នៅព្រឹកថ្ងៃទី០៣ ខែមិថុនា ឆ្នាំ២០២១នេះ លោកជំទាវ ស៊ិន ណម សមាជិកក្រុមប្រឹក្សាខេត្ត និងជាប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារខេត្ត បានដឹកនាំបើកកិច្ចប្រជុំតម្រង់ទិស ស្តីពីការលើកកម្ពស់ការទទួលកិច្ចគាំពារ និងការអភិវឌ្ឍន៍សម្រាប់កុមារដែលមានពិការភាព ក្នុងគោលបំណងជម្រុញការយល់ដឹងអំពីសារៈប្រយោជន៍នៃការអប់រំកុមារ និងសេវាគាំពារនានា សម្រាប់កុមារដែលមានពិការភាពយន្តការសម្របសម្រួល ព្រមទាំងការគាំទ្រពីអ្នកពាក់ព័ន្ធនានា នៅថ្នាក់ក្រោមជាតិ។ ពិធីនេះដែរក៏មានការចូលរួមពីសំណាក់អស់លោក លោកស្រីជាថ្នាក់ដឹកនាំមន្ទីរក្នុងខេត្ត អាជ្ញាធរក្រុង/ស្រុក មន្ត្រីទទួលបន្ទុកការងារកិច្ចស្ត្រី និងកុមារក្នុងស្រុកគោលដៅទាំង៦ និងតំណាងអង្គការសង្គមស៊ីវិលមួយចំនួន។
លោកជំទាវ ស៊ិន ណម បានបញ្ជាក់ថា ការអប់រំកុមារតូចប្រកបដោយបរិយាប័នត្រូវបានរៀបចំអនុវត្តដោយក្រសួងអប់រំ យុវជននិងកីឡាក្នុងគោលបំណង ដើមី្បលើកកម្ពស់ការទទួលបាននូវការអប់រំកុមារតូចសម្រាប់កុមារដែលពិការភាព និងជម្រុញការយល់ដឹងរបស់គ្រូមតេយ្យសិក្សា និងមាតាបីតាអំពីផល ប្រយោជន៍នៃការអប់រំកុមារតូចសម្រាប់កុមារដែលពិការភាព។ បន្ទាប់ពីបានអនុវត្តនូវកម្មវិធីអប់រំកុមារតូចប្រកបដោយបរិយាប័ននាប៉ុន្មានឆ្នាំកន្លងទៅ បញ្ហាប្រឈមមួយចំនួនត្រូវជួបប្រទះក្នុងការកំណត់អត្តសញ្ញាណកុមារតូចដែលមានពិការភាព ការយល់ដឹងមានកម្រិតក្នុងចំណោមឪពុកម្តាយលើការថែទាំ និងតម្លៃនៃការសិក្សារបស់កុមារតូចដែលមានពិការភាពការស្វែងរក និងផ្តល់សេវាការគាំពារ និងអភិវឌ្ឍន៍សម្រាប់កុមារដែលមានពិការភាពធ្ងន់ធ្ងរនៅមានកម្រិត ហើយបច្ចុប្បន្ននៅក្នុងស្រុកគោលដៅទាំង០៦ មានកុមារពិការពីកំណើតចំនួន៩៨នាក់ ស្រី៣៥នាក់។
លោកជំទាវ ស៊ិន ណម បានបញ្ជាក់ទៀតថា កិច្ចប្រជុំនាពេលនេះ គឺដើម្បីដោះស្រាយបញ្ហាប្រឈមទាំងអស់ និងជម្រុញការលើកកម្ពស់កិច្ចសហការក្នុងចំណោមមន្ទីរពាក់ព័ន្ធ សំដៅរួមចំណែកអនុវត្តគោលនយោបាយគាំពារ និងអភិវឌ្ឍន៍កុមារតូច។ ក្នុងនោះដែរការប្រជុំតម្រង់ទិសជាមួយមន្ទីរពាក់ព័ន្ធ និងស្រុកគោលដៅ វាជាការលើកកម្ពស់ការទទួលបាននូវការគាំពារ និងអភិវឌ្ឍន៍សម្រាប់កុមារតូចដែលពិការភាពជម្រុញការយល់ដឹងពីសារៈប្រយោជន៍នៃការអប់រំកុមារតូចប្រកបដោយបរិយាប័ន សេវាគាំពារនានាសម្រាប់កុមារដែលពីការភាព និងជាយន្តការសម្របសម្រួលអ្នកពាក់ព័ន្ធនៅថ្នាក់ក្រោមជាតិ និងបានបញ្ជាក់លទ្ធផលរំពឹងទុកនៃកិច្ចប្រជុំផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួលអត្ថទ៖ លោក អ៊ុន ណារាជ្យ