ភ្ញៀវទេសចរណ៍ជាតិ និងអន្ដរជាតិកំពុងមានការចាប់អារម្មណ៍ និងមានទំនុកចិត្ដខ្ពស់ទៅលើអាជ្ញាធរជាតិអប្សរា ខណៈដែលពួកគាត់ទៅទស្សនារមណីយដ្ឋានអង្គរ នៅតំបន់ទេសចរណ៍ក្នុងអំឡុងពេលជំងឺកូវីដ-១៩។ ក្រោយពេលរាជរដ្ឋាភិបាលបានបើកឲ្យចូលទ្សនានៅតំបន់ទេសចរណ៍ឡើងវិញ នៅទូទាំងប្រទេសនាពេលកន្លងមកនេះ ភ្ញៀវទេសចរជាតិបានទៅទៅទស្សនាប្រសាទអង្គរវត្ដមានកំណើនឡើងវិញ ដោយក្នុងមួយថ្ងៃពី៣រយនាក់ទៅ៤រយនាក់ ជាពិសេសនៅថ្ងៃសៅរិ៍និងអាទិត្យប្រមាណ៥រយនាក់ ចំណែកភ្ញៀវអន្ដរជាតិមានចាប់ពី៥នាក់ ទៅ២០នាក់សម្រាប់ថ្ងៃឈប់សម្រាក។ នេះបើតាមការបញ្ជាក់ពីលោក ឡេក គឹមលីន អនុប្រធានភ្នាក់ងារទេសចរណ៍ក្នុងតំបន់អង្គរវត្ដ។
លោក ឡេក គឹមលីន បន្ថែមថា ភ្ញៀវទេសចរដែលនៅក្នុងខេត្ដភាគច្រើនពួកាត់គាត់ទៅលេងនៅទីធ្លាខាងមុខអង្គរវត្ដ និងជិះកង់ហាត់ប្រាណពេលល្ងាច ខណៈដែលអាជ្ញាធរជាតិអប្សរា មានការរៀបចំសោភ័ណ្ឌភាពស្រស់ស្អាតនៅទីនោះ រីឯភ្ញៀវទេសចរមកពីតាមខេត្ដផ្សេងៗទៅទស្សនារមណីយដ្ឋានអង្គរធម្មតា។លោកបានបន្ដថា ក្រោយឃើញមានកំណើនភ្ញៀវឡើងវិញនេះ អាជ្ញាធរជាតិបានរៀបចំអោយមានវិធានការពារនៃការឆ្លងជំងឺកូវីដ១៩យ៉ាងយកចិត្ដទុកដាក់បំផុត ដោយមានម៉ាស៊ីនវាស់កំដៅ បាញ់អាកុល ស្គែនឃ្យូអ័រកូដ ដើម្បីធ្វើយ៉ាងណាអោយមានទំនុកចិត្ដពីភ្ញៀវទេសចរ។
ភ្ញៀវទេសចរណ៍ពីខេត្ដបាត់ដំបង និងខេត្ដសៀមរាប បានលើកឡើងថា ការធ្វើទេសចរណ៍ក្នុងពេលមានជំងឺកូវីដ១៩កំពុងរាដាលនេះ ដោយសារតែពួកគាត់នៅចង់ឃើញនិងចង់ស្គាល់ពីទិដ្ឋភាពប្រាសាទអង្គរ បើទោះបីពួកគេធ្លាប់បានទៅទស្សរួចហើយក្ដី ហើយការទៅទស្សនាប្រាសាទអង្គរ ក៍បានមានវិធានការការពារពីឆ្លងជំងឺកូវីដ១៩នេះផងដែរ។ពួកគាត់បានបន្ដថា ក្នុងនាមជាកូនខ្មែរ មិនអាចមិនឃើញប្រាសាទអង្គរវត្ដនោះឡើយ។ក្រោយពីការទស្សនាហើយនោះ ពួកគាត់បានកោតសសើរពីការរៀបចំបរិស្ថានអង្គរបានល្អប្រសើរផងដែរ។
ប៉ុន្ដែទោះជាយ៉ាងណា ដើម្បីទប់ស្កាត់ការឆ្លងរាលដាលជាសាកលនៃជំងឺកូវីដ១៩ ជានិច្ចកាលអាជ្ញាធរជាតិអប្សរាបានដាក់ចេញវិធានការសម្រាប់មន្ត្រី ភ្នាក់ងារបំពេញកិច្ចការតាមប្រាង្គប្រាសាទទាំងអស់ ត្រូវអនុវត្តន៍ជាប្រចាំនូវវិធានការ ៣កុំ និង៣ការពារឱ្យបានជាប់ជាប្រចាំ។ ភ្ញៀវទេសចរមុនពេលចូលទស្សនាប្រាសាទគឺ តម្រូវឱ្យពាក់ម៉ាស់ លាងសម្អាតដៃជាមួយអាល់កុល និងស្គេនកម្មវិធីQR Code ដើម្បីចូលរួមតាមដាននិងទប់ស្កាត់ ការចម្លងមេរោគកូវីដ-១៩។ ជាពិសេសមិនឱ្យមានការប្រមូលផ្តុំ និងត្រូវដើរឬក៏ឈរដោយរក្សាគម្លាតឆ្ងាយៗពីគ្នា។
សូមជម្រាបថា អាជ្ញាធរជាតិអប្សរា និងគ្រឹះស្ថានអង្គរកាលពីថ្ងៃទី២៥ ខែមេសាឆ្នាំ២០២១កន្លងមក បានចេញសេចក្តីជូនដំណឹងរួមគ្នា ឲ្យបើកការចូលទស្សនាប្រាសាទនានា និងលក់សំបុត្រចូលទស្សនារមណីយដ្ឋានអង្គរឡើវិញ បន្ទាប់ពីសម្តេចតេជោហ៊ុន សែន នាយករដ្ឋមន្ត្រី បានចេញសេចក្តីសម្រេចឲ្យបញ្ចប់ការហាមឃាត់ការធ្វើដំណើរ និងបញ្ចប់ការបិទរមណីយដ្ឋានទេសចរណ៍នៅទូទាំងប្រទេស។អាជ្ញាធរជាតិអប្សរារំពឹងថា នឹងមានភ្ញៀវទេសចរណ៍ទៅទស្សនាកាន់តែច្រើនទៀត ក្រោយពេលបើកដំណើរការឡើងវិញនាពេលនេះ៕
អត្ថបទ និង រូបភាព៖ លោក ឈិត សាវី
