លោក នឹម វ៉ាន់សំ ប្រធានលេខាធិការដ្ឋានរៀបចំការបោះឆ្នោតខេត្តសៀមរាប មានប្រសាសន៍ថា គណៈកម្មាធិការជាតិរៀបចំការបោះឆ្នោត ដែលហៅកាត់ថា គជប បានសម្រេចយកថ្ងៃទី២០ ខែមិថុនា ឆ្នាំ២០២១ ខាងមុខនេះ ជាថ្ងៃបោះឆ្នោតសាកល្បងជ្រើសរើសក្រុមប្រឹក្សាឃុំ-សង្កាត់ឆ្នាំ២០២១ ខណៈខេត្តសៀមរាប សម្រេចជ្រើសយកការិយាយល័យបោះឆ្នោតចំនួន២ ដែលស្ថិតក្នុងសង្កាត់ស្វាយដង្គំ ក្រុងសៀមរាប គឺការិយាល័យមួយមានទីតាំងនៅក្នុងបរិវេណវិទ្យាល័យ ១០មករា១៩៧៩ និងការិយាល័យមួយទៀត មានទីតាំងនៅក្នុងបរិវេណសាលាបឋមសិក្សាស្វាយដង្គំ ហើយប្រការដែលកំណត់យកការិយាល័យបោះឆ្នោះ ក្នុងសង្កាត់ស្វាយដង្គំនេះ ដោយហេតុថា ការរៀបចំឲ្យអ្នកមកបោះឆ្នោត ដែលមានឈ្មោះក្នុងបញ្ជីឈ្មោះអ្នកបោះឆ្នោតឆ្នាំ២០២០ មិនលើសពី៥០០នាក់ ដូច្នេះ សង្កាត់នេះ មានចំនួនប្រជាពលរដ្ឋសមស្រប និងប្រហាក់ប្រហែលនៃចំនួនដែលបានកំណត់ ។
លោកប្រធានលេខាធិកាដ្ឋានរៀបចំការបោះឆ្នោតខេត្តសៀមរាប មានប្រសាសន៍ទៀតថា គោលបំណងសំខាន់នៃការបោះឆ្នោតសាកល្បងនេះ គឺយើងចង់ធ្វើការកំណែទម្រង់ការងារបោះឆ្នោតមួយឲ្យកាន់តែមានភាពច្បាស់លាស់ សុក្រិតភាព និង តម្លាភាព ដូច្នេះការធ្វើកំណែទម្រង់នេះ គឺ ៖ ទី១ កែទៅលើការចុះបញ្ជីបេក្ខជនបន្ថែមលើការចុះឈ្មោះតាមប្រព័ន្ធអនឡាន ខណៈកន្លងមកយើងចុះបញ្ជីដោយដៃតែមួយមុខ , ទី២. ចង់ឲ្យប្រទេសកម្ពុជាធ្វើការបោះឆ្នោតដោយទៀងទាត់ តាមកាលកំណត់ទោះស្ថិតក្នុងបរិបទនៃការរីករាលដាលនៃវីរុសកូវីដ-១៩ យ៉ាងណាក៏ដោយ , ទី៣. កំណែទម្រង់ទៅលើការគូសលើសន្លឹកឆ្នោត ខណៈកន្លងមកយើងប្រើប៊ិកគូស ប៉ុន្តែពេលខ្លះប៊ិកមិនដិត ឬក៏ដិតហួសទៅប៉ះលើប្រអប់គាំទ្រគណបក្សផ្សេង ដែលធ្វើឲ្យមានការតវ៉ាជាច្រើនករណី ហើយលើកនេះ គឺការប្រើប្រាស់ប៊ិកបោះ ដូចជាបោះត្រាដែលជាគំនូសគាំទ្រគណបក្ស ជំនួសការប្រើប្រាស់ប៊ិកធម្មតាក្នុងពេលបោះឆ្នោត ដែលវាមានភាពងាយស្រួល ដល់ប្រជាពលរដ្ឋជាម្ចាស់ឆ្នោត និង ទី៤. កំណែទម្រង់លើការផ្ទៀងផ្ទាត់បញ្ជូនលទ្ធផល ដោយធ្វើតាមប្រព័ន្ធអេឡិចត្រូនិកតែម្ដង ។
