លោក ធិននី វិធូរ អភិបាល នៃគណៈអភិបាលស្រុកវ៉ារិន មានប្រសាសន៍ថា បើទោះបីជារមណីយដ្ឋានក្នុងមូលដ្ឋានស្រុកវ៉ារិន មិនទាន់ទទួលបានភ្ញៀវទេសចរណ៍មកទស្សនាកំសាន្ដ ច្រើនកុះករយ៉ាងណាក៏ដោយ ក៏រដ្ឋបាលស្រុកបាននឹងកំពុងអនុវត្តនូវវិធានសុវត្ថិភាពទេសចរណ៍ របស់ក្រសួងទេសចរណ៍ និងវិធានការនានារបស់ក្រសួងសុខាភិបាល បានយ៉ាងខ្ជាប់ខ្ជួនជានិច្ច ជាពិសេសគឺវិធានការរបស់រាជរដ្ឋាភិបាល គឺ វិធានការ ៣ការពារ រួមមាន ៖ ១. ដោយការពាក់ម៉ាស់ , ២. លាងសំអាតដៃឱ្យបានញឹកញាប់ និង ៣. រក្សាគម្លាតសុវត្ថិភាពសង្គម ពីបុគ្គលម្នាក់ទៅម្នាក់ឱ្យបានយ៉ាងតិចមួយម៉ែត្រកន្លះឡើងទៅឱ្យបានគ្រប់ៗគ្នា និង វិធានការ ៣កុំ រួមមាន ៖ ១. កុំចូលទៅទីកន្លែងបិទជិតខ្យល់ចេញចូលនិងប្រើម៉ាស៊ីនត្រជាក់ច្រើន , ២. កុំទៅទីដែលមានមនុស្សច្រើនកុះករ និង ៣. កុំប៉ះពាល់គ្នា ជួបជុំគ្នាច្រើនជាដើម ។
លោកអភិបាលស្រុកវ៉ារិន មានប្រសាសន៍ទៀតថា កន្លងមកលោកតែងតែធ្វើការផ្សព្វផ្សាយដល់ប្រជាពលរដ្ឋ ជាពិសេសអាជីវករ ដែលប្រកបអាជីវកម្មភោជនីយដ្ឋាន និងអាហារដ្ឋានទេសចរណ៍ ត្រូវតែចូលរួមអនុវត្ត ឲ្យបានម៉ឺងម៉ាត់ របស់ក្រសួងទេសចរណ៍ ក្រសួងសុខាភិបាល និងវិធានរបស់រាជរដ្ឋាភិបាល ដោយត្រូវមានអាកុលសម្រាប់លាងដៃ អនាម័យជានិច្ចមុននិងក្រោយ ពេលមានភ្ញៀវទេសចរណ៍ទៅរកសេវាផងដែរ ដូច្នេះដើម្បីទប់ស្កាត់ការឆ្លងរីករាលដាលវីរុសកូវីដ-១៩ សូមអំពាវនាវដល់ប្រជាពលរដ្ឋទាំងអស់ ដែលមានបំណងមកទស្សនានៅតំបន់ទេសចរណ៍ក្នុងមូលដ្ឋានស្រុកវ៉ារិន សូមចូលរួមអនុវត្តវិធានការសុវត្ថិភាពទាំងអស់គ្នា ។
សូមបញ្ជាក់ថា កាលពីពេលថ្មីៗនេះ ក្រសួងទេសចរណ៍បានចេញសេចក្ដីណែនាំមួយ សម្រាប់បណ្ដាមន្ទីរទេសចរណ៍រាជធានី ខេត្ត ឲ្យបន្ដសហការជាមួយរដ្ឋបាលខេត្ត និង អាជ្ញាធរមូលដ្ឋាន ដោយពង្រឹងអនុវត្តវិធានសុវត្ថិភាពសម្រាប់អាជីវកម្មសេវាកម្មភោជនីយដ្ឋាន និងអាហារដ្ឋានទេសចរណ៍ដែលមាននៅក្នុងមូលដ្ឋានរបស់ខ្លួន ក្នុងនោះត្រូវបន្ដសហការ និង ណែនាំបន្ដដល់គ្រប់មូលដ្ឋានអាជីវកម្ម តាមដានត្រួតពិនិត្យរាល់បុគ្គលិករបស់ខ្លួនដែលកំពុងជាប់កាតព្វកិច្ចចត្តាឡីស័ក និងតម្រូវឲ្យអ្នកគ្រប់គ្រងមូលដ្ឋានអាជីវកម្មទាំងអស់ ត្រូវជូនដំណឹងមកអាជ្ញាធរមូលដ្ឋាននូវរាល់ករណីសង្ស័យ ចំពោះភ្ញៀវទេសចរណ៍ដែលជាប់ពាក់ព័ន្ធនឹងជំងឺកូវីដ ១៩ និងមិនត្រូវអនុញ្ញាតឲ្យអ្នកទេសចរ និងបងប្អូនប្រជាពលរដ្ឋដែលកំពុងជាប់ធ្វើចត្តាឡីស័ក ឬ ត្រូវផ្ដល់សំណាកធ្វើតេស្ដរកជំងឺកូវីដ ១៩ ចូលទៅប្រើប្រាស់សេវាកម្មជាដាច់ខាត ៕
អត្ថបទ និង រូបថត ៖ លោកស្រី ហែម បូរ៉ាន្នី
កែសម្រួលអត្ថបទ ៖ លោក លីវ សាន្ត
