នៅព្រឹកថ្ងៃទី១១ ខែមិថុនា ឆ្នាំ២០២១ រដ្ឋបាលស្រុកបន្ទាយស្រី បានបើកកិច្ចប្រជុំបូកសរុបលទ្ធផលការងារប្រចាំឆមាសទី១ និងលើកទិសដៅសម្រាប់ការងារប្រចាំឆ្នាំ២០២១ របស់ក្រុមការងាររាជរដ្ឋាភិបាលចុះជួយមូលដ្ឋាន ស្រុកបន្ទាយស្រី ក្រោមអធិបតិភាព លោក ង៉ាន់ ភិរុណ អភិបាលរងខេត្តសៀមរាប និងជាអនុប្រធានក្រុមការងារថ្នាក់ជាតិចុះមូលដ្ឋាន ដើម្បីធ្វើការត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលកម្ពុជា ដោយមានការអញ្ជើញចូលរួមពីសំណាក់ឯកឧត្តមលោកជំទាវ លោកលោកស្រីសមាជិក សមាជិកាក្រុមការងារថ្នាក់ជាតិចុះមូលដ្ឋានមួយចំនួនទៀត។
ក្នុងកិច្ចប្រជុំនោះ លោក ឃឹម ហ្វីណង់ អភិបាលស្រុកបន្ទាយស្រី បានបង្ហាញអំពីជំហរក្នុងដំណើររួមគ្នាជាមួយអាជ្ញាធរជាតិអប្សរា ដោយប្រកាន់យកលើចំណុចកណ្តាលមួយ ដើម្បីដោះស្រាយបញ្ហាប្រឈម ដើម្បីការអភិវឌ្ឍសហគមន៍ប្រជាពលរដ្ឋ និងអនុវត្តឲ្យបានល្អលើការអភិរក្ស និងអភិវឌ្ឍ តំបន់រមណីដ្ឋានបេតិកភ័ណ្ឌជាតិ។ ក្នុងនោះលោកអភិបាលស្រុក ក៏បានស្នើដល់អាជ្ញាធរអាជ្ញាធរអប្សរាចំពោះសំណើររបស់អាជ្ញាធរឃុំព្រះដាក់ ដែលសុំឲ្យមានការគាំទ្រពីសំណាក់អាជ្ញាធរជាតិអប្សរា លើគម្រោងកសាងកែលម្អផ្លូវ ៣ខ្សែ ដែលមានចម្ងាយសរុប ៦,៥០០ម៉ែត្រ ឆ្លងកាត់៣ភូមិ គឺភូមិតាត្រៃ ភូមិថ្នល់បណ្តោយ និងភូមិថ្នល់ទទឹង។ ចំពោះការស្នើនេះ គឺដោយសារតែគម្រោងកែលម្អកសាងផ្លូវនេះ ថ្វីត្បិតតែស្ថិតនៅក្នុងដែនភូមិសាស្រ្តរបស់រដ្ឋបាលឃុំព្រះដាក់ ក៏ប៉ុន្តែក៏ស្ថិតក្នុងតំបន់ការពារបេតិកភ័ណ្ឌផងដែរ។
ជាមួយគ្នានោះដែរ លោកអភិបាលស្រុក ក៏បានលើកឡើងនូវបញ្ហាសំខាន់ៗចំនួន៤ទៀត ដែលក្រុមការងារនឹងត្រូវធ្វើការដោះស្រាយ ដោយក្នុងនោះរួមមាន៖ ទី១,គម្រោងកែលម្អផ្លូវនៅឃុំព្រះដាក់ ដែលស្ថិតក្នុងតំបន់ជាប់ពាក់ព័ន្ធការគ្រប់គ្រងដោយអាជ្ញាធរជាតិអប្សរា ,ទី២.ការសាងសង់លំនៅដ្ឋានក្នុងតំបន់ដែលមានបូរាណស្ថាន ,ទី៣.ការពន្លឿនដំណោះស្រាយកាត់ធ្វៀលដីអាស្រ័យផលយូរឆ្នាំរបស់ប្រជាពលរដ្ឋ ស្ថិតក្នុងគម្របព្រៃឈើឆ្នាំ២០០២ និងទី៣.បញ្ហាជំងឺកូវីដ-១៩ ដែលបានធ្វើឲ្យប៉ះពាល់ដល់ជីវភាពប្រជាពលរដ្ឋស្រុកបន្ទាយស្រី ដែលពឹងផ្អែកលើវិស័យទេសចរណ៍។
