ខេត្ដសៀមរាប មិនត្រឹមតែជាតំបន់ទេសចរណ៍មានសក្ដានុពលទាក់ទាញភ្ញៀវទេសចរណ៍ដ៍ល្បីល្បាញនៅលើពិភពលោកប៉ុណ្ណោះទេ ប៉ុន្ដែខេត្ដមួយនេះបានបានបង្ហាញ សមិទ្ធិផលផ្នែកកសិកម្មដ៍កម្រថែមទៀតផង គឺផ្លែទុរេន ផ្លែតាង៉ែន ឬមៀនប៉ៃលិន។ ជាក់ស្ដែងចំការទុរេន មួយកន្លែង ស្ថិតនៅជើងភ្នំគូលេន ក្នុងចំណុចចំបន់បីដើម ឃុំត្បែង ស្រុកបន្ទាយស្រី ខេត្ដសៀមរាប ដែរបាននឹងកំពុងទទួលផលច្រើនគួរឱ្យកត់សំគាល់ផងដែរ ជាពិសេសមានទីផ្សារខ្ពស់។
កសិករមួយរូប ដែលជាម្ចាស់ចំការទុរេន លោក កុយ សេងលី លោកមានប្រសាសន៍នៅថ្ងៃទី១៣ ខែមិថុនា ឆ្នាំ២០២១នេះថា ទុរេនរបស់លោក មានប្រមាណជាង១៧០ដើម នៅលើផ្ទៃដីជាង២ហិកតា បាននឹងកំពុងទទួលផលរយៈពេល២ឆ្នាំហើយ ប៉ុន្ដែឆ្នាំមុនទទួលបានផលតិចតួចប្រមាណ១តោន ដោយសារដើមនៅតូចៗ។ លោកបន្ដថា ជាមួយគ្នានោះ ដំណាំធទុរេនរបស់លោកកាលពិឆ្នាំមុនមានការជួបប្រទះបញ្ហាមួយចំនួន ជាពិសេសបញ្ហាអាកាសធាតុតែម្ដង ដោយសារនៅដើមរដូវវស្សាមានភ្លៀងធ្លាក់លាយលំនឹងខ្យល់ខ្លាំងធ្វើឲ្យក្ដិបទុរេនមួយចំនួនធំត្រូវបានធ្លាក់ខូចខាត។
កសិកររូបនេះបានឲ្យដឹងទៀតថា នៅឆ្នាំនេះទុរេនរបស់គាត់ គឺទទួលបានផលកើនជាងឆ្នាំមុនគួរឱ្យកត់សំគាល់ ដែលបាននឹងកំពុងចាប់ផ្ដើមលក់ក្នុងទីផ្សារ ក្នុងខេត្ដសៀមរាប ចាប់តាំងពីខែមេសាកន្លងមក ហើយទុរេននេះ អាចអស់ទៅវិញក្នុងអំឡុងខែកញ្ញា ឆ្នាំ២០២១ខាងមុខ។ បច្ចុប្បន្នដើមទុរេនដែលបានផ្លែនេះ មានអាយុកាល៥ឆ្នាំមកហើយ ដែលមានប្រភេទពូជសូនី និងអាម៉ាន់ថង ដែលលោកថា ជាសមិទ្ធិផលកសិកម្មផ្នែកទុរេនដំបូងគេររបស់អ្នកសៀមរាប និងជាទុរេនដាំដោយប្រើជីគីមី គឺជីធម្មជាតិពិតៗ។ ជាមួយគ្នានោះទុរេនសៀមរាបនេះ មានទីផ្សារគួរឱកត់សំគាល់ ដោយមួយថ្ងៃៗមានអ្នកកម្មង់ទិញនៅចំការមិនដាច់ឡើយ។ លោកបញ្ជាក់ថា ការដាំដើមទុរេនមានផលលំបាកច្រើន ដោយយើងត្រូវមើលថែទាំឱបានដិតដល់ទើបទទួលបានផលល្អ។
លោក កុយ សេងលី បានបន្ដថា ការបង្កើតមុរបរធ្វើចំការទុរេននេះ ក្រោយពីលោកបានឃើញ ការដាំដើមទុរេននៅប្រទេសថៃ និងមានចេះជំនាញផ្នែកកិសកម្មនេះ មកពីក្រសួងកសិកម្ម និងអង្គការមួយចំនួនផងដែរ។ លោកបានបន្ដថា ក្រៅពីដាំដើមទុរេនជាង១៧០ដើមនោះ លោកក៍បានដាំដើមក្រូចពោធិ៍សាត់២០០ដើម និងក្រូចថ្លុង៥០ដើមផងដែរ។
គួររំលឹកផងដែរថា ការពីពេលថ្មីកន្លងទៅនេះ លោក ឃឹម ហ្វីណង់ អភិបាលស្រុកបន្ទាយស្រី បានប្រកាសតាមបណ្ដាញសង្គមហ្វេសប៊ុកផ្ទាល់ ដោយបានណែនាំដល់ឲ្យប្រជាពលរដ្ឋ មកចាំអារម្មណ៍ពីផ្លែទុរេន នៅស្រុកបន្ទាយស្រី ដែលជាសមិទ្ធិផលដាំដោយក្នុងស្រុកដោយផ្ទាល់ មិនចាញ់អ្នកដាំផ្លែទុរេននៅខេត្ដផ្សេងៗនោះឡើយ។
អត្ថបទ និង រូបភាព៖ លោក ឈិត សាវី
កែសម្រួលអត្ថបទ៖ លោក អ៊ុន ណារាជ្យ
