លោក ញ៉ែម រស្មី មន្រ្តីបច្ចេកទេសនាយកដ្ឋានគ្រប់គ្រងទឹក នៃអាជ្ញាធរជាតិអប្សរា បានឲ្យដឹងនៅថ្ងៃទី០៩ ខែមិថុនានេះថា ប្រសិនបើគ្មានឧបស័គ្គទេការងាស្តារពើក និងស្មៅដែលកើតឡើងដោយសាររុក្ខជាតិតូចៗក្នុងទឹកដូចជា កំប្លោក និងស្លែរដែលកកនៅក្នុងទឹករយៈពេលយូរនៅក្នុងកសិន្ធុ នៃក្រុងអង្គរធំ នឹងបញ្ចប់នៅរយៈពេលបីខែខាងមុខទៀត។
មន្រ្តីបច្ចេកទេសរូបនេះបញ្ជាក់ថា ចាប់តាំងពីថ្ងៃអនុវត្តការងារស្តារពើកជំហានដំបូង កាលពីថ្ងៃទី២៦ ខែមេសា រហូតមកដល់បច្ចុប្បន្ននេះ ក្រុមការងាបានធ្វើការងារស្តារពើកស្មៅបានចំនួនជាង១៥.០០០ម៉ែត្រក្រឡា ពោល គឺអាចបញ្ចប់នារយៈពេល៣ខែខាងមុខ បើសិនជាមិនមានបញ្ហារាំងស្ទះណាមួយកើតឡើង។ ការងារនេះមិនអាចធ្វើលឿនទៅបាន ដោយសារពើកមានសភាពក្រាស់ ធ្ងន់ និង មានសត្វអាសិរពិស និងសត្វឈ្លើងនៅក្នុងពើក ដែលជាបញ្ហាប្រឈមខ្លះៗ សម្រាប់ក្រុមការងារចុះកាប់ពើក។ លោកថា ក្រោយពេលការងារស្តារពើកស្មៅដ៏ក្រាសនេះរួចរាល់ រំពឹងថាបរិស្ថាន និងសោភ័ណភាពនៅបរិវេណកសិន្ធុខាងលិចនៃក្រុងអង្គរធំ នឹងប្រែជាស្រស់ស្អាតឡើងវិញ ហើយក៏ជាទីទាក់ទាញភ្ញៀវទេសចរមកកម្សាន្តផងដែរ។
សូមជម្រាបថា ការងារស្ដារពើកជាជំហានដំបូងនេះ ធ្វើឡើងដោយក្រុមការងារនៃអាជ្ញាធរជាតិអប្សរា ក្រោមគំនិតផ្តួចផ្តើម និងជួយឧបត្ថម្ភ ដោយលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ,លោកជំទាវ ភឿង សកុណា ប្រធានក្រុមប្រឹក្សាភិបាលអាជ្ញាធរជាតិអប្សរា និងជារដ្ឋមន្រ្តីក្រសួងវប្បធម៌ និងវិចិត្រសិល្បៈ និងសប្បុរសជនមួយចំនួនទៀត៕
អត្ថបទ និងរូបភាព៖ លោក ជា ស្រស់ ,លោក ឈិត សាវី
កែសម្រួលអត្ថបទ៖ លោក អ៊ុន ណារាជ្យ
