លោក លី សំរិទ្ធ អភិបាលរងខេត្តសៀមរាប បានមានប្រសាសន៍ថា នៅព្រឹកថ្ងៃទី២៦ ខែឧសភា ឆ្នាំ២០២១នេះ គ្រួសារនៅសល់ចំនួន០៩គ្រួសារ ដែលបានរស់នៅលើទីតាំងដីរដ្ឋនៃដីចំណីផ្លូវអតីតប្រព័ន្ឋការពាររបស់ខេត្ត ស្ថិតក្នុងភូមិធ្លកអណ្តូង សង្កាត់ស្លក្រាម ក្រុងសៀមរាប ដែលបានប៉ះពាល់ និងប្រឈមជាមួយការដ្ឋានសំណង់ផ្លូវភ្លោះ EN 04 នៃគម្រោងសាងសង់ហេដ្ឋារចនាសម្ព័ន្ធផ្លូវ៣៨ខ្សែ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន ដើម្បីលើកកម្ពស់សោភ័ណភាពក្រុងសៀមរាបនោះ បានស្ម័គ្រចិត្តទទួលយកដំណោះស្រាយគោលនយោបាយរបស់រដ្ឋ ទៅរស់នៅលើទីតាំងដីឡូតិ៍ថ្មី ស្ថិតនៅតំបន់អភិវឌ្ឍន៍ភូមិធម្មជាតិរុនតាឯក ស្ថិតក្នុងភូមិតានី ឃុំរុនតាឯក ស្រុកបន្ទាយស្រី តាមរយៈនៃការចាប់ឆ្នោត និងផ្តិតមេដៃឯកភាពទទួលយកដីឡូតិ៍លំនៅឋានថ្មី ដែលរៀបចំឡើងដោយរដ្ឋបាលខេត្តសៀមរាប ។
លោក លី សំរិទ្ធ មានប្រសាសន៍ទៀតថា រយៈកាលកន្លងមក អ្នកដែលរស់នៅហើយបានប៉ះពាល់ដល់ការសាងសង់ហេដ្ឋារចនាសម្ព័ន្ធផ្លូវថ្នល់ចំនួន៣៨ខ្សៃនេះ មានចំនួន១៩គ្រួសារ ប៉ុន្តែកាលពីថ្ងៃទី២៥ ខែឧសភាម្សិលមិញនេះ មានគ្រួសារចំនួន១០ បានស្ម័គ្រចិត្តទទួលយកដំណោះស្រាយគោលនយោបាយរបស់រដ្ឋ តាមរយៈនៃការចាប់ឆ្នោតនិងផ្តិតមេដៃឯកភាព នៅសាលាខេត្តសៀមរាប ដូច្នេះសម្រាប់ពេលនេះ ការរុះរើលំនៅដ្ឋានប្រជាពលរដ្ឋដោយការបង្ខិតបង្ខំ និង ដោយការប្រើប្រាស់វិធានការរដ្ឋបាលនោះ ពុំមានភាពចាំបាច់ទៀតនោះឡើយ ដោយសារតែប្រជាពលរដ្ឋទាំងអស់ បានស្ម័គ្រចិត្តទទួលយកដំណោះស្រាយគោលនយោបាយរបស់រដ្ឋហើយ ហើយរដ្ឋបាលខេត្តបានសិក្សារួចហើយអំពីលទ្ធភាពនៃការធ្វើបន្លាស់ទីរបស់ពួកគាត់ ដែលក្រុមការងារបានដាក់កម្លាំងជួយរុះរើ និងដឹកជញ្ជូន ។
លោក លី សំរិទ្ធ មានប្រសាសន៍បន្ថែមថា អាជ្ញាធរខេត្តបានចាត់ទុកការស្ម័គ្រចិត្តចាប់ឆ្នោតដើម្បីយកទីតាំងថ្មីនិងរុះរើលំនៅឋានចាស់ដែលជាសំណង់ ស្ថិតនៅលើទីតាំងនៃដីផ្លូវអតីតប្រព័ន្ឋការពាររបស់ខេត្តនេះ គឺជាគំរូមួយក្នុងការចូលរួមអភិវឌ្ឍន៍ខេត្តសៀមរាប ដើម្បីលើកកម្ពស់សោភ័ណភាពក្រុងសៀមរាប ឱ្យស័ក្កិសមជាទីក្រុងវៃឆ្លាតនាពេលខាងមុខ ខណៈបច្ចុប្បន្នក្រុមការងារបាននឹងកំពុងសាងសង់ និងពង្រីកផ្លូវ នៃគម្រោងសាងសង់ហេដ្ឋារចនាសម្ព័ន្ធផ្លូវចំនួន៣៨ខ្សែ និង ការស្តារស្ទឹងសៀមរាប ដែលរយៈកាលកន្លងមក រដ្ឋបាលខេត្តសៀមរាប មិនបានចាត់ទុកថា ការតាំងលំនៅឋានរបស់ពួកគាត់ទាំងអស់គ្នានោះ ជាការរំលោភបំពានធ្ងន់ធ្ងរនោះទេ ដែលជានិច្ចកាលរដ្ឋបាលខេត្តតែងតែមានដំណោះស្រាយដោយឈរលើមូលដ្ឋានគតិយុត្តិ និងមនុស្សធម៌ ៕
អត្ថបទ និង រូបថត ៖ សហការី
កែសម្រួលអត្ថបទ ៖ លោក លីវ សាន្ត
