នៅព្រឹកថ្ងៃទី0២ ខែកក្កដា ឆ្នាំ២០២១នេះ ឯកឧត្តម អ៊ុក ប្រាថ្នា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានគណៈកម្មការតាមដានការផ្សព្វផ្សាយព័ត៌មានក្លែងក្លាយ បានដឹកនាំកិច្ចប្រជុំពិនិត្យវឌ្ឍនភាពការងារប្រចាំឆមាសទី១ ឆ្នាំ២០២១ តាមរយៈវីឌីអូ Zoom ដើម្បីត្រួតពិនិត្យ និងវាយតម្លៃលទ្ធផលការងារដែលគណៈកម្មការបានអនុវត្តក្នុងរយៈពេល ០៦ខែ ឆ្នាំ២០២១កន្លងទៅ និងលើកទិសដៅបន្តក្នុងការទប់ស្កាត់ការផ្សាយ និងចែករំលែកព័ត៌មានមិនពិត ។
មានប្រសាសន៍បើកកិច្ចប្រជុំ ឯកឧត្តម អ៊ុក ប្រាថ្នា បានបង្ហាញថា បច្ចុប្បន្នស្ថានភាពនៃការផ្សាយព័ត៌មានក្លែងក្លាយនាពេលបច្ចុប្បន្ន ហាក់មានសភាពធូស្រាលបន្តិចហើយបន្ទាប់ពីគណៈកម្មការបានសហការអនុវត្តចាត់វិធានការ និងត្រួតពិនិត្យជាប្រចាំជាមួយស្ថាប័នពាក់ព័ន្ធ លើការផ្សព្វផ្សាយរបស់ជនអគតិមួយចំនួន។ ចំពោះការផ្សព្វផ្សាយព័ត៌មានក្លែងក្លាយបច្ចុប្បន្ននេះ បង្កឡើងដោយជនអនាមិក ដើម្បីបំពុលសង្គម និងវាយប្រហារមកលើរាជរដ្ឋាភិបាល ក្នុងន័យឱ្យសាធារណៈជនយល់ច្រឡំមកលើការអនុវត្តការងាររបស់ថ្នាក់ដឹកនាំប្រទេស។
ក្នុងឱកាសនោះដែរ ឯកឧត្តម ផុស សុវណ្ណ អនុប្រធានអចិន្ត្រៃគណៈកម្មការតាមដានការផ្សព្វផ្សាយព័ត៌មានក្លែងក្លាយ បានបញ្ជាក់ថា ក្នុងរយៈពេល០៦ខែ ឆ្នាំ២០២១ គណៈកម្មការតាមដានការផ្សព្វផ្សាយព័ត៌មានក្លែងក្លាយ បានស្រង់ប្រភពដែលផ្សព្វផ្សាយវីដេអូពាក់ព័ន្ធនឹងដំណឹងក្លែងក្លាយ ព័ត៌មានមិនពិត ញុះញង់ បំពុលសង្គម និងជេរប្រមាថថ្នាក់ដឹកនាំសរុបចំនួន ៩០០ករណី រួមមាន៖ ញុះញង់ រិះគន់រាជរដ្ឋាភិបាល និងប្រឌិតបំភ្លៃកាពិតចំនួន ៤១៣ករណី, ជេរប្រមាថព្រះមហាក្សត្រ និងថ្នាក់ដឹកនាំចំនួន ៣៤៦ករណី និងព័ត៌មានមិនពិត និងបំពុលសង្គមចំនួន ៩២ករណី។
ឯកឧត្តម ផុស សុវណ្ណ បញ្ជាក់ទៀតថា ក្នុងចំណោមព័ត៌មានមិនពិតខាងលើ គណៈកម្មការបានចាត់វិធានដូចជា បញ្ជូនទៅក្រុមការងារអន្តរក្រសួងដើម្បីស្រាវជ្រាវ និងចាត់វិធានការចំនួន ៥៣ករណី ក្នុងនោះ៖ យូធូប ៣ករណី, Tik Tok ២៣ករណី, គេហទំព័រ ២ករណី, ហ្វេសប៊ុក ២៥ករណី ហើយសមត្ថកិច្ចបានចាត់វិធានការជាបន្តបន្ទាប់ មានទាំងអប់រំ ណែនាំ ធ្វើកិច្ចសន្យា មានទាំងកសាងសំណុំរឿងបញ្ជូនទៅតុលាការសម្រាប់ជនបង្កដែល នៅក្នុងស្រុក។ ដោយឡែក ក្រុមជនបង្កដែលនៅក្រៅប្រទេស គឺបានកំណត់មុខសញ្ញា និងកសាងសុំរឿងត្រៀមចាត់វិធានការបន្ត។ ជាមួយគ្នានេះ ក្រសួងព័ត៌មានក៏បានសម្រេច លុបអាជ្ញាប័ណ្ណរបស់អង្គភាពព័ត៌មានចំនួន០៨ ដែលបានអនុវត្តខុសក្រមសីលធម៌ និងវិជ្ជាជីវៈសារព័ត៌មានផងដែរ ។
ឯកឧត្តមបញ្ជាក់បន្ថែមថា ជាវិធានការ ដើម្បីបន្សាបព័ត៌មានក្លែងក្លាយប្រព័ន្ធផ្សព្វផ្សាយទាំងរដ្ឋ ឯកជន និងអ្នកជំនាញកន្លងមកបានចូលរួមបញ្ចាក់ បំភ្លឺ និងផ្សព្វផ្សាយបន្សាបនូវរាល់ការផ្សាយព័ត៌មានមិនពិតទាំងឡាយ ជាពិសេសក្នុងអំឡុងនៃការឆ្លងរីករាលដាលជំងឺកូវីដ-១៩, យុទ្ធនាការចាក់វ៉ាក់សាំងការពារកូវីដ-១៩ ,ការអនុវត្តវិធានការបិទខ្ទប់ និងបញ្ហាសង្គមនានាជាដើម៕
អត្ថបទ៖ លោក បុង ឆវន្ត
កែសម្រួល៖ លោក អ៊ុន ណារាជ្យ
