ឯកឧត្តម ទៀ សីហា អភិបាលខេត្តសៀមរាប បានបង្ហាញនូវការគាំទ្រនិងកោតសសើរយ៉ាងខ្លាំងចំពោះប្រមុខរាជរដ្ឋាភិបាលកម្ពុជា បន្ទាប់ពីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានសម្រេចចិត្តទិញមន្ទីរពេទ្យនគរទេព ហើយប្ដូរឈ្មោះដាក់ថា “ មន្ទីរពេទ្យហ្លួងម៉ែ ” ដែលកាយវិការនេះជាការដឹកនាំដ៏ឈ្លាសវ៉ៃ ប៉ិនប្រសព្វ និងប្រកបដោយ គតិបណ្ឌិតថ្លៃថ្លាបំផុត ស្របទៅតាមយុទ្ធសាស្រ្តជាជំហានៗ ក្នុងការប្រយុទ្ធប្រឆាំងនឹងជំងឺកូវីដ-១៩ និងជាការយកចិត្តទុកដាក់ខ្ពស់បំផុត ចំពោះសុខមាលភាពបងប្អូនប្រជាពលរដ្ឋ ជាពិសេសការដែលសម្តេចតេជោ សម្រេចចិត្តប្ដូរឈ្មោះដាក់ថា “ មន្ទីរពេទ្យហ្លួងម៉ែ ” នេះ គឺជាការសម្ដែងថ្វាយនូវកតញ្ញូតាធម៌ និងកតវេទិតាយ៉ាងស្មោះស័្មគ្របំផុត ចំពោះសម្ដេចព្រះមហាក្សត្រី ដែលព្រះអង្គបានលះបង់ព្រះបញ្ញាញាណ និងព្រះកាយពល គិតគូរពីសុខមាលភាពរបស់ប្រជារាស្រ្តព្រះអង្គទូទាំងប្រទេស ។
ឯកឧត្តមអភិបាលខេត្តសៀមរាប មានប្រសាសន៍ទៀតថា សម្ដេចម៉ែ គឺជាម្លប់ដ៏ត្រជាក់ត្រជុំ និងប្រកបដោយសុខដុមនីយកម្ម សម្រាប់ប្រជាជាតិខ្មែរ ដែលព្រះអង្គសព្វព្រះរាជហឬទ័យ គង់នៅជាព្រះប្រធានកិត្តិយសនៃកាកបាទក្រហមកម្ពុជា និងក្រុមប្រឹក្សាជាតិកម្ពុជា ដើម្បីស្រ្តី , ប្រធានកិត្តិយសសមាគមដូនជី និង ឧបាសិកាកម្ពុជរដ្ឋ , ព្រះប្រធានកិត្តិយសសមាគមកាយរិទ្ធនារីកម្ពុជា ដែលបានចូលរួមចំណែកយ៉ាងធំធេង ក្នុងការលើកកម្ពស់ តួនាទីស្រ្តីក្នុងសង្គមកម្ពុជា ដូនជី ឧបាសិកា និងការលើកកម្ពស់ជីវភាពរស់នៅប្រជាជន។
ពាក់ព័ន្ធនឹងការទិញមន្ទីរពេទ្យនគរទេព ហើយប្ដូរឈ្មោះដាក់ថា “ មន្ទីរពេទ្យហ្លួងម៉ែ » នេះដែរ ឯកឧត្តម លីវ សុខុន ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្តសៀមរាប ក៏បង្ហាញនូវទស្សនៈរបស់ខ្លួន និង សម្ដែងនូវការពេញចិត្ត ព្រមទាំងគាំទ្រទាំងស្រុងចំពោះសម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានសម្រេចចិត្តទិញមន្ទីរពេទ្យឯកជន ដើម្បីមប្រើផលប្រយោជន៍ជាតិ លើសុខុមាលភាពរបស់ប្រជាជនទាំងមូលនោះ ។
សូមបញ្ជាក់ថា កាលពីថ្ងៃទី ២៨ ខែមីនា ឆ្នាំ២០២១ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញសារលិខិតទូលថ្វាយសម្ដេចម៉ែ ចំពោះការសម្រេចទិញមន្ទីរេពេទ្យឯកជនមួយដែលមានឈ្មោះថា “ នគរទេព ” នឹងប្ដូរឈ្មោះទៅជា” មន្ទីរពេទ្យហ្លួងម៉ែ ” ដោយចំពោះមុខមន្ទីរពេទ្យ បាននិងកំពុងព្យាបាលអ្នកជំងឺកូវីដ១៩ លុះថ្ងៃអនាគត មន្ទីរពេទ្យ «ហ្លួងម៉ែ» នឹងដាក់ឲ្យប្រើប្រាស់ព្យាបាលជំងឺទូទៅជារៀងរហូត។ ជាមួយនឹងការទិញមន្ទីរពេទ្យ “ នគរទេព ” ហើយប្ដូរឈ្មោះទៅជា” មន្ទីរពេទ្យហ្លួងម៉ែ ” នោះ មានសប្បុរសជនជាច្រើនក្នុងប្រទេសកម្ពុជា បានស្ម័គ្រចិត្ថបរិច្ចាគជាថវិកាផ្ទាល់ខ្លួន ដើម្បីចូលរួមជាមួយរាជរដ្ឋាភិបាលចំពោះការទិញមន្ទីរពេទ្យនេះផងដែរ៕
អត្ថបទ ៖ លោកស្រី ហែម បូរ៉ាន្នី ,រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
