាមិនអាចខ្វះបានក្នុងការអភិវឌ្ឍសេដ្ឋកិច្ចសង្គម និងជំរុញឲ្យអ្នកសិក្សាទទួលបាននូវចំណេះដឹង ជំនាញបច្ចេកទេសជាមួយសមត្ថភាពពិតប្រាកដដើម្បីក្លាយខ្លួនជាពលករ ជំនាញ អ្នកបច្ចេកទេស ព្រមទាំងចូលរួមចំណែកយ៉ាងសំខាន់ក្នុងការអភិវឌ្ឍសង្គម និងសេដ្ឋកិច្ចជាតិ។
ឯកឧត្តមបណ្ឌិត ពេជ សោភ័ន បានឱ្យដឹងថា ក្នុងបរិបទនៃជំងឺកូវីដ១៩នេះ រាជរដ្ឋាភិបាលកម្ពុជា បានកំពុងស្វែងរកគន្លឹះកែទម្រង់វិស័យបណ្តុះបណ្តាលវិជ្ជាជីវៈ ឱ្យកាន់តែទំនើបហើយ ដើម្បីឆ្លើយតប និងបដិវត្តន៍ឧស្សាហកម្ម៤.០ផង។ ជាមួយគ្នានេះ រាជរដ្ឋាភិបាលដាក់ចេញនូវគោលនយោបាយជាតិធំៗមួយចំនួនក្នុងនោះរួមមាន គោលនយោបាយអភិវឌ្ឈន៍ វិស័យឧស្សាហកម្មកម្ពុជាឆ្នាំ២០១៥-២០២៥ និងគោលនយោបាយជាតិស្តីពីមុខរបរ និងការងារឆ្នាំ២០១៥-២០២៥ ដើម្បីរួមចំណែកក្នុងការអភិវឌ្ឍវិស័យឧស្សាហកម្ម និងបង្កើតការងារសមរម្យ ព្រមទាំងធានាគុណភាព និងផលិតភាព ខ្ពស់របស់កម្លាំងពលកម្មដែលអាចប្រកួតប្រជែងប្រសើរជាងមុនជាមួយបណ្តាប្រទេសក្នុងតំបន់។ ឯកឧត្តម បានបន្តថា កន្លងមក ការផ្លាស់ប្តូរអាកាសធាតុ , ការរាលត្បាតនៃជំងឺឆ្លង, ការរីកចំរើននៃវិទ្យាសាស្រ្ត និងការចល័តទីលំនៅរបស់ប្រជាពលរដ្ឋជាដើម ដែលជំរុញឱ្យពលរដ្ឋប្រឈមការគ្មានការងារធ្វើ។
ឯកឧត្តមបណ្ឌិត ពេជ សោភ័ន បានបន្ថែមថា រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាននិងកំពុងផ្តោតការយកចិត្តទុកដាក់យ៉ាងខ្លាំងលើគ្រប់វិស័យ ជាពិសេស ការអភិវឌ្ឍវិស័យការងារ រួមទាំងការបង្កើតការងារ ការពង្រឹងភាពសុខដុមរមនានៃទំនាក់ទំនងវិជ្ជាជីវៈ ព្រមទាំងជំរុញការអប់រំបណ្តុះបណ្តាលបច្ចេកទេសនិងវិជ្ជាជីវៈ ឲ្យឆ្លើយតបទៅនឹងតម្រូវការទីផ្សារការងារ ដើម្បីចូលរួមចំណែកក្នុងការកាត់បន្ថយភាពក្រីក្រ ការលើកស្ទួយជីវភាពប្រជាពលរដ្ឋ និងការអភិវឌ្ឍសេដ្ឋកិច្ចសង្គម ប្រកបដោយចីរភាពជាដើម ។ ក្នុងបដិវត្តន៍នៃឧស្សាហកម្ម៤.០ និងភាពជឿនលឿនរបស់បច្ចេកវិទ្យា បានធ្វើឱ្យការធ្វើអាជីវកម្ម ការលក់ដូរ ការសិក្សាជាដើម កាន់តែមានភាពងាយស្រួល ដែលកត្តាទាំងនេះហើយ ប្រជាពលរដ្ឋទាំងអស់គួរផ្លាស់ប្តូរពីការប្រើប្រាស់បច្ចេកវិទ្យាពីអាណូឡក មកឌីជីថលវិញ ខណៈដែលប្រទេសជឿនលឿនក្នុងលោកកំពុងធ្វើបដិវត្តន៍បច្ចេកវិទ្យា ហើយប្រព័ន្ធការងារបែបឌីជីថលនេះកំពុងមានតម្រូវការការងារខ្ពស់ ៕
អត្ថបទ ៖ លោក បុង ឆវ័ន
