នៅព្រឹកថ្ងៃទី២៤ ខែឧសភា ឆ្នាំ២០២១នេះ លោក នាក់ ណេរ៉ុន អភិបាលរង នៃគណៈអភិបាលខេត្តសៀមរាប រួមដំណើរដោយអស់លោក លោកស្រី ជាថ្នាក់ដឹកនាំមន្ទីរ-អង្គភាព អាជ្ញាធរស្រុក និងសហភាពសហព័ន្ធយុវជនកម្ពុជាខេត្ត និង ស្រុក បាននាំយកទេយ្យវត្ថុ ជាគ្រឿងឧបភោគបរិភោគ បច្ច័យ និងសម្ភារប្រើប្រាស់ រួមមាន ៖ អង្ករ ២០០គីឡូក្រាម , មី ១០កេស ,ទឹកសុទ្ធ៥កេស ,ទឹកត្រី ៥កេស,ទឹកស៊ីអ៊ីវ ៥កេស , ត្រីខ ២កេស , ស្ករស ,ទឹកដោះគោ ភេសជ្ជៈ អាកុល និង បច្ច័យ ២លានរៀល សម្រាប់វត្តនីមួយៗ ដែលជាអំណោយរបស់រដ្ឋបាលខេត្តសៀមរាប ប្រគេនដល់ព្រះសង្ឃចំនួន ០៤វត្តនៅស្រុកស្រីស្នំ ដែលជួបប្រទះនូវការខ្វះខាត ក្នុងបរិបថជំងឺកូវីដ-១៩ ក្នុងនោះនៅឃុំស្លែងស្ពាន មានវត្តសុវណ្ណគិរីកេសរត្រោះ និង វត្តកោះអារញ្ញបុរីសែនសុខ , ក្នុងឃុំត្រាំសសរ មានវត្តចន្ទរង្សីពង្រ និង ក្នុងឃុំក្លាំងហាយ មានវត្តពោធិល្បើក ដែលពិធីនេះបានប្រារព្ធឡើងនៅក្នុងបរិវេណវត្តសុវណ្ណគិរីកេសរត្រោះ ។
មានប្រសាសន៍សំណេះសំណាលក្នុងឱកាសនេះ លោក នាក់ ណេរ៉ុន បានបញ្ជាក់ថា ដោយមានការយកចិត្តទុកដាក់ពីសំណាក់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ក្នុងបរិបថនៃជំងឺកូវីដ-១៩ មិនត្រឹមតែប្រជាពលរដ្ឋនោះទេ សូម្បីតែព្រះសង្ឃក៏ជួបប្រទះនូវការលំបាកខ្វះខាតផងដែរ ព្រោះចង្ហាន់បិណ្ឌបាត្ររបស់ព្រះសង្ឃ អាស្រ័យលើប្រជាពលរដ្ឋ ហេតុនេះហើយ ឯកឧត្តម អភិបាលខេត្ត បានរៀបចំកម្មវិធីប្រគេនទេយ្យវត្ថុសម្រាប់វត្តចំនួន៣០ និងអាស្រមចំនួន៦ ដែលជួបការលំបាកខ្លាំង ស្ថិតនៅតាមបណ្តាមូលដ្ឋានស្រុកទាំង១១ទូទាំងខេត្ត លើកលែងតែក្រុងសៀមរាប ដែលទេយ្យវត្ថុរួមមាន ៖ អង្ករចាប់ពី ២០០គីឡូក្រាម ដល់ ៣០០គីឡូក្រាម អាស្រ័យលើចំនួនព្រះសង្ឃ និងតាជី-យាយជី ក្រៅពីនេះមាន មី ១០កេស ,ទឹកសុទ្ធ៥កេស ,ទឹកត្រី ៥កេស,ទឹកស៊ីអ៊ីវ ៥កេស , ត្រីខ ២កេស , ស្ករស ,ទឹកដោះគោ ភេសជ្ជៈ អាកុល និង បច្ច័យ ២លានរៀល សម្រាប់វត្តនីមួយៗ ។
