កន្លែងបញ្ចុះសពរបស់សមាគមមេតូឌីសមួយកន្លែង ស្ថិតនៅក្នុងភូមិ បុស្សក្រឡាញ់ សង្កាត់ជ្រាវ ក្រុងសៀមរាប ត្រូវបានប្រជាពលរដ្ឋនៅទីនោះ ស្នើសុំអាជ្ញាធរពាក់ព័ន្ធ ឱ្យជួយប្ដូរទីតាំងទៅកន្លែងផ្សេង ដោយសារកន្លែងបញ្ចុះសពនេះ បានប៉ះពាល់ការរស់នៅរបស់ពួកគាត់ ជាពិសេសសមានសពខ្លះបានជះក្លិនស្អុយរលួយ បណ្ដាលអោយប៉ះពាល់ដល់បរិស្ថាន។
តំណាងប្រជាពលរដ្ឋក្នុងចំណោមស្មានមេដៃចំនួន១០០គ្រូសារ ដែលមានទីតាំងក្នុងតំបន់នោះ លោក អៀម គុណ និងអ្នកស្រី រ៉ាស៊ី បានឲ្យដឹងនៅថ្ងៃទី២១ ខែមិថុនានេះថា កន្លែងបញ្ចុះសពនេះបានធ្វើឲ្យប៉ះពាល់ដល់ការរស់នៅរបស់ពួកកាត់ជាច្រើនឆ្នាំមកហើយ ប៉ុន្ដែពួកគាត់ចេះទ្រាំរស់នៅដោយសារគ្មានជម្រើស ដោយសារកន្លែងបញ្ចុះសពនេះ បានធ្វើឲ្យប៉ះពាល់ដល់សតិអារម្មណ៍មនុស្សចាស់ និងកូនក្មេងដោយសារវាមានក្លិនស្អុយចេញពីកន្លែងបញ្ចុះសព ជាពិសេសនៅពេលយប់។ ជាមួយនោះ ការបញ្ចុះសពបានធ្វើអោយប៉ះពាល់ដល់ប្រភពទឹកពីក្នុងអណ្ដូងផងដែរ ព្រោះពេលភ្លៀងម្ដងទឹកមានក្លិនស្អុយ។
ពួកគាត់បន្ថែមថា ពួកគាត់មិនបានស្អប់ខ្ពើមសពអ្នកកាន់សាសនាផ្សេងក្រៅពីព្រះពុទ្ធនោះទេ ប៉ុន្ដែការបញ្ចុះសពក្បែមនស្សរស់នេះ ពិតជាធ្វើអោយអារម្មណ៍ពួកគាត់ភ័យខ្លាច ហើយមានពេលខ្លះមានរបើកម៉ុង ឆ្អឹងសាកសពឆ្កែពាំចេញពីទីតាំងបញ្ចុះសព ដែលបណ្ដាលអោយមានការភ័យខ្លាចដល់មនុស្សនៅក្នុងភូមិ។ ពួកគាត់ចង់អោយអាជ្ញាធរពាក់ព័ន្ធ និងសមាគមបញ្ចុះសពមេតូឌីស យកម៉ុងសាកសពទៅដាក់នៅទីតាំងផ្សេង ដើម្បីអាជ្ញាធរមូលដ្ឋានអភិវឌ្ឍន៍ភូមិអោយមានភាពស្រស់ស្អាត រស់នៅដោយមានបរិស្ថានល្អ។
ទាក់ទងបញ្ហានេះ លោក លី សុភ័ក្ដ ប្រធានសមាគមសពមេតូឌីស ខេត្ដសៀមរាប លោកមានប្រសាសន៍ថា ក្រោយពីការស្នើសុំពីប្រជាពលរដ្ឋ លោកបានពិភាក្សាជាមួយក្រុមជំនុំមេតូឌីស ព្រមទាំងក្រុមគ្រួសារសព នឹងសម្រេចយកទៅដាក់ទីតាំងផ្សេង ព្រោះទីនោះក៍ពិបាកក្នុងដឹកសពទៅតំកល់ផងដែរ ដោយសារគ្មានផ្លូវចេញចូល ប្រជាពលរដ្ឋហាមឃាត់ជាដើម។ លោកបានបន្ដថា ពួកគាត់បានស្រុះស្រួលជាមួយសមាជិកគ្រួសារសព សម្រេចប្ដូរទៅតំកល់សពនៅក្នុងស្រុកសូទ្រនិគម ខេត្ដសៀមរាប លើផ្ទៃដី១ហិកតា។
លោកបន្ថែមថា ដីបញ្ចុះសពនៅក្នុងសង្កាត់ជ្រាវបច្ចុប្បន្ននេះ បានបានបញ្ចុះសពជាង២០ម៉ុង ដែលជាអ្នកកាន់សាសនាគ្រីស្ទៀន តាំងពីឆ្នាំ២០០០មកម្លេះ។ ក្រោយពេលបានបញ្ចុះសពបានខ្លះៗហើយ ត្រូវបានប្រជាពលរដ្ឋនៅទីនោះ ស្នើសុំអោយផ្អាកវិញ ព្រោះតែប៉ះពាល់ដល់ការរស់នៅរបស់ពួកគាត់ ជាមួយគ្នានោះលោកក៍បានផ្អាកដឹកសពទៅតំកល់ទីនោះ រយះពេលពីរឆ្នាំ។
ជុំវិញករណីនេះ លោក ក្អោប រ៉ន ចៅសង្កាត់ជ្រាវ ក្រុងសៀមរាប មានប្រសាសន៍ថា លោកក៍បានទទួលសំណើររបស់ប្រជាពលរដ្ឋហើយ និងបានបញ្ជូនសុំការឯកភាពពីសាលាក្រុងសៀមរាបបន្ដ។ ចំពោះទីតាំងកប់សពនោះពិតជាបានធ្វើអោយប៉ះពាល់ដល់ការរស់នៅរបស់ប្រជាពលរដ្ឋជាច្រើនឆ្នាំមកហើយ៕
អត្ថបទ និង រូបថត ៖ លោក ឈិត សាវី
កែសម្រួលអត្ថបទ ៖ លោក អ៊ុន ណារាជ្យ
