លោកស្រី សារឿន ចន្នី អ្នកសម្របសម្រួល នៃមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព ( PDP ) ប្រចាំខេត្តសៀមរាប បានបញ្ជាក់កាលពីថ្ងៃទី០១ ខែកក្កដា ឆ្នាំ២០២១នេះថា ប្រជាពលរដ្ឋទាំងអស់ រួមទាំងយុវវ័យ ដែលបាននឹងកំពុងមានទំនុកចិត្តលើខ្លួនឯង និងលើអ្នកដទៃ ជាពិសេសអ្នកដែលបានចាក់វ៉ាក់សាំងការពារជំងឺកូវីដ-១៩ ហើយ ដោយបានប្រមូលផ្ដុំជួបជុំគ្នា សុទ្ធសឹងតែអាចនឹងក្លាយជាភ្នាក់ងារចម្លងជំងឺកូវីដ-១៩ ទៅក្រុមគ្រួសារសាច់ញាតិ បងប្អូន និងមនុស្សជុំវិញខ្លួន បើសិនជាមិនចូលរួមអនុវត្តនូវវិធានការការពាររបស់រាជរដ្ឋាភិបាល និងសេចក្ដីណែនាំរបស់ក្រសួងសុខាភិបាល។
លោកស្រី សារឿន ចន្នី មានប្រសាសន៍ឲ្យដឹងទៀតថា បើទោះបីជាក្នុងបរិបទកូវីដ ១៩នេះ ប្រជាពលរដ្ឋ ជាពិសេសយុវវ័យបានចូលរួមភាគច្រើនជាមួយរាជរដ្ឋាភិបាល ក្នុងការទប់ស្កាត់ការឆ្លងរាលដាលនៃមេរោគកូវីដ ១៩ យ៉ាងណាក្ដី ក៏នៅមានប្រជាពលរដ្ឋ និង យុវវ័យមួយចំនួនតូច នៅតែលួចលាក់ជួបជុំប្រមូលផ្ដុំគ្នា ប្រើប្រាស់គ្រឿងស្រវឹង ដែលនេះនៅតែជាបញ្ហាចំបង និង ជាផ្នែកមួយនៃការចម្លងជំងឺកូវីដ ១៩ ក្នុងមូលដ្ឋានផងដែរ ដូច្នេះក្នុងឱកាសនេះ សូមអំពាវនាវដល់ប្រជាពលរដ្ឋទាំងអស់ រួមទាំងយុវវ័យ កុំឲ្យមានការទុកចិត្តលើខ្លួនឯង និងអ្នកដទៃ ជាពិសេសចំពោះអ្នកដែលបានចាក់វ៉ាក់សាំងការពារជំងឺកូវីដ ១៩ រួចហើយ ត្រូវតែបន្ដអនុវត្តនូវវិធានការរបស់រាជរដ្ឋាភិបាល ៣កុំ និង ៣ការពារឲ្យបានខ្ជាប់ខ្ជួនទេនោះ ក្នុងនោះ៣កុំ មាន ៖ កុំទៅកន្លែងបិទជិត គ្មានខ្យល់ចេញ ចូល , កុំទៅកន្លែងមនុស្សច្រើនកុះករ , កុំប៉ះពាល់គ្នា និង ៣ការពារ មាន ៖ ត្រូវពាក់ម៉ាស់នៅគ្រប់ទីសាធារណៈ , លាងដៃជាមួយសាប៊ូ អាល់កុលឬជែល , រក្សាគម្លាតសង្គមជាដើម។
សូមរំលឹកថា កាលពីពេលថ្មីនេះ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងការពារជំងឺកូវីដ-១៩ ក្នុងក្របខណ្ឌទូទាំងប្រទេស មានប្រសាសន៍ថា វ៉ាក់សាំងការពារជំងឺកូវីដ-១៩ គឺការពារបានចំពោះតែបុគ្គល ដោយការពារមិនអ្នកជំងឺធ្លាក់ក្នុងសភាពធ្ងន់ធ្ងរ ឬស្លាប់តែប៉ុណ្ណោះ មិនមែនការពារការចម្លងជំងឺកូវីដ-១៩ នោះឡើយ ដូចនេះ ប្រជាពលរដ្ឋទាំងដែលបានចាក់វ៉ាក់សាំងការពារជំងឺកូវីដ-១៩ នៅតែត្រូវបន្ដអនុវត្តនូវវិធានការរបស់រាជរដ្ឋាភិបាល និងសេចក្ដីណែនាំរបស់ក្រសួងសុខាភិបាល ជាពិសេសគឺហាមមិនឲ្យការជួបជុំប្រមូលផ្ដុំគ្នាជាដាច់ខាត៕
អត្ថបទ ៖ លោកស្រី ហែម បូរ៉ាន្នី
កែសម្រួល៖ លោក អ៊ុន ណារាជ្យ
