ឯកឧត្ដម ឡុង កុសល អគ្គនាយករង និងជាអ្នកនាំពាក្យអាជ្ញាធរជាតិអប្សរា បានឲ្យដឹងកាលពីថ្ងៃទី០៤ខែមិថុនា ថា ក្រោយពីមានការស្នើសុំពីព្រះសង្ឃ ព្រមទាំងសាធារណជន ពីការសុំកូនឈើជាបន្តបន្ទាប់របស់អាជ្ញាធរជាតិអប្សរា ដើម្បីយកទៅដាំនៅលើដីលំនៅឋាន ដីចម្ការ សាលារៀន វត្តអារាម និងដីតំបន់ជុំវិញទៅតាមតម្រូវការ។ ជាក់ស្ដែងនៅចុងខែឧសភាកន្លងទៅនេះ កូនឈើចម្រុះសរុប ៨,៧០០ដើម ត្រូវបានក្រុមការងារអាជ្ញាធរជាតិអប្សរា បានបន្តចែកជូនទៅសាធារណជន។
ឯកឧត្ដម ឡុង កុសល បានឲ្យដឹងទៀតថា ដើមឈើដែលផ្តល់ជូនទាំងនោះរួមមាន ផ្តល់កូនឈើជូនតំណាង ឯកឧត្តម នេត្រ ភក្រ្តា រដ្ឋលេខាធិការក្រសួងបរិស្ថាន ចំនួន៦០០ដើម មានកូនឈើទាំងនោះរួមមាន គ្រញូង៤០០ដើម និងធ្នង់២០០ដើម ដើម្បីយកទៅដាំតាមបណ្តោយផ្លូវសំខាន់ៗក្នុងក្រុងសួង ខេត្តត្បូងឃ្មុំ ,កូនថ្កូវ ចំនួន២០០ដើម ប្រគល់ជូនមន្ទីរបរិស្ថានខេត្តសៀមរាប ដើម្បីយកទៅដាំក្នុងបរិវេណមជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ,កូនឈើចម្រុះចំនួន១,១៥០ដើម ប្រគល់ជូនតំណាងក្រុមហ៊ុន គូឡារ៉ា វ៉ធើរ ដើម្បីយកទៅដាំស្តារព្រៃឈើរិចរិលឡើងវិញតាមជើងភ្នំគូលែនខាងក្រោមព្រះអង្គជប់ ក្នុងស្រុកបន្ទាយស្រី ,ប្រគល់ជូនឧត្តមសេនីយ៍ឯក ពៅ ហេង មេបញ្ជាការយោធភូមិភាគទី៤ ចំនួន៥,០០០ដើម ដើម្បីយកទៅដាំក្នុងបរិវេណទីបញ្ជាការដ្ឋានយោធភូមិភាគទី៤ ក្នុងឃុំកណ្តែក ស្រុកប្រាសាទបាគង ,ប្រគេនជូនព្រះអង្គ តាត មហាទី ព្រះគ្រូចៅអធិការវត្តព្រះឥន្ទកោសា ចំនួន១,១៣០ដើម ដើម្បីយកទៅដាំ និងចែកចាយនៅតាមសាលារៀន និងវត្តអារាមក្នុងខេត្តសៀមរាប។
សូមជម្រាបថា កាលពីថ្ងៃទី០១ ខែមិថុនាកន្លងទៅ ឯកឧត្ដម ហង់ ពៅ អគ្គនាយកអាជ្ញាធរជាតិអប្សរា បានមានប្រសាសន៍ថា អាជ្ញាធរជាតិអប្សរាបានត្រៀម កូនឈើ២០ម៉ឺនដើម ដើម្បីទុកចែកជូនដល់ប្រជាពលរដ្ឋ ព្រះសង្ឃ សាធារណៈជន ក៍ដូចជាស្ថាប័នកងកម្លាំងប្រដាប់អាវុធ អាជ្ញាធរពាក់ព័ន្ធ ដើម្បីយកទៅដាំបំពេញបន្ថែមនៅកន្លែងដែលខ្លួនចង់ដាំនៅតំបន់ព្រៃឈើដែលរិចរិល ខណៈដែលកូនឈើរាប់ម៉ឺនដើមទៀតសម្រាប់ដំាបំពេញបន្ថែមនៅក្នុងរមណីយដ្ឋានអង្គរ។ ការដាំកូនឈើចម្រុះនាពេលនេះក៍ជាការជួយលើកតម្កើងនូវទេសភាពវប្បធម៌ និងបង្កើនបរិយាកាសបរិស្ថាននៅក្នុតំបន់ប្រាសាទបុរាណ។ ឯកឧមត្ដមក៍បានអំពាវដល់ប្រជាពលរដ្ឋក៍ដូចជាអាជ្ញាធរមានសមត្ថកិច្ចចូលដាំ និងជួយការពារព្រៃឈើអោយបានគង់វង្ស ព្រោះព្រៃឈើជាអាយុជីវិតរបស់មនុស្សជាតិ៕
អត្ថបទ និង រូបភាព៖ លោក ឈិត សាវី
កែសម្រួលអត្ថបទ៖ លោក អ៊ុន ណារាជ្យ
