ប្រជាពលរដ្ឋចំនួន២០គ្រួសារ និងប្រជាការពារភូមិ២០នាក់ ដែលរងផលប៉ះពាល់ពីជំងឺកូវីដ-១៩ ទទួលបានអំណោយពីសមាគមចលនាយុវជនកម្ពុជាក្រុម១៥៧
នាព្រឹកថ្ងៃទី១៣ ខែមិថុនា ឆ្នាំ២០២១នេះ ដោយមានការណែនាំរបស់ឯកឧត្តម ហ៊ុន ប៉ូគា ប្រធានសមាគមចលនាយុវជនកម្ពុជាក្រុម១៥៧ សាខាខេត្តសៀមរាប លោក សឹង្ហ សំរិទ្ធិ អនុប្រធាសមាគមន បានដឹកនាំសមាជិកសមាជិកា នៃសមាគមចលនាយុវជនកម្ពុជាក្រុម១៥៧ ចុះចែកអំណោយជូនដល់ប្រជាពលរដ្ឋ និងប្រជាការពារភូមិចំនួន២០គ្រួសារ ដែលមានជីវភាពខ្វះខាតនឹងរងផលប៉ះពាល់ពីជំងឺកូវីដ-១៩ នៅក្នុងភូមិស្ទឹងថ្មី សង្កាត់ស្វាយដង្គំ ក្រុងសៀមរាប។
មានប្រសាសន៏ក្នុងឱកាសនោះ លោក នួន ពុទ្ធារ៉ា អភិបាលនៃគណៈអភិបាលក្រុងសៀមរាប ក៏ដូចជាការផ្តាំផ្ញើរដល់បងប្អូនប្រជាពលរដ្ឋឲ្យថែរក្សាសុខភាព និងសូមមេត្តាចូលរួមអនុវត្តតាមប្រសាសន៍ណែនាំរបស់
សម្តេចតេជោ ហ៊ុន សែន នូវវិធានការ ៣កុំ និង៣ការពារ ឲ្យបានខ្ជាប់ខ្ជួន ដើម្បីចៀសឲ្យផុតពីជំងឺដ៏កាចសាហាវនេះ។ ជាមួយគ្នានោះក្រោមការខិតខំប្រឹងប្រែងរបស់អាជ្ញាធរខេត្ត/ក្រុង ស្ថាប័នជំនាញពាក់ព័ន្ធ រួមទាំងការចូលរួមសហការដោយបងប្អូនប្រជាពលរដ្ឋជាដើម ក្នុងការចូលរួមទប់ស្កាត់នៅជំងឺកូវីដ-១៩ សម្រាប់កាត់ផ្តាច់ព្រឹត្តិការណ៍សហគមន៍ ២០ កុម្ភៈ ២០២១ គឺសំដៅឆ្ពោះទៅរកការងើបឈរឡើងវិញនៃកំណើនសេដ្ឋកិច្ចកម្ពុជា ក្រោមការត្រៀមទុកដោយយន្តការនៃយុទ្ធសាស្រ្ត កែប្រែវិបត្តិកូវីដឲ្យក្លាយជាឱកាស នៃការអភិវឌ្ឍន៍ក្នុងសង្គមជាតិនោះ។
ក្នុងនោះដែរ លោកអភិបាលក្រុង ក៏បានបង្ហាញនូវក្តីសោមនស្សរីករាយ ចំពោះទឹកចិត្តដ៍ឧត្តុង្គឧត្តម របស់សមាគមចលនាយុវជនកម្ពុជាក្រុម១៥៧ សាខាខេត្តសៀមរាប ដែលបាននាំយកអំណោយមកប្រគល់ជូននាពេលនេះ ក្នុងពេលដែលយើងទាំងអស់គ្នាកំពុងប្រឈម និងជួបការលំបាកដោយសារវិបត្តិជំងឺកូវីដ-១៩ ដើម្បីចូលរួមចំណែកជាមួយរាជរដ្ឋាភិបាល ក៏ដូចជារដ្ឋបាលក្រុង រដ្ឋបាលខេត្តសៀមរាប ក៏ដូចជាអាជ្ញាធរមូលដ្ឋានផងដែរ។
បើតាមលោក សឹង្ហ សំរិទ្ធិ អនុប្រធាសមាគមនចលនាយុវជនកម្ពុជាក្រុម ១៥៧ សាខាខេត្តសៀមរាប បានមានប្រសាសន៍ដែរថា នៅក្នុងបរិបទជំងឺកូវីដ-១៩ នេះ សូមឲ្យបងប្អូនប្រជាពលរដ្ឋទាំងអស់ មេត្តាយកចិត្តទុកដាក់ឲ្យបានខ្ពស់បន្ថែមទៀត ក្នុងការធ្វើអនាម័យជាប្រចាំ ដើម្បីការពារខ្លួនយើង ក្រុមគ្រួសារយើង ក៏ដូចជាសង្គមជាតិទាំងមូលផងដែរ។ ចំពោះអំណោយដែលបានប្រគូលជូនសម្រាប់ពេលនេះ គឺបានមកពីសប្បុសជននានា ដែលបានឧបត្ថម្ភដល់សមាគមន៍ទុកសម្រាប់ចែកជូនដល់បងប្អូនពលរដ្ឋខ្វះខាតក្នុងជីវភាពរស់នៅប្រចាំថ្ងៃ ដើម្បីចូលរួមចំណែកជាមួយរាជរដ្ឋាភិបាល។
សូមជម្រាបជូនថា ចំពោះអំណោយដែលក្រុមការងារនាំយកមកប្រគល់ជូនក្នុងពេលនោះ គឺប្រជាពលរដ្ឋចំនួន២០គ្រួសារ ដោយក្នុងមួយគ្រួសារទទួលបាន៖ អង្ករ ២០គីឡូក្រាម ,ទឹកសុទ្ធ១កេស ,មីម៉ាម៉ា១កេស ,ត្រីខ១យួរ ,ទឹកស៊ីអ៊ីវ១យួរ ,ទឹកត្រី១យួរ ,ប្រេងឆា១ដប ,ស្ករស១គីឡូ ,ប៊ីចេង១កញ្ចប់ ,អំបិល១គីឡូ និងថវិការចំនួន២០០០០រៀល។ ដោយឡែកចំពោះកម្លាំងប្រជាការពារចំនួន២០នាក់ ក្នុងម្នាក់ទទួលបាន៖ ទឹកសុទ្ធ១កេស ,ម៉ាស១ប្រអប់ ,ទឹកអាកុល១ដប និងថវិការចំនួន២០០០០រៀល។ ក្នុងនោះសមាគមនក៏បានប្រគល់ជូនម៉ាសចំនួន២០ប្រអប់ ,ទឹកអាកុល២០ដប និងទឹកសុទ្ធ៥កេស ដល់សាលាបឋមសិក្សាស្ទឹងថ្មីផងដែរ៕
អត្ថបទ និងរូបភាព៖ លោក ស៊ាន សុផាត
កែសម្រួលអត្ថបទ៖ លោក អ៊ុន ណារាជ្យ