លោកអភិបាលរងខេត្តសៀមរាប បានមានប្រសាសន៍ទៀតថា ការឆ្លងរាលដាលនៃជំងឺកូវីដ-១៩មិនទាន់ថមថយខ្លាំងនោះទេ ហើយកន្លងមករាជភ្នំពេញ ខេត្តកណ្ដាល និង ខេត្តព្រះសីហនុ ដែលធ្លាប់តែមានការកើនឡើងនៃជំងឺកូវីដ-១៩នោះ បច្ចប្បន្ននេះ ខេត្តជិតខាងមួយចំនួននៃខេត្តសៀមរាបរបស់យើង ក៏មានការឆ្លងកើនឡើងជាបន្តបន្ទាប់ជារៀងរាល់ថ្ងៃផងដែរ ហើយបើទោះបីជាមានការខិតខំប្រឹងប្រែងរបស់រដ្ឋបាលខេត្តយ៉ាងណាក៏ដោយ ក៏បញ្ហានេះនៅតែកើតមាននៅក្នុងខេត្តរបស់យើងដែរ ដូច្នេះបញ្ហាសំខាន់គឺការចូលរួមរបស់ប្រជាពលរដ្ឋ ហើយសម្រាប់យើងជាអាជ្ញាធរមូលដ្ឋាន គឺត្រូវចុះឲ្យបានជាប់ជាប្រចាំទៅដល់លំនៅដ្ឋានប្រជាពលរដ្ឋ ដោយពន្យល់ណែនាំគាត់ឲ្យបានយល់ដឹងកាន់តែច្បាស់អំពីវិធានការការពារជំងឺកូវីដ-១៩ ក្នុងនោះវិធានការរបស់រាជរដ្ឋាភិបាលកម្ពុជា ៣ការពារ និង ៣កុំ ។
ក្នុងឱកាសនោះដែរ លោក នាក់ ណេរ៉ុន អភិបាលរងខេត្តសៀមរាប បានធ្វើការក្រើនរំលឹកដល់រដ្ឋបាលស្រុក និង មេឃុំគ្រប់ឃុំក្នុងទូទាំងស្រុកស្រីស្នំ ត្រូវបន្តការតាមដានដោយយកចិត្តទុកដាក់ខ្ពស់ ចំពោះប្រជាពលរដ្ឋចំណូលថ្មី ជាពិសេសដែលពួកគាត់មកពីតំបន់ដែលមានហានីភ័យខ្ពស់ ទោះក្នុងរូបភាពជាសាច់ញាតិ និង មិត្តភក្ដិក៏ដោយ ក៏ត្រូវណែនាំអប់រំគាត់ អំពីការរស់នៅដាច់ដោយរយៈពេល១៤ថ្ងៃ ឬក៏ឲ្យគាត់មកធ្វើចត្តាឡីស័ក នៅមណ្ឌលចត្តាឡីស័កដោយស័្មគ្រចិត្ត ព្រោះថាបើគាត់រស់នៅក្នុងភូមិ ហើយមានវិជ្ជមានជំងឺកូវីដ-១៩នោះ ភូមិនោះនឹងប្រឈមការបិទខ្ទប់ ដូចនេះ វានឹងធ្វើឲ្យប៉ះពាល់ដល់ជីវភាពរស់នៅប្រចាំថ្ងៃរបស់ពួកគាត់មិនខានឡើយ ពិសេសសំណូមពរដល់ព្រះចៅអធិការគ្រប់វត្តទាំងអស់ក្នុងស្រុកស្រីស្នំ សុំជួយផ្សព្វផ្សាយបន្តដល់ប្រជាពុទ្ធបរិស័ទ ពីវិធានការរបស់រាជរដ្ឋាភិបាល និង សេចក្តីណែនាំនានាពីវិធានការការពាររបស់ក្រសួងសុខាភិបាល ៕
អត្ថបទ ៖ លោក លីវ សាន្ត
រូបភាព៖ លោក ខេង ឧត្ដម
