ព្រឹកថ្ងៃទី ២២ ខែ ឧសភា ឆ្នាំ២០២១ លោ ពៅ ពិសិដ្ឋ អភិបាលរងខេត្ត រួមដំណើរដោយអស់លោក លោកស្រីជាក្រុមការងាររាជរដ្ឋាភិបាលចុះជួយស្រុក ថ្នាក់ដឹកនាំមន្ទីរ អាជ្ញាធរស្រុក និងសហភាពសហព័ន្ធយុវជនកម្ពុជាខេត្ត បាននាំយកបិណ្ឌបាតទានមួយចំនួនប្រគេនចំពោះព្រះសង្ឃ ដែលគង់នៅតាមទីអារាមមួយចំនួនក្នុងស្រុកស្វាយលើ ដែលកំពុងជួបបញ្ហាខ្វះខាតភោជនភណ្ឌ ដោយសារតែវិបត្តិកូវីដ-១៩ ក្នុងនោះមានវត្តព្រៃល្ងៀង ស្ថិតក្នុងឃុំកន្ទួត ,វត្តសាមគ្គីមានជ័យ ក្នុងឃុំតាសៀម និងអាស្រមតាអែវ ស្ថិតក្នុងឃុំខ្នងភ្នំ ដោយទេយ្យទានជាគ្រឿងឧបភោគបរិភោគ និងសម្ភារៈដែរបានវេរប្រគេនក្នុងមួយវត្តទទួលបាន៖ អង្ករចាប់ពី ២៥០គីឡូក្រាម ដល់ ៣០០គីឡូក្រាម រួមមាន មី ,ទឹកសុទ្ធ ,ទឹកត្រី ,ទឹកស៊ីអ៊ីវ ,ត្រីខ ,ស្ករស ,ទឹកដោះគោ ភេសជ្ជៈមួយចំនួន ,អាល់កុល និងបច្ច័យ ២លានរៀលផងដែរ។
មានប្រសាសន៍ក្នុងឱកាសនោះលោក ពៅ ពិសិដ្ឋ បានគូសបញ្ជាក់ថា ក្នុងពេលដែលនៅលើពិភពលោក ក៏ដូចនៅកម្ពុជាបានកំពុងជួបនូវវិបត្តិជំងឺកូវីដ-១៩ បានធ្វើឲ្យប៉ះពាល់យ៉ាងខ្លាំងដល់វិស័យសេដ្ឋកិច្ច សំខាន់ជីវភាពប្រចាំថ្ងៃរបស់ប្រជាពលរដ្ឋ ក៏ដូចព្រះសង្ឃនៅតាមទីវត្តអារាមដាច់ស្រយាលផងដែរ ។ ដោយបញ្ហានេះហើយប្រមុខរាជរដ្ឋាភិបាល ក្រោមកិច្ចដឹកនាំរបស់សម្តេចតេជោ ហ៊ុន សែន ក៏ដូចរដ្ឋបាលខេត្ត និង ក្រុមការងាររាជរដ្ឋាភិបាលចុះជួយស្រុក បានយកចិត្តទុកដាក់ខ្ពស់ ក្នុងការចូលរួមប្រយុទ្ធប្រឆាំងបង្ការទប់ស្កាត់ជំងឺកូវីដ-១៩ កុំឲ្យមានការឆ្លងរាលដាលជាសហគមន៍។ ក្រៅពីប្រជាពលរដ្ឋជួបការខ្វះខាត អាជ្ញាធរខេត្តតែងតែគិតដល់តាមទីវត្តអារាប ដែលមានស្រុកចំនួន១១ មានវត្តចំនួន៣០វត្ត និងអាស្រមចំនួន៦ ទូទាំងខេត្ត ដែលជួបនូវការខ្វះខាត នូវទ័យ្យទាន គ្រឿងឧបភោគបរិភោព្រមទាំងសម្ភារៈប្រើប្រាស់ក្នុងបរិបទនៃជំងឺកូវីដ-១៩នេះ។
អភិបាលរងខេត្ត មានប្រសាសន៍ទៀតថា ដោយមានការចូលរួមសហការរបស់បងប្អូនប្រជាពលរដ្ឋ ដែលប៉ុន្មានថ្ងៃចុងក្រោយនេះ ឃើញថា កម្ពុជាកាត់បន្ថយបាននូវចំនួនឆ្លងកូវីដ១៩ ហើយចំនួននៃអ្នកជាសះស្បើយ ក៏បានបង្ហាញនៅក្នុងតារាងតួរលេខប្រចាំថ្ងៃផងដែរ ដែលនេះគឺជាមោទនភាពរបស់កម្ពុជា សម្រាប់កាត់ផ្តាច់ព្រឹត្តិការណ៍សហគមន៍២០កុម្ផៈ២០២១ ក្នុងការព្យាបាលមុខរបួសនៃវិបត្តិជំងឺកូវីដ-១៩ សំដៅឆ្ពោះទៅរកការងើបឈរឡើងវិញនៃកំណើនសេដ្ឋកិច្ចកម្ពុជា ក្រោមការត្រៀមទុកដោយយន្តការនៃយុទ្ធសាស្រ្តកែប្រែវិបត្តិកូវីដ ឲ្យក្លាយជាឳកាសនៃការអភិវឌ្ឍន៍ និង ឲ្យមានការរស់នៅតាមគន្លងថ្មី ក្រោយពីការបញ្ចប់នៃជំងឺកូវីដ-១៩។ ក្នុងនោះដែរលោក ក៏បានសំណូមពរដល់ព្រះសង្ឃគ្រប់វត្ត/អាស្រម ក៏ដូចអាជ្ញាធរឃុំ ភូមិ បង្កើនការយកចិត្តអប់រំ ផ្សព្វផ្សាយបន្តដល់ប្រជាពុទ្ធបរិស័ទ ពីវិធានការរបស់រាជរដ្ឋាភិបាល ៣កុំ ៣ការពារ និង ២ចូលរួម និង សេចក្តីណែនាំ វិធានការរបស់ក្រសួងសុខាភិបាល ពីព្រោះថា កូវីដវាមិនភ្លេចយើងទេ មានតែយើងទេភ្លេចកូវីដ៕
អត្ថបទ និង រូបភាព៖ ម៉ី សុខារិទ្ធ
កែសម្រួល៖ អ៊ុន ណារាជ្យ
