ប្រជាពលរដ្ឋដែលជួបការខ្វះខាតជីវភាពក្នុងវិបត្តិជំងឺកូវីដ-១៩ ប្រមាណជា១០០គ្រួសារមកពី៩ភូមិ ក្នុងឃុំត្រពាំងធំ បានទទួលអំណោយពីក្រុមការងារថ្នាក់ជាតិ ចុះជួយមួលដ្ឋាន នៅឃុំត្រពាំងធំ ស្រុកប្រាសាទបាគង ខេត្ដសៀមរាប នៅព្រឹកថ្ងៃទី០៣ ខែមិថុនាឆ្នាំ២០២១នេះ។ នេះគឺជាការយកចិត្តទុកដាក់ និងដោះស្រាយទាន់ពេលវេលារបស់ក្រុមការងារថ្នាក់ជាតិ ដើម្បីជួយពួកគាត់ក្នុងគ្រាទុក្ខលំបាកអំឡុងវិបត្ដិជំងឺកូវីដ-១៩ កំពុងតែរាតត្បាតជាសកលនេះ ។
លោក សយ សីហា មេឃុំត្រពាំងធំ ស្រុកប្រាសាទបាគង បានអោយដឹងថា អំណោយទាំងនេះ ផ្តល់ដោយឯកឧត្តម អ៊ុ ភូមិរ៉ូ និងឯកឧត្តម ចៅ សម្បត្តិ ជាសមាជិកក្រុមការងារចុះជួយមូលដ្ឋាន នៃឃុំត្រពាំងធំ តាមរយ:លោក សយ សីហា មេឃុំត្រពាំងធំ ដែលមានជាគ្រឿងឧបភោគបរិភោគ រួមមាន អង្ករជាង២តោន, ត្រីខ ១០០យួរ, មី ១០០កេស ។ លោក សយ សីហា បានពាំនាំប្រសាសន៍ផ្តាំផ្ញើឯកឧត្តមប្រធានក្រុមការងារចុះជួយឃុំថា គ្រឿងឧបភោគ បរិភោគទាំងនោះ មិនច្រើនក៏ពិតមែន ប៉ុន្ដែប្រជាពលរដ្ឋអាចជួយដោះស្រាយទុក្ខលំបាកបានមួយគ្រាផងដែរ ក្នុងអំឡុងពេលដែលប្រទេសជាតិជួបវិបត្ដិជំងឺកូវីដ-១៩នេះ។ លោក មេឃុំបានបន្ដថា ក្រុមការងារចុះជួយមូលដ្ឋាន ដែលមានឯកឧត្ដម ហេង រតនា ជាប្រធាន បានផ្ដាំផ្ញើ និងសួរសុខទុក្ខដល់ប្រជាពលរដ្ឋផងដែរ ជាពិសេសអោយប្រជាពលរដ្ឋចូលរួមអនុវត្ដនូវវិធានការពាររបស់រាជរដ្ឋាភិបាល ក្នុងទប់ស្កាត់ជំងឺកូវីដ-១៩ ដូចជាបីការពារ ៣កុំជាដើម។
លោកបន្ថែមថា អំណោយនេះ ជាវប្បធម៌ចែករំលែករបស់រាជរដ្ឋាភិបាល ដោយ មិនបានទុកអោយប្រជាពលរដ្ឋណាម្នាក់ស្លាប់ ដោយសារខ្វះស្បៀងអាហារនោះទេ ពោលរាជរដ្ឋាភិបាល បានគិតគូរពីសុខទុក្ខប្រជាពលរដ្ឋជានិច្ចទោះបីមិនបានចុះនៅមូលដ្ឋានក្នុងអំឡុងពេលកូវីដ១៩នេះក្ដី។ លោកបានបន្ថែមទៀតថា ទុក្ខលំបាកប្រជាពលរដ្ឋក៏ដូចជាទុកលំបាករបស់រាជរដ្ឋាភិបាលផងដែរ។លោកមេឃុំបន្ថែមថា អំណោយនេះ ប្រជាពលរដ្ឋម្នាក់ៗ ទទួលបាន÷ អង្ករ ២២គីឡូក្រាម, ត្រីខ ១យួរ, មី ១កេស។ ជាមួយគ្នានោះ ក្រុមការងារក៏បានផ្ដល់ផ្ទាំងសូឡា៥បង្គោល សម្រាប់ដាក់នៅសាលាឃុំ និងថ្នាំពេទ្យជាច្រើនទៀត បានផ្ដល់ឱ្យមណ្ឌលសុខភាពឃុំត្រពាំងធំនេះ។ សូមជម្រាបថាការជួយឧបត្ថម្ភពីក្រុមការងារចុះជួយមូលដ្ឋាននេះមានចំនួន៣លើករួចមកហើយ ដោយលើកទី១ប្រមាណ១០០គ្រួសារ លើកទី៣៥០គ្រួសារ និងលើកទី៣នេះ ១០០គ្រួសារ៕
អត្ថបទ និងរូបភាព៖ លោកបូ សាវី
កែសម្រួលដោយ៖ លីវ សុខុន
