នៅព្រឹកថ្ងៃទី០៤ ខែ កក្កដាឆ្នាំ២០២១នេះ ឯកឧត្តម អែល សៀត សមាជិកក្រុមប្រឹក្សាខេត្ត និងជាប្រធានក្រុមការងារដោះស្រាយបញ្ហាគ្រោះមហន្តរាយ ដែលបណ្តាលមកពីការរីករាលដាល នៃជម្ងឺកូវីដ-១៩ របស់សហគមន៍ខ្មែរឥស្លាមខេត្ត បានដឹកនាំក្រុមការងារចុះទៅកាន់ទីតាំងដីសម្រាប់ត្រៀមទុកតម្កល់សពសាសនិកឥស្លាមក្នុងករណីស្លាប់ដោយសារឆ្លងជម្ងឺកូវីដ-១៩ នៅក្នុងភូមិគោកក្រើល ឃុំលាងដៃ ស្រុកអង្គរធំ ខេត្តសៀមរាប។ ក្នុងការជីករណ្តៅទុកត្រៀមសម្រាប់បញ្ចុះសពរបស់បងប្អូនសាសនិកឥស្លាមដែលបានស្លាប់ដោយសារជម្ងឺកូវីដ-១៩ ធ្វើឡើងដោយគោរពតាមអនុសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីពេលកន្លងមក។ ក្នុងការចុះទៅពិនិត្យ និងជីករណ្តៅសម្រាប់បញ្ចុះសពនោះ ក៏មានការអញ្ជើញចូលរួមពីសំណាក់លោក ឡុង រដ្ឋារក្ស អភិបាល នៃគណ:អភិបាលស្រុកអង្គរធំ និងលោកអធិការស្រុក លោកមេបញ្ជាការកងរាជអាវុធហត្ថស្រុក ព្រមទាំងមានអាជ្ញាធរភូមិ ឃុំគោកគ្រើល ចូលរួមផងដែរ ។
ឯកឧត្តម អែល សៀត សមាជិកក្រុមប្រឹក្សាខេត្ត និងជាប្រធានក្រុម ការងារនេះ បានមានប្រសាសន៍ថា ចំពោះការជីករណ្តៅត្រៀមទុកនេះ គឺមិនមែនជាការប្រមាថដល់អាយុជីវិតរបស់បងប្អូនសាសនិកឥស្លាម ដែលបានឆ្លងជម្ងឺកូវីដ-១៩នោះទេ គឺគ្រាន់តែដើម្បីរៀបចំត្រៀមទុកការពារទុកជាមុន និងដើម្បីគាំទ្រដល់ក្រុមការងារដែលត្រូវរៀបចំបញ្ចុះសពឲ្យប្រព្រឹត្តទៅដោយរលូន និងទាន់ពេលវេលាតែប៉ុណ្ណោះ ។ ឯកឧត្តម ក៏បានមានប្រសាសន៍បញ្ជាក់ថា ពេលនេះក្រុមការងារបានធ្វើការជីករណ្តៅត្រៀមទុក បានចំនួន ៥រណ្តៅ ហើយចំពោះការជីករណ្តៅទុកសម្រាប់បញ្ចុះសពនេះ គឺជាថវិការបស់បងប្អូនសប្បុសរសជនខ្មែរសាសនិកឥស្លាម ក្នុងខេត្តសៀមរាប ដែលបានចូលរួមបរិច្ចាគដល់ក្រុមការងារដោះស្រាយបញ្ហាគ្រោះមហន្តរាយដែលបណ្តាលមកពីការរីករាលដាលនៃជម្ងឺកូវីដ-១៩ របស់សហគមន៍ខ្មែរឥស្លាមខេត្ត ផងដែរ៕
អត្ថបទ និងរូបភាព: លោកទ្រា ពន្លឺ កែសម្រួលដោយ លីវ សុខុន!!!