លោក នឹម វ៉ាន់សំ មានប្រសាសន៍ទៀតថា ការបោះឆ្នោតសាកល្បងជ្រើសរើសក្រុមប្រឹក្សាឃុំសង្កាត់នេះ គឺភាពខុសគ្នានិង មានភាពត្រឹមត្រូវជាងមុន បើប្រៀបធៀបទៅនឹងការបោះឆ្នោតកាលពីពេលមុនៗ ជាពិសេសមិនមានបេក្ខជនឈរឈ្មោះជាងមួយគណបក្ស ការបាត់ឈ្មោះ ការខុសឈ្មោះ និង អ្នកមិនគ្រប់អាយុជាដើម ហើយការប្រើប្រាស់ប៊ិកគំនូស មានភាពងាយស្រួលជាងមុន ដោយមិនពិបាកដែលពិនិត្យលើសន្លិកឆ្នោតបានការនិងមិនបានការ , ការសសរសេរចម្លងទម្រង់បែបបទដោយប្រើប្រាស់បញ្ជូលទិន្នន័យតាមកុំព្យូទ័រតែម្ដង និង ការផ្ទៀងផ្ទាត់បញ្ជូលលទ្ធផល ពេលចប់បោះឆ្នោត តាមការិយាល័យនឹងចាប់ផ្ដើមស្កេនទម្រង់នោះតាមប្រព័ន្ធអនឡាញ ទៅកាន់ការិយាល័យថ្នាក់ជាតិ ឬ ថ្នាក់ខេត្តជាដើម។
លោក នឹម វ៉ាន់សំ ប្រធានលេខាធិការដ្ឋានរៀបចំការបោះឆ្នោតខេត្តសៀមរាបបញ្ជាក់ថា ការរៀបចំការបោះឆ្នោតសាកល្បងជ្រើសរើសក្រុមប្រឹក្សាឃុំ សង្កាត់ ដោយប្រើប្រាស់ប្រព័ន្ធព័ត៌មានវិទ្យា (IT)នាពេលនេះ គឺដើម្បីសម្រួលការងារបោះឆ្នោតក្នុងបរិបទនៃបដិវត្តន៍ឧស្សាហកម្ម ៤.០ និងបរិបទនៃការរីករាលដាលនៃជំងឺកូវីដ-១៩ ហើយប្រសិនបើការវាយតម្លៃអំពីប្រសិទ្ធភាពខ្ពស់នៃការធ្វើទំនើបកម្មដំណើរការរៀបចំការបោះឆ្នោត ក្នុងក្របខ័ណ្ឌកំណែទម្រង់នៃការបោះឆ្នោតរបស់ គ.ជ.បនាពេលនេះ គ.ជ.ប នឹងយកទៅអនុវត្តសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ នៅក្នុងឆ្នាំ២០២២ខាងមុខនេះ និង បោះជំហានទៅការបោះឆ្នោតនាពេលអនាគតដោយប្រើ IT ។
សូមបញ្ជាក់ថា ការបោះឆ្នោតសាកល្បងជ្រើសរើសក្រុមប្រឹក្សាឃុំសង្កាត់ ឆ្នាំ២០២១ ដែលប្រព្រឹត្តទៅនៅថ្ងៃទី២០ ខែមិថុនា ឆ្នាំ២០២១នេះ នៅក្នុងគោលដៅ ឃុំសង្កាត់ ចំនួន២៥ នៃរាជធានី ខេត្ត ទាំងអស់នៅទូទាំងប្រទេស ដែលខេត្តនីមួយៗ ត្រូវកំណត់យក២ការិយាល័យគោលដៅ ៕
អត្ថបទ ៖ លោកស្រី ហែម បូរ៉ាន្នី
កែសម្រួលអត្ថបទ ៖ លោក លីវ សាន្ត
