នៅព្រឹកថ្ងៃទី២៨ ខែឧសភា ឆ្នាំ២០២១ នេះ លោក ស៊ុ សំអន នាយកប្រតិបត្តិសាខាកាកបាទក្រហមកម្ពុជាខេត្ត តំណាងដ៏ខ្ពង់ខ្ពស់ឯកឧត្ដម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប និងសហការី បាននាំយកអំណោយមនុស្សធម៌ រួមមាន ៖ អង្ករ៤៥០គីឡូក្រាម , មី៩០កេស , ត្រីខ៩០យួរ , ទឹកបរិសុទ្ធ១១២កេស និងអាល់កុល១៥០លីត្រ ម៉ាស៣០កញ្ចប់ និងថវិកា៥លាន៨សែនរៀល ទៅឧបត្ថម្ភបន្ថែមដល់ក្រុមការងារត្រួតពិនិត្យសុខភាពបឋម នៅកំណាត់ផ្លូវជាតិលេខ៦ ក្នុងស្រុកក្រឡាញ់ ត្រង់ចំណុចព្រំប្រទល់ខេត្តសៀមរាប និងខេត្តបន្ទាយមានជ័យ ដើម្បីរួមគ្នាទប់ស្កាត់ជំងឺកូវីដ-១៩ ដែលអាចនឹងរាតត្បាតកាន់តែធំឡើងៗបើគ្មានវិធានការទប់ស្កាត់បានទានពេលវេលាទេនោះ ។
មានប្រសាសន៍នាឱកាសនោះ លោក ស៊ុ សំអន មានប្រសាសន៍ថា មានការយកចិត្តទុកដាក់ខ្ពស់ពីសំណាក់ឯកឧត្តម ទៀ សីហា ប្រធានគណៈកម្មាធិការសាខា បានចាត់រូបលោក នាំយកអំណោយមនុស្សធម៌មកឧបត្ថម្ភបន្ថែមដល់ក្រុមការងារត្រួតពិនិត្យសុខភាពបឋមនៅទីនេះ ព្រោះឯកឧត្ដមបានមើលឃើញពីតម្រូវការចាំបាច់របស់ក្រុមការងារប្រចាំការនៅទីនេះ ដោយចាប់តាំងពីព្រឹត្តិការណ៍២០កុម្ភៈ បានផ្ទុះឡើង យើងទាំងអស់គ្នាមានការព្រួយបារម្ភជាខ្លាំង អំពីលទ្ធភាពនៃការរីរាលដាលជាបន្តបន្ទាប់នៅក្នុងសហគមន៍ ហេតុនេះក្នុងនាមជាជំនួយការឱ្យអាជ្ញាធរសាធារណៈក្នុងវិស័យមនុស្សធមម៌ សាខាកាកបាទក្រហមកម្ពុជា ខេត្តសៀមរាប បានយកចិត្តទុក្ខជាចម្បងក្នុងការរួមចំណែកទប់ស្កាត់ការរីករាលដាលជំងឺកូវីដ-១៩នេះ ។
លោក ស៊ុ សំអន មានប្រសាសន៍ទៀតថា ក្នុងនាមឯកឧត្តម ទៀ សីហា សូមថ្លែងអំណរគុណ និងសូមសសើរចំពោះមន្ត្រី លោកគ្រូពេទ្យ អ្នកគ្រូពេទ្យ និងក្រុមការងារប្រចាំការនៅទីនេះ ដែលបានលះបង់អស់កម្លាំងកាយចិត្ត និងពេលវេលាផ្ទាល់ខ្លួន មិនថាយប់ មិនថាថ្ងៃ ខិតខំបំពេញការងារយ៉ាងសកម្ម ដើម្បីទប់ស្កាត់ជំងឺកូវីដ-១៩ កុំឱ្យរីករាលដាលកាន់តែធំឡើង និងដើម្បីឈានទៅគ្រប់គ្រងឱ្យបាននាពេលខាងមុខ ព្រោះយើងទាំងអស់គ្នាបានដឹងហើយថា នេះជាដំណាក់កាលដែលយើងទាំងអស់គ្នាត្រូវប្រុងប្រយ័ត្នខ្ពស់បំផុត ខណៈពេលសាខាបាននឹងកំពុងធ្វើការអប់រំផ្សព្វផ្សាយជាហូរហែទាំងនៅក្នុងសហគមន៍ និងនៅតាមគ្រឹះស្ថានសិក្សា ឲ្យអនុវត្តឲ្យបានខ្ជាប់ខ្ជួនតាមវិធានការរបស់ក្រសួងសុខាភិបាល និង វិធានការរបស់រាជរដ្ឋាភិបាល ៣ការពារ និង ៣កុំ ។
គួររំលឹកថា ក្នុងឱកាសនេះដែរ ជាមួយនឹងទឹកចិត្តមនុស្សធម៌ លោកជំទាវ ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប លោកជំទាវ បានរៀបចំដោយផ្ទាល់ដៃ នូវអាហារដ៏មានឱជារស សម្រាប់ក្រុមគ្រូពេទ្យ និងក្រុមការងារដែលកំពុងបំពេញបេសសកម្មនៅទីតាំងទាំងពីរខាងលើដោយមា្នក់ៗទទួលបានអាហារមួយកញ្ចប់ផងដែរ ៕
អត្ថបទ និង រូបថត ៖ សាខាកាកបាទក្រហមកម្ពុជាខេត្តសៀមរាប
កែសម្រួលអត្ថបទ ៖ លោក លីវ សាន្ត
