ដាំកូនឈើឡើងវិញវាមានសារសំខាន់ណាស់ ព្រោះព្រៃឈើបានកាត់បន្ថយការប្រែប្រួលអាកាសធាតុ កាត់បន្ថយការកើនឡើងនៅកម្តៅផែនដី និងលើកកម្ពស់វិស័យបរិស្ថាន។ នេះបើតាមការលើកឡើងរបស់ លោកឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធាភូមិភាគ៤ ក្នុងពិធីដាំកូនឈើជាង១ម៉ឺនដើម នៅទីបញ្ជាការដ្ឋានយោធាភូមិភាគ៤ នៅព្រឹកថ្ងៃទី០១ ខែមិថុនា ឆ្នាំ២០២១ ដែលការដាំកូនឈើនេះ ស្ថិតក្រោមកិច្ចសហការរវាងអាជ្ញាធរជាតិអប្សរា យោធាភូមិភាគ៤ ។
លោកឧត្តមសេនីយឯក ពៅ ហេង បានបញ្ជាក់ទៀតថា ការដាំកូនឈើនៅក្នុងខេត្តសៀមរាបពេលនេះ គឺជាការរួមចំណែកការពារបរិស្ថាន និងជួយលើកកម្ពស់សោភ័ណភាព ខេត្តសៀមរាប ព្រមទាំងធ្វើឱ្យប្រាសាទបុរាណកាន់តែមានសម្រស់ទាក់ទាញភ្ញៀវទេសចរឱ្យមកទស្សនាបានកាន់តែច្រើនថែមទៀត។ ការដាំកូនឈើនេះ លោក មិនត្រឹមតែចង់ឱ្យដាំនៅក្នុងខេត្តសៀមរាបប៉ុណ្ណោះទេ គឺចង់ឱ្យខេត្តចំនួន៤ រួមមានខេត្តឧត្តរមានជ័យ ខេត្តព្រះវិហារ និងខេត្តកំពង់ធំ ដែលជាខេត្តស្ថិតនៅក្រោមចំណុះយោធភូមិភាគ៤ បានដាំកូនឈើឡើងវិញ ក្នុងគោលបំណងជួយកាត់បន្ថយការឡើងកំដៅលើផែនដី និងការប្រែប្រួលអាកាសធាតុឱ្យប្រសើរឡើង។ នេះគឺជាលើកទី២ហើយ ដែលអាជ្ញាធរជាតិអប្សរា បានផ្ដល់កូនឈើចម្រុះជាង១ម៉ឺនដើម ជូនយោធាយោធភូមិភាគ៤ ដាំនៅក្នុងទីបញ្ជាការ ដោយកាលពីអំឡុងខែឧសភា ឆ្នាំ២០២០កន្លងទៅ អាជ្ញាធរជាតិអប្សរា ធ្លាប់បានផ្ដល់កូនឈើចម្រុះចំនួនមួយម៉ឺនដើមឱ្យកងយោធពលខេមរៈភូមិន្ទនៃយោធភូមិភាគ៤ យកទៅដាំនៅក្នុងទីបញ្ជាការដដែលនេះម្ដងមកហើយ។
នៅក្នុងឱកាសពិធីដាំកូនឈើនេះដែរ ទីបញ្ជាការនៃយោធភូមិភាគ៤ ក៏បានប្រគល់វត្ថុបុរាណចំនួន៥ដុំ ដែលកងទ័ពបានរកឃើញពីតាមទីបុរាណដ្ឋាននានា ជូនដល់អាជ្ញាធរជាតិអប្សរាដើម្បីយកទៅរក្សាទុកផងដែរ៕
អត្ថបទ និង រូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
