នាព្រឹកថ្ងៃទី២០ ខែឧសភា ឆ្នាំ២០២១ លោកស្រី យូ សុភា អភិបាលរងខេត្តសៀមរាប មន្រ្តីរាជការ ក្រុមការងារនៃសហភាពសហព័ន្ធយុវជនកម្ពុជាខេត្ត បាននាំយកបិណ្ឌបាតទានមួយចំនួន ជាអំណោយប្រកបដោយសេចក្តីសង្គ្រោះ ប្រគេនចំពោះព្រះសង្ឃដែលកំពុងជួបបញ្ហាខ្វះខាតភោជនភណ្ឌ ដោយសារតែវិបត្តិជំងឺកូវីដ-១៩ នៅវត្តព្រៃព្រះ ស្ថិតក្នុងភូមិពាក់ស្នែងថ្មី ឃុំពាក់ស្នែង ស្រុកអង្គធំ ដែលមានព្រះសង្ឃនិមន្តមកពីបណ្តាវត្តចំនួន២ និងអាស្រមមួយផ្សេងទៀត គឺវត្តអភ័យវន្តព្រះអង្គចែង នៅឃុំពាក់ស្នែង វត្តព្រះពុទ្ធពោធិរៀង នៅភូមិកំពង់ទឹក និងអាស្រមគិរីកង្រី នៅភូមិជប់ ឃុំជប់តាត្រាវ ។
លោកស្រី យូ សុភា មានប្រសាសន៍ថា ក្រោមខិតខំប្រឹងប្រែងរបស់ប្រមុខនៃរាជរាជរដ្ឋាភិបាល ស្ថាប័នជំនាញពាក់ព័ន្ធ ការលះបង់របស់កងទ័ពអាវសជួរមុខ អាជ្ញាធរដែនដី រួមទាំងការចូលរួមសហការដោយប្រជាពលរដ្ឋ ប៉ុន្មានថ្ងៃចុងក្រោយនេះ ឃើញថាកម្ពុជាកាត់បន្ថយបាននូវចំនួនឆ្លងកូវីដ-១៩ ហើយចំនួននៃអ្នកជាសះស្បើយ ក៏បានបង្ហាញនៅក្នុងតារាងតួរលេខប្រចាំថ្ងៃ ដែលនេះគឺជាមោទនភាពរបស់កម្ពុជា សម្រាប់កាត់ផ្តាច់ព្រឹត្តិការណ៍សហគមន៍២០ កុម្ភៈ ២០២១ ព្យាបាលមុខរបួសនៃវិបត្តិកូវីដ-១៩ សំដៅឆ្ពោះទៅរកការងើបឈរឡើងវិញនៃកំណើនសេដ្ឋកិច្ចកម្ពុជា ក្រោមការត្រៀមទុកដោយយន្តការនៃយុទ្ធសាស្រ្ត កែប្រែវិបត្តិកូវីដឲ្យក្លាយជាឳកាសនៃការអភិវឌ្ឍន៍ ក្នុងនេះគម្រោងសាងសង់ផ្លូវ៣៨ខ្សែ នៅក្រុងសៀមរាប កំពុងដំណើរការអនុវត្ត។
គួរបញ្ជាក់ដែរថា កម្មវិធីប្រគេនទេយ្យទាន មានចង្ហាន់បិណ្ឌបាតជាដើមនេះ ត្រូវបានរដ្ឋបាលខេត្តបានរៀបចំឡើងសម្រាប់បណ្តាវត្តចំនួន៣០ និងទីអាស្រមចំនួន៦ ដែលជួបការលំបាកខ្លាំង ស្ថិតនៅតាមបណ្តាមូលដ្ឋានស្រុកទាំង១១ទូទាំងខេត្ត លើកលែងតែក្រុងសៀមរាប។ ពិធីវេរប្រគេនចំពោះព្រះសង្ឃនូវបិណ្ឌបាតទាននៅវត្តព្រៃព្រះ រួមមានវត្តចំនួន៣ និងអាស្រមចំនួន១ផ្សេងទៀត បានទទួលភោជនភ័ស្តុ ហើយនេះ គឺជាជំហានទី២ហើយ បន្ទាប់ពីធីវេរប្រគេននេះ បានធ្វើនៅស្រុកក្រឡាញ់កន្លងមក។ កម្មវិធីនេះ នឹងត្រូវធ្វើជាបន្តបន្ទាប់ទៀត រហូតដល់ចប់កម្មវិធីដែលបានគ្រោងទុក។ បិណ្ឌបាតទានទាំងនោះ សម្រាប់ទីរាម ឬសម្រាប់ទីអាស្រមនីមួយៗ រួមមាន អង្ករចាប់ពី ២០០គីឡូក្រាម ដល់ ២៥០គីឡូក្រាម អាស្រ័យលើចំនួនព្រះសង្ឃ និងតាជី-យាយជី ក្រៅពីនេះមាន មី ទឹកសុទ្ធ ទឹកត្រី ទឹកស៊ីអ៊ីវ ត្រីខ ស្ករ ស ទឹកដោះគោ ភេសជ្ជៈ អាកុល និងបច្ច័យចំនួន ២លានរៀល៕
អត្ថបទ និង រូបភាព៖ ងិន គីមឡេង
កែសម្រួល៖ អ៊ុន ណារាជ្យ
