ក្នុងអំឡុងដែលឧបាសិកា ថោង សាវ៉ុន និងក្រុមគ្រួសារ ក្នុងឱកាសវេរភ័ត្តចំពោះព្រះសង្ឃឧទ្ទិសផលបុណ្យជូនដល់ស្វាម៉ី និងញាតិសន្តានដែលបានចែកឋានរំលាយខ័នទៅហើយ កាលពីថ្ងៃទី៣០ ខែឧសភា ឆ្នាំ២០២១ ឧបាសិកា និងក្រុមគ្រួសារ បានចែករំលែកគ្រឿងឧបភោគ បរិភោគ និងថវិកា ជូនបងប្អូនញាតិជិតខាង និងប្រជាពលរដ្ឋខ្សត់ខ្សោយក្នុងជីវភាពមកពីភូមិមួយចំនួន ក្នុងសង្កាត់សៀមរាប មានភូមិពោធិបន្ទាយជ័យ , ភូមិអារញ្ញ , ភូមិប្រឡាយ , ភូមិស្ពានជ្រាវ និង ភូមិបឹង ចំនួន១៨២គ្រួសារ ដែលក្នុងមួយគ្រួសារទទួលបាន ថវិកា១៥.០០០រៀល , អង្ករ១០គីឡូក្រាម , សារុង០១ , ទឹកត្រី០១ដប , ទឹកស៊ីអ៊ីវ០១ដប , ទឹកម្ទេស០១ដប , មី១០កញ្ចប់ និងគ្រឿងទេសមួយចំនួន និងព្រះសង្ឃចំនួន០៣អង្គ ប្រគេនទេយ្យវត្ថុក្នុង០១អង្គ មានថវិកា២០០ដុល្លារ , អង្ករ៥០គីឡូក្រាម , មី០១កេស , ទឹកក្រូច០១កេស , ទឹកសុទ្ធ០១កេស និងគ្រឿងទេសមួយចំនួនផងដែរ ។
មានប្រសាសន៍ក្នុងឱកាសនេះ ក្នុងនាមអាជ្ញាធរមូលដ្ឋាន និងក្នុងនាមប្រជាពលរដ្ឋ លោក ម៉ៃ សាមេត ចៅសង្កាត់សៀមរាប បានថ្លែងនូវការកោតសរសើរ និងអរគុណដល់ម្ចាស់ដើមទាននិងក្រុមគ្រួសារ ចំពោះការនាំយកទេយ្យទានវត្ថុជាគ្រឿងឧបភោគបរិភោគបន្តិចបន្តួច ជូនដល់ជនចាស់ជរា អ្នកជិតខាងនិងអ្នកខ្វះខាតក្នុងជីវភាព ក្នុងអំឡុងពេលប្រទេសកម្ពុជាកំពុងជួបនូវវិបត្តិកូវីដ-១៩នេះ ដែលសកម្មភាពនេះ គឺជាសទ្ឋាចូលរួមបំពេញបុណ្យកុសល រួមចំណែកជាមួយរាជរដ្ឋាភិបាល ក្នុងការលើកកម្ពស់វប្បធម៌ចែករំលែកសាមគ្គីគ្នាទៅវិញទៅមក ទៅតាមលទ្ឋភាពដែលមាន រវាងព្រះសង្ឃនិងពុទ្ធបរិស័ទ ។
លោក ម៉ៃ សាមេត មានប្រសាសន៍បន្ថែមថា ស្ថិតក្នុងបរិបថជំងឺកូវីដ-១៩ ដែលកំពុងឆ្លងរាលដាលជាសកលនោះ ប្រជាពលរដ្ឋគ្រប់រូប មានកាតព្វកិច្ចចាំបាច់ក្នុងការចូលរួមអនុវត្តន៍វិធានការសុខាភិបាល និងវិធានការផ្សេងៗទៀតរបស់រាជរដ្ឋាភិបាល ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ចូលសហគមន៍ ក្នុងឱកាសនេះ ក្នុងនាមអាជ្ញាធរមូលដ្ឋាន សុំស្នើដល់បងប្អូនប្រជាពលរដ្ឋទាំងអស់ចូលរួមសហការគ្នា ប្រសិនបើបានឃើញបងប្អូនប្រជាពលរដ្ឋយើងដែលមកពីខេត្តផ្សេង ជាពិសេស បណ្ដាខេត្ត និងរាជធានីភ្នំពេញ ដែលកំពុងមានការឆ្លងរីករាលដាលនៃជំងឺកូវីដ-១៩នោះ ចូលមកមូលដ្ឋានរបស់យើង ត្រូវប្រញ៉ាប់រាយការណ៍ទៅអាជ្ញាធរមូលដ្ឋានឬសមត្ថកិច្ចដែលនៅជិតបំផុត ដើម្បីសាកសួរព័ត៌មានពីគាត់ បន្ថែមពីនេះគ្រប់ៗគ្នាត្រូវចូលរួមបង្ការនិងទប់ស្កាត់ទាំងអស់គ្នា តាមការណែនាំរបស់ក្រសួងសុខាភិបាល និងវិធានការ៣ការពារ និង៣កុំ របស់សម្តេចតេជោ សែន រួមមាន ៖ ៣ការពារ និង៣កុំ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