មាប្រសាសន៍ក្នុងឱកាសនោះដែរ លោក ង៉ាន់ ភិរុណ បានគូរបញ្ជាក់ថា បញ្ហាទាំងនេះ វាត្រូវបានពន្យាពេលដោះស្រាយដោយសារតែវិបត្តិជំងឺឆ្លងកូវីដ-១៩ ។ ក្នុងងនោះអ្វីដែរត្រូវធ្វើបន្ត គឺលោកបានជំរុញដល់ក្រុមការងារនៅស្រុកបន្ទាយស្រីត្រូវដោះស្រាយនូវបញ្ហា និងក្តីកង្វល់របស់ប្រជាពលរដ្ឋជាម្ចាស់សំណួរ និងសំណូមពរដោយឈរលើគោលការណ៍រួម និងអនុវត្តតាមគោលនយោបាយឈ្នះឈ្នះ។ ទន្ទឹមនឹងនេះ ចំពោះបញ្ហាណាដែលថ្នាក់ស្រុកដោះស្រាយមិនបាន ត្រូវលើកបញ្ហានេះជូនថ្នាក់ដឹកនាំពិនិត្យ និងដោះស្រាយ ជៀសវាងទុកបញ្ហានៅនឹងកន្លែង ដែលធ្វើឱ្យមានការថ្នាំងថ្នាក់រវាងប្រជាពលរដ្ឋជាមួយនឹងអាជ្ញាធរ។
ជាការឆ្លើយតបជុំវិញបញ្ហាមួយចំនួន ឯកឧត្តម ម៉ី ម៉ារ៉ាឌី ទីប្រឹក្សាក្រសួងវប្បធម៌ និងវិចិត្រសិល្បៈជួយការងារអាជ្ញាធរជាតិអប្សរា និងជាអនុប្រធាននៃក្រុមការងារចុះមូលដ្ឋានស្រុកបន្ទាយស្រី បានគូសបញ្ជាក់ថា រាល់ការសាងសង់សំណង់សាធារណៈរបស់រដ្ឋនៅក្នុងតំបន់ដែលគ្រប់គ្រងដោយអាជ្ញាធរជាតិអប្សរា ពុំមានការហាមឃាត់នោះឡើយ ក៏ប៉ុន្តែតម្រូវឲ្យមានការឆ្លងកាត់ការពិនិត្យរបស់មន្រ្តីជំនាញ អំពីលក្ខណៈបច្ចេកទេស បញ្ជៀសផលប៉ះពាល់ដល់កិច្ចការអភិរក្សតំបន់បេតិកភ័ណ្ឌ តាមទិសស្លោកដែលថា អភិរក្ស គឺដើម្បីអភិវឌ្ឍ ហើយអភិវឌ្ឍដើម្បីអភិរក្ស។ ដើម្បីឲ្យការសម្របសម្រួលប្រកបដោយតម្លាភាព កិច្ចប្រជុំនេះក៏បានបង្ហាញឲ្យឃើញផងដែរ អំពីជំហរនៃកិច្ចសហការរួមគ្នា រវាងអាជ្ញាធរថ្នាក់ក្រោមជាតិ ជាមួយអាជ្ញាធរជាតិអប្សរា ដែលត្រូវធ្វើដំណើរទន្ទឹមគ្នា អនុវត្តតួនាទីនៅលើចំណុចកណ្តាលមួយ ដើម្បីបំរើផលប្រយោជន៍ប្រជាសហគមន៍ និងដើម្បីការពារ-អភិវឌ្ឍបានល្អ តំបន់រមណីដ្ឋានបេតិកភ័ណ្ឌជាតិ ចំពោះបញ្ហាដែលមិនទាន់ដោះស្រាយមិនបាន លោកនឹងលើកបញ្ហានេះជូនថ្នាក់ដឹកនាំពិនិត្យ និងដោះស្រាយបន្តទៀត៕
អត្ថបទ និង រូបភាព៖ លោក ងិន គឹមឡេង
កែសម្រួលអត្ថបទ៖ លោក អ៊ុន ណារាជ្យ
