កាលពីថ្ងៃទី០១ ខែមិថុនា ឆ្នាំ២០២១ម្សិលមិញនេះ ថ្នាក់ដឹកនាំនៃទីបញ្ជាការដ្ឋានយោធភូមិភាគទី៤ បានប្រគល់វត្ថុបុរាណចំនួន៥ ជូនដល់អាជ្ញាធរជាតិអប្សរា ក្រោមវត្តមានឯកឧត្តម ហង់ ពៅ អគ្គនាយកអាជ្ញាធរជាតិអប្សរា ដើម្បីយកទៅថែរក្សា និងអភិរក្សបន្តទៀត ដែលវត្ថុបុរាណទាំង៥នេះ ត្រូវបានរកឃើញនារយៈកាលពេលកន្លងមក ។
ឯកឧត្ដមឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធាយោធភូមិភាគ៤ បានមានប្រសាសន៍ថា វត្ថុបុរាណទាំង៥នេះ រួមមាន ៖ ១.សសរពេជ្យមួយកំណាត់តូច , ២.កំពូលប្រាសាទតាមជ្រុងនៃប្រាសាទធំ , ៣.ឆ្នាំងថ្នាំមួយ , ៤.ដុំហោជាងផ្នែកខាងលើ មានកំណាត់ព្រះសិររូបព្រះមួយផ្នែក និង ៥. បង្គោលព្រះទិសមួយដុំ ត្រូវបានកងទ័ពរកឃើញនៅតាមទីកន្លែងផ្សេងៗកាលពីពេលកន្លងមក ហើយការប្រគល់វត្ថុបុរាណជូនដល់អាជ្ញាធរជាតិអប្សរានាពេលនេះ គឺមិនមែនជាលើកទី១ទេ ដែលកងទ័ពប្រគល់វត្ថុបុរាណជូនស្ថាប័នជំនាញក្នុងការថែរក្សានូវវត្ថុដ៏មានតម្លៃនេះ ។
សូមជម្រាបជូនថា ក្រៅពីការទទួលវត្ថុបុរាណចំនួន៥ ពីទីបញ្ជាការដ្ឋានយោធភូមិភាគទី៤នាពេលនេះនោះ គឺក្នុងរយៈកាលកន្លងមក អាជ្ញាធរជាតិអប្សរា តែងតែបានទទួលវត្ថុបុរាណពីស្ថាប័នពាក់ព័ន្ធ និងបងប្អូនប្រជាពលរដ្ឋនានាដែលបានប្រទះឃើញនិងស្ម័គ្រប្រគល់ជូនអាជ្ញាធរជាតិអប្សរា ធ្វើការថែរក្សា និងអភិរក្ស ដើម្បីសម្រាប់កូនចៅជំនាន់ក្រោយបានឃើញ ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
