កាលពីថ្ងៃទី១៨ ខែឧសភា ឆ្នាំ២០២១ម្សិលមិញនេះ សាខាកាកបាទក្រហមកម្ពុជាខេត្តសៀមរាប ដឹកនាំដោយឯកឧត្ដម គុជ លីណា អនុប្រធានគណៈកម្មាធិការសាខា និងសហការី បាននាំយកអំណោយមនុស្សធម៌របស់សាខា ទៅចែកជូនដល់ប្រជាពលរដ្ឋចំនួន១៨គ្រួសារ នៅក្នុងឃុំតាសៀម ស្រុកស្វាយលើ ដែលលំនៅឋានពួកគាត់រងគ្រោះដោយខ្យល់កន្ត្រាក់ ក្នុងនោះ មានផ្ទះរលំចំនួន ០៦ខ្នង ក្នុងមួយគ្រួសារទទួលបាន ៖ មុង១ ,ភួយ១ ,សារុង១ ,ក្រមា១ ,កន្ទេល១ ,អាវយឺត២ ,ស័ង្កសី ១៦សន្លឹក ,មី១កេស ,ទឹកស៊ីអ៊ីវ ១យួរ ,ត្រីខ១យួរ ,អង្ករ៣០គីឡូក្រាម ,ថវិកា ២០ម៉ឺនរៀល និងរបើកដំបូលផ្ទះចំនួន ១២ខ្នង ក្នុងមួយគ្រួសារទទួលបាន ៖ មុង១ ,ភួយ១ ,សារុង១ ,ក្រមា១ ,កន្ទេល១ ,អាវយឺត២ ,ស័ង្កសី ១០សន្លឹក ,មី១កេស ,ទឹកស៊ីអ៊ីវ ១យួរ ,ត្រីខ១យួរ ,អង្ករ៣០គីឡូក្រាម , ថវិកា ៨ម៉ឺន រៀល ។
មានប្រសាសន៍នាឱកាសនោះ ឯកឧត្ដម គុជ លីណា អនុប្រធាន គណៈកម្មាធិការ សាខា បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប ដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ។
ឯកឧត្តមមានប្រសាសន៍បន្តថា ថ្វីត្បិតតែអំណោយមនុស្សធម៌ដែលបាននាំយកមកចែកជូនបងប្អូននាពេលនេះ មានចំនួនតិចតួចក្ដី មិនសមល្មមនឹងការខាតបង់របស់បងប្អូន តែក៏អាចជួយសម្រាលទុក្ខបាករបស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា -មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា” ។
ក្នុងឱកាសនេះដែរ ឯកឧត្ដម គុជ លីណា បានធ្វើការអំពាវនាវដល់បងប្អូនប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នខ្ពស់ចូលរួមអនុវត្តវិធានការរបស់រាជរដ្ឋាភិបាល គឺ៣ការពារ ៣កុំ និងត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព និងវិធាននានារបស់ក្រសួងសុខភិបាល ៕
អត្ថបទ និង រូបភាព ៖ សាខាកាកបាទក្រហមកម្ពុជាខេត្តសៀមរាប
កែសម្រួល ៖ លីវ សាន្ត
