កាលពីថ្ងៃទី២៧ ខែឧសភា ឆ្នាំ២០២១ សមាគមកូរ៉េខេត្តសៀមរាប បាននាំអំណោយសប្បុរសធម៌ ជាជំនួយរបស់ សមាគមម្ហូបអាហារនៃសាធារណរដ្ឋកូរ៉េ ចែកជូនដល់ ប្រជាជនកូរ៉េ និងក្រុមគ្រួសារជាជនជាតិខ្មែររបស់ពួកគេ កំពុងរស់ និងប្រកបអាជីវកម្ម ក្នុងខេត្តសៀមរាប ដែលកំពុងជួបការលំបាក ក្នុងវិបត្តិជំងឺកូវីដ-១៩។
លោក ផាក វ៉ូ ស៊ុក ប្រធានសមាគមកូរ៉េប្រចាំខេត្តសៀមរាប តាមរយៈអ្នកបកប្រែ បញ្ជាក់ថា អំណោយសប្បុរសធម៌ នាពេលកន្លងមក រហូតមកដល់លើកទី៨នេះ រៀបចំឡើង ក្នុងគោលបំណងចែករំលែកទុក្ខលំបាក របស់ប្រជាជនកូរ៉េ និងក្រុមគ្រួសាររបស់ពួកគេ ក្នុងខេត្តសៀមរាប អំឡុងវិបត្តិជំងឺកូវីដ-១៩។ រយៈពេលពីរថ្ងៃ ចាប់ពីថ្ងៃទី២៦ ដល់ទី២៧ នេះ មានអ្នកមកទទួលអំណោយជាង១០០គ្រួសារហើយ។ អំណោយ ដែលមួយគ្រួសារទទួលបាន រួមមាន គ្រឿងឧបភោគបរិភោគ១កេះ និងសម្ភារៈប្រើប្រាស់មួយចំនួន។
ប្រធានសមាគមកូរ៉េប្រចាំខេត្តសៀមរាបរូបនេះ បញ្ជាក់បន្ថែមថា រយៈពេលពីរឆ្នាំមុន គេប៉ាន់ស្មានថាមានប្រជាជនកូរ៉េរស់នៅខេត្តសៀមរាបចំនួនជាង ១៣០០នាក់ ភាគច្រើនជាអ្នកប្រកបរបរក្នុងវិស័យទេសចរណ៍ ប៉ុន្តែដោយសារជំងឺកូវីដ-១៩ ពួកគេមានចំនួនប្រហែល ៥០០នាក់ប៉ុណ្ណោះ។ វិបត្តិជំងឺកូវីដ-១៩ រយៈពេលជិត ២ឆ្នាំនេះ ពួកគេមិនមានប្រាក់ចំណូលបាននោះទេ។ ទន្ទឹមនោះ សមាគមកូរ៉េប្រចាំខេត្តសៀមរាប គ្រោងនឹងបន្តរៀបចំយុទ្ធនាការសប្បុរសធម៌នេះបន្តទៀត ប្រសិនបើមានការគាំទ្រពីសប្បុរសជននៃសាធារណរដ្ឋកូរ៉េ និង អង្គការដៃគូ។
គួររំលឹកថា កាលពីឆ្នាំ២០១៤ ទេសចរជនជាតិកូរ៉េខាងត្បូង ឬសាធារណរដ្ឋកូរ៉េ បានមកទស្សនាប្រទេសកម្ពុជា មានចំនួនច្រើនជាង។ លុះដល់ឆ្នាំ២០១៥ ទេសចរជនជាតិចិន បានវ៉ាដាច់ និងឈរនៅចំណាត់ថ្នាក់លេខមួយ នេះបើតាមការឱ្យដឹងពីលោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប កាលពីខែសីហា ឆ្នាំ២០១៥។
អត្ថបទ និង រូបភាព៖ លោក ធន់ ពូថេ
កែសម្រួល៖ លោក សេង ផល្លី
