នៅរសៀលថ្ងៃទី៤ ខែមិថុនា ឆ្នាំ២០២១ រដ្ឋបាលខេត្តសៀមរាប បាននាំយកអំណាយ របស់សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តសៀមរាប ជូនដល់គ្រួសារក្រីក្រចំនួន ១៨០គ្រួសារ នៃសង្កាត់ទាំង១២ ក្នុងក្រុងសៀមរាប ដែលរងគ្រោះដោយជំងឺកូវីដ-១៩។
លោក នួន ពុទ្ធារ៉ា អភិបាលក្រុងសៀមរាប បានថ្លែងអំណរគុណដល់ សម្ដេចពិជ័យសេនា ថ្នាក់ដឹកនាំខេត្តសៀមរាប រួមនិងសប្បុរសជននានា ដែលតែងតែបានគិតគូរដល់សុខទុក្ខមន្ត្រីរាជការ ប្រជាពលរដ្ឋ អំឡុងពេល នៃការរីករាលដាលជំងឺកូវីដ-១៩នេះ។ ការអូសបន្លាយនៃវិបត្តិជាសកល និងធ្ងន់ធ្ងរមួយនេះ បានធ្វើឱ្យវិស័យទេសចរណ៍ បាត់បង់ចំណូលស្ទើរទាំងស្រុង រីឯប្រជាពលរដ្ឋភាគច្រើន បានបាត់បង់ចំណូលស្ទើរទាំងស្រុង។ ដោយមានការយកចិត្តទុកដាក់ពី ឯកឧត្តមអភិបាលខេត្ត ក្នុងនោះ រដ្ឋបាលក្រុង រួមនិងរដ្ឋបាលសង្កាត់ទាំង១២ ក៏បានអំពាវនាវដល់សប្បុរសជននានា ឧបត្ថម្ភជាស្បៀងអាហារ សម្ភារៈប្រើប្រាស់ផ្សេងៗ ដើម្បីកាត់បន្ថយទុក្ខលំបាក ប្រជាពលរដ្ឋ ដែលមានជីវភាពខ្វះខាតជាបន្តបន្ទាប់។
ព័ត៌មានជាតិ ថ្មីៗ
តំណាងសម្ដេចពិជ័យសេនា ទៀ បាញ់ ក្នុងពិធីចែកអំណោយជូនប្រជាពលរដ្ឋក្រីក្ររងគ្រោះដោយជំងឺកូវីដ-១៩ ឯកឧត្តម ទៀ សីហា អភិបាលខេត្តសៀមរាប លើកឡើងថា ទោះបីក្នុងកាលៈទេសៈណា សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅតែគិតគូរពីសុខទុក្ខប្រជាពលរដ្ឋគ្រប់រូប។
ឯកឧត្តមអភិបាលខេត្ត ក៏បានអំពាវនាវដល់ប្រជាពលរដ្ឋក្នុងខេត្តទាំងអស់ ចូលរួមអនុវត្តន៍វិធានសុវត្ថិភាព របស់ក្រសួងសុខាភិបាល សេចក្ដីណែនាំនានា របស់រដ្ឋបាលខេត្ត ព្រមទាំងសហការផ្ដល់ព័ត៌មាន ដល់អាជ្ញាធរនៅតាមប៉ុស្តិត្រួតពិនិត្យសុខភាពបឋម តាមព្រំប្រទល់ខេត្តសៀមរាប ដើម្បីកាត់ផ្ដាច់ការចម្លងជំងឺកូវីដ-១៩ ក្នុងសហគមន៍។
សូមជម្រាបអំណោយ ដែលប្រជាពលរដ្ឋទទួលបាននាពេលនេះ ក្នុងមួយគ្រួសារទទួលបាន អង្ករ ៣០គីឡូក្រាម, មី ១កេស, ត្រីខ ១យួរ, ទឹកត្រី ១យួរ និងទឹកស៊ីអ៊ីវ ១យួរ។
អត្ថបទ៖ លោក សេង ផល្លី
រូបភាព៖ មន្ត្រីមន្ទីរព័ត៌មានខេត្ត
