ប្រទាលកន្ទុយក្រពើ ឬហៅតាមភាសាបច្ចេកទេស អាឡូវេរ៉ា គឺជារុក្ខជាតិម្យ៉ាងដែលមានគុណប្រយោជន៍ល្បីល្បាញ និងពេញនិយមខ្លាំងណាស់ គឺគេយកវាទៅសម្រួលការឈឺចាប់ កន្ទួល ពង ជួយស្បែក និងសីររាង្គមិនឱ្យស្ងួត បំបាត់ការឡើងខ្លាញ់នៅសក់ជាដើម។ ប៉ុន្តែរុក្ខជាតិនេះមិនសូវមានអ្នកដាំធ្វើអាជីវកម្មនោះឡើយ ខណៈដែលបច្ចុប្បន្ននេះមានទីផ្សារខ្ពស់។
អ្នកស្រី ទូច ស្រីរ័ត្ន នៅភូមិខ្នារ សង្កាត់ជ្រាវ ក្រុងសៀមរាប បានឪ្យដឹងថា ប្រទាលកន្ទុយក្រពើ ជាប្រភេទរុក្ខជាតិងាយស្រួលដំា មិនថាមនុស្សវ័យចំណាស់ ឬមនុស្សពេញវ័យនោះទេ ពោលកសិករឬប្រជាពលរដ្ឋអាចប្រកបរបរនេះបានទាំងអស់ អោយតែមានមានដីជីវជាតិល្អ។ ក្នុងរយៈពេល៥ឆ្នាំមកនេះ រូបគាត់បានដាំដើមប្រទាលកន្ទុយក្រពើ៥ពាន់ដើម ដែលមកដល់បច្ចុប្បន្ននេះ អ្នកស្រី អាចរកចំណូលពីការលក់ដើមប្រទាលកន្ទុយក្រពើបានប្រមាណ៣ពាន់ដុល្លាក្នុងមួយខែ ។ អ្នកស្រីបានបន្ថែមទៀតថា ប្រទាលកន្ទុយក្រពើ ជាប្រភេទប្រទាលពូជធំ យកពីប្រទេសជប៉ុន ដោយមានទីផ្សារខ្ពស់គួរអោយកត់សំគាល់ក្នុងអំឡុងជំងឺកូវីដ-១៩។ ចំពោះការដាំកូនរបស់វាអាចប្រើពេលតែមួយឆ្នាំ ឬជាងមួយឆ្នាំ នឹងទទួលបានផល ដោយប្រើជីធម្មជាតិ មិនប្រើជីគីមី។
អ្នកស្រី ទូច ស្រីរ័ត្ន បានឲ្យដឹងទៀតថា បច្ចុប្បន្ននេះ អ្នកស្រីបានលក់ប្រទាលកន្ទុយក្រពើនេះ កាត់ជាធាង មួយគីឡូ៥ពាន់រៀល និងកូនតូចមួយដើម១ដុល្លារ និងដើមមានធុងស្រាប់២០ដុល្លាឡើងទៅតាមប្រភេទដើមមានកូនច្រើនឬតិច។ប្រទាល់កន្ទុយក្រពើនេះ ភាគច្រើនគេយកទៅប្រើប្រាស់ជាគ្រឿងសំអាង ភេសជ្ជៈ ឬធ្វើជាឱសថផ្សេងៗសម្រាប់ព្យាបាលជំងឺជាដើម។
អ្នកស្រីបានបន្ថែមថា គាត់បានបង្កើជាកសិដ្ឋានដាំប្រទាលកន្ទុយក្រពើនេះមានរយៈពេល៥ឆ្នាំមកហើយ ដែលដំបូងឡើងអ្នកស្រីយកប្រទាល់កន្ទុយក្រពើនេះ មកពីប្រទេសជប៉ុន ដើម្បីធ្វើជាឱសថព្យាបាលជំងឺរបស់អ្នកស្រីទេ ប៉ុន្ដែដោយសារមានជំនាញផ្នែកកសិកម្មផងនោះ អ្នកស្រីក៍សម្រេចចិត្ដដាំធ្វើជាមុខរបរតែម្ដង។ អ្នកស្រីថា ប្រទាលកន្ទុយក្រពើងាយស្រួលដាំអោយតែដីមានជីវជាតិជាប្រភេទដីល្បាយមិនដក់ទឹក។ មកដល់ពេលនេះមានក្រុមហ៊ុននៅក្រៅប្រទេស បញ្ជាទិញជាច្រើនតោនក្នុងមួយខែ ប៉ុន្ដែមិនទាន់មានលទ្ធភាពដាំដុះអោយគ្រប់គ្រាន់តាមតម្រូវការនៅឡើយ ដោយអ្នកស្រី កំពុងចងក្រងជាសមាជិកដាំដើមប្រទាលនេះអោយបានច្រើននាក់ ព្រមទាំងមានគម្រោងដាំជាច្រើនហិកតាបន្ថែមទៀតផងដែរ ដើម្បីផ្គត់ផ្គង់ទៅក្រៅប្រទេស៕
អត្ថបទ និង រូបភាព៖ ឈិត សាវី
កែសម្រួល៖ អ៊ុន ណារាជ្យ
