នៅរសៀលថ្ងៃទី០៣ ខែមិថុនា ឆ្នាំ២០២១នេះ នៅសាលាខេត្តសៀមរាប លោក ពិន ប្រាកដ អភិបាលរង នៃគណៈអភិបាលខេត្ត បានអញ្ជើញទទួលអំណោយជាគ្រឿងឧបភោគបរិភោគ និងសម្ភារប្រើប្រាស់ពីក្រុមហ៊ុនបញ្ចាំចលនទ្រព្យ រត្ននៈអភិវឌ្ឍន៍ ខេត្តសៀមរាប ដើម្បីចូលរួមក្នុងយុទ្ធនាការទប់ស្កាត់ជំងឺកូវីដ-១៩ ដោយអំណោយទាំងនោះរួមមាន៖ អង្ករ មី ត្រីខ ទឹកស៊ីអ៉ីវ ទឹកត្រី ម៉ាស់ អាល់កុល និងថវិកា ៥០០ដុល្លារ។
ក្នុងនាមអាជ្ញាធរខេត្ត លោក ពិន ប្រាកដ បានបង្ហាញនូវក្តីសោមនស្សរីករាយ ចំពោះទឹកចិត្តដ៏ឧត្តុងឧត្តម របស់ក្រុមហ៊ុនបញ្ចាំចលនទ្រព្យ រត្ននៈអភិវឌ្ឍន៍ រួមទាំងសប្បុរសជនដែលបានលះបង់នូវធនធានផ្ទាល់ ដើម្បីចូលរួមយ៉ាងធំធេង ក្នុងពេលដែលយើងទាំងអស់គ្នាកំពុងប្រឈម និងជួបការលំបាកដោយសារវិបត្តិជំងឺកូវីដ-១៩ ក៏ដូចជាការចូលរួមចំណែកជាមួយរាជរដ្ឋាភិបាល។ អំណោយដែលបានផ្តល់មក រដ្ឋបាលខេត្តសៀមរាបនឹងយកអំណោយទាំងអស់នេះ ចែកជូនដល់គោលដៅសំខាន់ៗ និងបែងចែងផ្តល់ជូនប្រជាពលរដ្ឋ ដែលបានកំពុងធ្វើចត្តាឡីស័ក និងប្រជាពលរដ្ឋខ្វះខាតនៅ ក្នុងអំឡុងពេលធ្វើយុទ្ធនាការប្រយុទ្ធប្រឆាំងនឹងជំងឺកូវីដ-១៩ នៅក្នុងខេត្តសៀមរាប ក្នុងព្រឹត្តិការណ៍ ២០កុម្ភៈ ទៅតាមលទ្ឋភាពដែលរដ្ឋបាលខេត្តមាន។
លោក ពិន ប្រាកដ ក៏បានបង្ហាញនូវក្តីបារម្ភពីសុខទុក្ខរបស់បងប្អូនប្រជាពលរដ្ឋក្នុងទូទាំងខេត្តសៀមរាប ជាមួយនឹងការប្រឈមទៅនឹងវិបត្តិជំងឺកូវីដ-១៩ ដែលទាំងអស់គ្នាត្រូវតែចូលរួមការពារ ទប់ស្កាត់បញ្ហានេះទាំងអស់គ្នា មិនមែនជាបញ្ហារបស់បុគ្គលណាម្នាក់ឡើយ។ លោកបញ្ជាក់បន្ថែមថា បច្ចុប្បន្នរដ្ឋបាលខេត្តសៀមរាប បាននឹងកំពុងយកចិត្តទុកដាក់អនុវត្តវិធានការបង្ការទប់ស្កាត់ការឆ្លងរីករាលដាលជម្ងឺកូវីដ-១៩ ចូលដល់សហគមន៍ តាមបទបញ្ជារបស់ប្រមុខរាជរដ្ឋាភិបាល និងវិធានការណែនាំរបស់ក្រសួងសុខាភិបាល ក៏ដូចជាក្រសួងមហាផ្ទៃបានយ៉ាងល្អប្រសើរ ។ ជាក់ស្តែងក្រៅពីការរៀបចំមណ្ឌលចត្តាឡីស័កនៅតាមបណ្តាក្រុង ស្រុក អាជ្ញាធរ ខេត្តក៏បានធ្វើការរឹតបន្តឹង នៅតាមបណ្តាច្រកព្រំប្រទល់រវាងខេត្តសៀមរាប និងកំពង់ធំ បន្ទាយមានជ័យ ឧត្តរមានជ័យ ក្នុងការពិនិត្យតាមដានសុខភាពបឋម របស់អ្នកដំណើរចូលមកខេត្តនេះ ដើម្បីតាមដានគ្រប់គ្រង និងកាត់ផ្តាច់ខ្សែចម្លងជម្ងឺកូវីដ-១៩ ឲ្យមានប្រសិទ្ធភាព និងការទទួលខុសត្រូវខ្ពស់៕
ប្រភព៖រដ្ឋបាលខេត្តសៀមរាប
កែសម្រួលអត្ថបទ៖ លោក អ៊ុន ណារាជ្យ
