ក្នុងបរិបទនេះ ប្រទេសកម្ពុជា ក៏ដូចជាពិភពលោកទាំងមូល បានជួបប្រទះនូវវិបត្ដិជំងឺកូវីដ-១៩ កំពុងឆ្លងកាត់គ្រោះមហន្តរាយ នៃការរាតត្បាតជាសកល នៃជំងឺកូវីដ-១៩ ប៉ុន្ដែអង្គការមួយនៅក្នុងស្រុកប្រាសាទបាគង ខេត្ដសៀមរាប នៅតែលះបង់ថវិកាជួយសង់ផ្ទះ បង្គន់ និងអណ្ដូងទឹកជាច្រើនកន្លែងជូនពលរដ្ឋក្រីក្រ នៅខេត្ដនេះ ដើម្បីជួយសម្រួលដល់ការលំបាករបស់ពួកគាត់។
លោក ងឿម សុផារ៉ា ប្រធានគម្រោងផ្ទះមនុស្សធម៌ នៃអង្គការអប់រំជីវិត និងសុភមង្គល មានអាស័យដ្ឋានៅភូមិស្ពានក្អែក ស្រុកប្រាសាទបាគង បានឱ្យដឹងនៅថ្ងៃទី០៤ ខែកក្កដា ឆ្នាំ២០២១នេះ ដោយមើលឃើញពីការលំបាក និងជីវភាពខ្វះខាតរបស់ប្រជាពលរដ្ឋមួយចំនួននៅស្រុកប្រាសាទបាគង និងស្រុកបន្ទាយស្រី លោកបានបង្កើតមូលនិធិគម្រោងផ្ទះមនុស្សធម៌នេះ គោលបំណង ដើម្បីជួយដល់ប្រជាពលរដ្ឋខ្វះខាតជីវភាពនៅទីនោះអោយមានលំនៅឋាន បង្គន់ និងអណ្ដូងប្រើប្រាស់ដូចប្រជាពលរដ្ឋទូទៅផងដែរ។ លោកបានបន្ដថា មូលនិធិផ្ទះមនុស្សធម៌នេះ គឺធ្វើឡើងចាប់ពីឆ្នាំ២០១៧ មកម្ល៉េះ ដោយបានថវិកាពីសប្បុរសជនស្ម័គ្រចិត្ដនៅក្រៅប្រទេសទេស គឺសហរដ្ឋអាមេរិក។ លោកបញ្ជាក់ថា ផ្ទះដែលសង់ជូនពលរដ្ឋមួយខ្នងៗ ក្នុងតម្លៃជាង ១,៥០០ដុល្លារ ហើយគ្រួសារខ្លះផ្ដល់ជាបង្គន់ និងអណ្ដូងទឹកទៀតផង។
លោកបន្ដថា ចាប់ពីឆ្នាំ២០១៧មក លោក សង់ផ្ទះជូនពលរដ្ឋក្រីក្របានជាង ១០០ខ្នងផ្ទះ ដោយធ្វើពីឈើប្រក់ និងបាំងសង្ក័សី មានទំហំ ៤ម៉ែត្រ × ៦ម៉ែត្រ បើគិតថវិកាអស់ជាង ១០ម៉ឺដុល្លារ។ ហើយអណ្ដូងទឹកចំនួន ២០អណ្ដូង, បង្គន់ចំនួន ៦៥កន្លែង ដែលមានតម្លៃសរុបជាង ៤ម៉ឺនដុល្លារ។ លោកបានបន្ថែមថា ក្នុងរយ:ពេល ២ឆ្នាំចុងក្រោយ ដែលមានបញ្ហាជំងឺកូវីដ-១៩នេះ លោកនៅតែមានមូលនិធិផ្ទះមនុស្សធម៌នេះ ជូនប្រជាពលរដ្ឋខ្វះខាតដដែល ហើយលោកមានការសប្បាយចិត្ដនៅពេលដែលបានធ្វើផ្ទះមនុស្សធម៌ជូនប្រជាពលរដ្ឋនៅជនបទនេះហើយជួបការលំបាកនេះ ជាពិសេសមានការសហការល្អជាមួយអាជ្ញាធរមូលដ្ឋាន គ្រប់លំដាប់ថ្នាក់ ធ្វើឱ្យសម្រេចបានការងារនេះ។
ព័ត៌មានជាតិ ថ្មីៗ
លោក សូរ ប្លាតុង អភិបាលស្រុកប្រាសាទបាគង លោកមានប្រសាសន៍ថា ផ្ទះមនុស្សធម៌ ដែលបានសាងសង់ឡើងថ្មីៗនេះ ដោយមានការចូលរួមជួយសាងសង់ ពីកម្លាំងនគរបាល នៃអធិការដ្ឋាននគរបាលស្រុកប្រាសាទបាគង ប្រជាការពារ និងអាជ្ញាធម៌មូលដ្ឋានផងដែរ។ លោកបានបន្ដថា ការផ្ដល់ផ្ទះសប្បុរសធម៌នេះ ជាវប្បមធម៌ចែករំលែកដ៏មានប្រសិទ្ធភាព ក្នុងគ្រាលំបាកខ្វះខាតរបស់ប្រជាពលរដ្ឋ ហើយអាជ្ញាធរគាំទ្រជានិច្ចចំពោះផ្ទះមនុស្សធម៌ននេះ។ ជាពិសេស ជួយផ្ដល់ក្ដីសុខ និងការខ្វះខាតក្នុងអំឡុងពេលពលរដ្ឋជួបវិបត្ដិកូវីដ-១៩។ ជាមួយគ្នានេះ អាជ្ញាធរស្រុកមក៏បានជួយផ្ដល់ជាអំណោយជាគ្រឿងឧបភោគបរិភោគ ព្រមទាំងថិកាខ្លះៗ ដល់គ្រួសារពលរដ្ឋជិត ២០គ្រួសារផងដែរ៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
