ទេយ្យទាន ជាគ្រឿងឧបភោគបរិភោគ និង សម្ភារប្រើប្រាស់ ដែលជាអំណោយរបស់រដ្ឋបាលខេត្តសៀមរាប និងសភាពសហព័ន្ធយុវជនកម្ពុជាខេត្ត ត្រូវបាននាំយកទៅវេប្រគេនព្រះសង្ឃ ចំនួន០៣វត្ត ក្នុងឃុំចាន់សរ និងឃុំតាយ៉ែក នៃស្រុកសូទ្រនិគម ដែលជួបនូវការខ្វះខាតក្នុងបរិបទជំងឺកូវីដ-១៩ នៅថ្ងៃទី២៣ ខែឧសភា ឆ្នាំ២០២១ ក្រោមវត្តមានលោកស្រី យូ សុភា អភិបាលរងខេត្តសៀមរាប ដោយមានការអញ្ជើញចូលរួមពីសំណាក់ ឯកឧត្តមជាសមាជិក ក្រុមប្រឹក្សាខេត្ត អស់លោក លោកស្រីជាក្រុមការងារខេត្តចុះជួយស្រុក ថ្នាក់ដឹកនាំមន្ទីរ អាជ្ញាធរស្រុក និងសហភាពសហព័ន្ធយុវជនកម្ពុជាស្រុកផងដែរ។
ក្នុងនាមឯកឧត្តម ទៀ សីហា លោកស្រី យូ សុភា បានគូសបញ្ជាក់ថា ក្នុងពេលដែលនៅលើពិភពលោកក៏ដូចនៅកម្ពុជាបានកំពុងជួបនូវវិបត្តិជំងឺកូវីដ-១៩ បានធ្វើឲ្យប៉ះពាល់យ៉ាងខ្លាំងដល់វិស័យសេដ្ឋកិច្ច សំខាន់ជីវភាពប្រចាំថ្ងៃរបស់ប្រជាពលរដ្ឋ ក៏ដូចព្រះសង្ឃនៅតាមទីវត្តអារាមដាច់ស្រយាលក្នុងខេត្តសៀមរាប ។ ដោយមើលឃើញពីបញ្ហាទាំងនេះហើយបានជាប្រមុខរាជរដ្ឋាភិបាលកម្ពុជា ក្រោមកិច្ចដឹកនាំរបស់សម្តេចតេជោ ហ៊ុន សែន ក៏ដូចរដ្ឋបាលខេត្ត និងក្រុមការងាររាជរដ្ឋាភិបាលចុះជួយស្រុក បានយកចិត្តទុកដាក់ខ្ពស់ ក្នុងការចូលរួមប្រយុទ្ធប្រឆាំងបង្ការទប់ស្កាត់ជំងឺកូវីដ-១៩ កុំឲ្យមានការឆ្លងរាលដាលជាសហគមន៍ ។
លោកស្រីអភិបាលរងខេត្ត ក៏បានបញ្ជាក់បន្ថែមថា ដោយមានការចូលរួមសហការរបស់បងប្អូនប្រជាពលរដ្ឋ ដែលប៉ុន្មានថ្ងៃចុងក្រោយនេះឃើញថា កម្ពុជាកាត់បន្ថយបាននូវចំនួនឆ្លងកូវីដ-១៩ ហើយចំនួននៃអ្នកជាសះស្បើយក៏បានបង្ហាញនៅក្នុងតារាងតួរលេខប្រចាំថ្ងៃ ដែលនេះ គឺជាមោទនភាពរបស់កម្ពុជា សម្រាប់កាត់ផ្តាច់ព្រឹត្តិការណ៍សហគមន៍ ២០ កុម្ភះ ២០២១ ក្នុងការព្យាបាលមុខរបួសនៃវិបត្តិកូវីដ-១៩ សំដៅឆ្ពោះទៅរកការងើបឈរឡើងវិញនៃកំណើនសេដ្ឋកិច្ចកម្ពុជា ក្រោមការត្រៀមទុកដោយយន្តការនៃយុទ្ធសាស្រ្តកែប្រែវិបត្តិកូវីដ ឲ្យក្លាយជាឳកាសនៃការអភិវឌ្ឍន៍ និង រស់នៅតាមគន្លងថ្មី ក្រោយពីការបញ្ចប់នៃជំងឺកូវីដ-១៩ ។ ក្នុងនោះដែរលោកស្រី ក៏បានសំណូមពរដល់ព្រះសង្ឃគ្រប់វត្ត ក៏ដូចអាជ្ញាធរឃុំ ភូមិ បង្កើនការយកចិត្តអប់រំ ផ្សព្វផ្សាយបន្តដល់ប្រជាពុទ្ធបរិស័ទ ពីវិធានការរបស់រាជរដ្ឋាភិបាល ៣កុំ ៣ការពារ និង ២ចូលរួម និងសេចក្តីណែនាំ វិធានការរបស់ក្រសួងសុខាភិបាល ពីព្រោះថា កូវិដវាមិនភ្លេចយើងទេ មានតែយើងទេភ្លេចកូវិដ ។
សូមជម្រាបជូនថា វត្តដែលជួបនូវការខ្វះខាតទាំង៣ ក្នុងនោះរួមមាន វត្តកន្សែងសារពេជ្រ និងវត្តចាន់សីម៉ា ស្ថិតក្នុងឃុំចាន់សរ និងវត្តប្រសូត្ររងី្សជប់ស្មាច់ ស្ថិតក្នុងឃុំតាយ៉ែក។ ក្នុងនោះទេយ្យទាន គ្រឿងឧបភោគបរិភោគ និង សម្ភារៈ រួមទាំងបច្ចយ័ដែលបានវេរប្រគេននាឱកាសនោះដែរក្នុងមួយវត្តទទួលបាន៖ អង្ករពី ២៥០ ទៅ ៣០០គីឡូក្រាម , មី ,ទឹកសុទ្ធ ,ទឹកត្រី ,ទឹកស៊ីអ៊ីវ , ត្រីខ , ស្ករស ,ទឹកដោះគោ ,ភេសជ្ជៈ ,អាល់កុល ជាដើម និងបច្ច័យ២លាន ៩សែន ៥ម៉ឺនរៀលផងដែរ ៕
