មន្រ្តីជំនាញ នៃមន្ទីរសុខាភិបាលខេត្តសៀមរាប ច្រានចោលព័ត៌មានមិនពិត ដែលបានចុះផ្សាយថា មានស្រ្តីអ្នកជម្ងឺម្នាក់ បានស្លាប់ក្រោយពេលលេបថ្នាំ ដែលផ្តល់ឲ្យដោយគ្រូពេទ្យ នៃមន្ទីរសម្រាកព្យាបាលឯកជនមួយនៅស្រុកពួក កាលពីថ្ងៃទី២៤ ខែឧសភា ឆ្នាំ២០២១។ កន្លងទៅថ្មីៗនេះ គេហទំព័រមួយមានអាសយដ្ឋាននៅខេត្តសៀមរាប និងទូរទស្សន៍ក្នុងស្រុកមួយ បានចុះផ្សាយដែលមានខ្លឹមសារ និងពាក្យពេចន៍ដូចគ្នាទាំងស្រុង ដោយដាក់ចំណងជើងថា ខេត្តសៀមរាបធ្លាយរឿងមិនប្រក្រតី ក្រោយគ្លីនិកឯកជនមួយឈ្មោះ ស៊ី អិល ស៊ី ផ្តល់ថ្នាំឲ្យអ្នកជម្ងឺលេប ហើយក៏បានដេកស្លាប់។
លោកស្រី លី វណ្ណ: ប្រធានការិយាល័យនិយ័តកម្ម និងឱសថ-គ្រឿងសំអាង របស់មន្ទីរសុខាភិបាលខេត្តសៀមរាប បញ្ជាក់ថាផ្អែកលើលទ្ធផល នៃការស្រាវជ្រាវ បានអះអាងថា ជនរងគ្រោះដែលបានស្លាប់នោះ ពុំបានលេបថ្នាំ ដែលពេទ្យបានផ្តល់ឲ្យនោះទេ។ លោកស្រីវាយតម្លៃថា ការចេញផ្សាយខាងលើ គឺស្ថិតក្នុងន័យចោទប្រកាន់ ធ្វើឲ្យប៉ះពាល់ដល់កិត្តិយសក្រុមការងារមន្ទីរសុខាភិបាលយ៉ាងធ្ងន់ធ្ងរបំផុត ដោយថាបានប្រព្រឹត្តិអំពើឃុបឃិតជាមួយម្ចាស់គ្លីនិក កសាងរបាយការណ៍កុហក ហើយលោកស្រីសូមច្រានចោលទាំងស្រុងនូវព័ត៌មានមិនពិតទាំងនោះ ដែលថា ស្រ្តីរងគ្រោះស្លាប់ដោយសារការលេបថ្នាំរបស់ពេទ្យ។ ដើម្បីបង្ហាញអំពីការពិត ព្រឹកថ្ងៃទី២៧ ខែឧសភា ឆ្នាំ២០២១ លោកស្រី លី វណ្ណ: និងក្រុមការងារ បានចុះទៅដល់មូលដ្ឋានជនរងគ្រោះដោយផ្ទាល់ ភូមិគោកដូង ឃុំត្រីញ័រ ស្រុកពួក និងបានជួបជាមួយលោកស្រី ឡាំ ស្រីល័ក្ខ ដែលត្រូវជាប្អូនថ្លៃរបស់ជនរងគ្រោះ ជាអ្នកជូនជនរងគ្រោះទៅបើកថ្នាំ ហើយក៏ជាអ្នកនៅជាមួយជនរងគ្រោះមុនការស្លាប់នោះផងដែរ។ បើតាមការផ្សាយព័ត៌មានមិនពិតនោះ បាននិយាយថា នៅថ្ងៃបើកថ្នាំនោះ ថ្ងៃទី២៣ ខែឧសភា ឆ្នាំ២០២១ វេលាម៉ោង៧យប់ ស្រ្តីរងបានលេបថ្នាំ ម៉ោង១១យប់ បែកគ្នាចូលដេក លុះដល់ម៉ោង៤ភ្លឺ ស្រ្តីរងគ្រោះបានស្លាប់។ ក្នុងសំណេររបស់អ្នកយកព័ត៌មាននេះ បានបញ្ចាក់ថា ព្រឹត្តិហេតុទាំងនេះ គឺសាច់ញាតិរបស់ជនរងគ្រោះជាអ្នកនិយាយប្រាប់។
លោកស្រី ឡាំ ស្រីល័ក្ខ ដែលជាប្អូនថ្លៃជនរងគ្រោះបានអះអាងថា បងថ្លៃស្រីរបស់ខ្លួន មិនបានស្លាប់ដោយសារលេបថ្នាំនោះទេ ការផ្សាយនោះខុសពីអ្វីដែលគាត់បានផ្តល់ចម្លើយហើយ ។
លោកស្រី លី វណ្ណ: ក៏បានអះអាងដែរថា ការស្រាវជ្រាវរបស់គាត់ពិតជាត្រឹមត្រូវ ព្រោះក្រោយពីការស្លាប់នៃជនរងគ្រោះ គាត់បានដឹកនាំក្រុមការងារ ពិនិត្យមើលភស្តុតាង គឺថ្នាំដែលពេទ្យបើកឲ្យជនរងគ្រោះនោះនៅសល់ទាំងអស់ មិនមានបាត់មួយគ្រាប់ណាឡើយ គឺមានន័យថា ជនរងគ្រោះពុំបានលេបថ្នាំនោះឡើយ។ បើតាមលិខិតបញ្ជាក់ អំពីការស្លាប់ដោយគ្រូពេទ្យកោសល្យវិច្ច័យ នៃមន្ទីរសុខាភិបាលខេត្ត បានឲ្យដឹងថា ជនរងគ្រោះឈ្មោះ ហ៊ាន់ ធន់ ភេទស្រី អាយុ៣០ឆ្នាំ ជាអ្នកជម្ងឺធ្លាប់ទទួលយកការព្យាបាលពីសំណាក់គ្លីនិកខាងលើនេះ។ បើកថ្នាំចុងក្រោយថ្ងៃទី២៣ ស្លាប់ព្រឹកថ្ងៃទី២៤ ខែឧសភា ឆ្នាំ២០២១។ លទ្ធផលធ្វើកោសល្យវិច្ច័យ ក្រោយការស្លាប់ គឺអវិជ្ជមានកូវីដ-១៩។ ការពិនិត្យឯកសារពុំមានអ្វីខុសបច្ចេកទេស នៃការព្យាបាលឡើយ ហើយបើយោងតាមការសាកសួរផងដែរ អ្នកជំនាញសន្និដ្ឋានបឋមថា ជនរងគ្រោះស្លាប់ដោយសារគាំងបេះដូង៕
អត្ថបទ និងរូបភាព៖ លោក ងិន គឹមឡេង
កែសម្រួល៖ លោក លីវ សុខុន
