រដ្ឋបាលខេត្ដសៀមរាប នៅថ្ងៃទី០៦ ខែកក្កដានេះ បានសម្រេចពីការបន្តការបិទការលក់ដូរ នៅផ្សារលើធំថ្មី ចំនួន២សប្ដាហ៍បន្ថែមទៀត គិតចាប់ពីថ្ងៃទី០៧ ខែកក្កដា ដល់ថ្ងៃទី២០ ខែកក្កដា ឆ្នាំ២០២១នេះ ដើម្បីទប់ស្កាត់ការឆ្លងជំងឺកូវីដ-១៩ ដល់ទីតាំងផ្សេងទៀត បន្ទាប់ក្រុមគ្រូពេទ្យបានរកឃើញអ្នកមានវិជ្ជមានកូវីដ១៩ជាច្រើននាក់នៅក្នុងផ្សារនោះ ។
ក្នុងសេចក្ដីសម្រេចបានបញ្ជាក់ថា ការបិទនេះដែរ គឺក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ-១៩ នៅក្នុងភូមិសាស្ត្រ ទីតាំងដែលត្រូវបិទ និងទប់ស្កាត់ជំងឺនេះមិនឱ្យឆ្លងរាលដាលទៅតំបន់ផ្សេងទៀត បន្ទាប់ពីផ្សារលើធំថ្មី កំពុងរីករាលដាលនូវជំងឺកូវីដ-១៩ ជាបន្ដបន្ទាប់គួរអោយព្រួយបារម្ភ។ ជាក់ស្ដែងចាប់ពីថ្ងៃទី០១ ដល់ថ្ងៃទី០៥ ខែកក្កដានេះ ខេត្ដសៀមរាប ត្រូវបានរកឃើញអ្នកវិជ្ជមានកូវីដ-១៩:មានអត្រាខ្ពស់រហូតជាង ១០០នាក់ក្នុងមួយថ្ងៃ។
រដ្ឋបាលខេត្តសៀមរាប ប្រកាសដំណឹងដល់ប្រជាពលរដ្ឋ ដែលមានការពាក់ព័ន្ធដោយផ្ទាល់ ឬដោយប្រយោល ជាមួយអ្នកវិជ្ជមានកូវីដ-១៩ ទោះនៅតំបន់ណា សូមផ្ដល់សំណាកធ្វើតេស្ដរកមេរោគកូវីដ-១៩ និងរួសរាន់ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួនឱ្យបានគ្រប់១៤ថ្ងៃ ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត។ ក្នុងករណីមិនអនុវត្តកាតព្វកិច្ចចត្តាឡីស័ក រដ្ឋបាលខេត្តនឹងចាត់វិធានការផ្លូវច្បាប់ចំពោះបុគ្គលទាំងឡាយណាដែលលើ្មសនឹងវិធានសុខាភិបាលនេះ។ ប្រសិនបើមានការប្រែប្រួលសុខភាព ប្រជាពលរដ្ឋផ្តល់ព័ត៌មានទៅកាន់លេខទូរស័ព្ទ០១២ ៩៥៥ ៤៧៤/០៧៧ ៧៨៩ ០០៧ ដើម្បីក្រុមការងារចាត់វិធានការក្នុងការយកសំណាកធ្វើតេស្តស្រាវជ្រាវ។
បើតាមឯកឧត្តមវេជ្ជបណ្ឌិត ក្រុស សារ៉ាត់ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្ដសៀមរាប បានឲ្យដឹងថា ក្នុងខេត្តសៀមរាប មានទីតាំងយកសំណាកនៅកន្លែងច្បាស់លាស់មានចំនួន០៨ទីតាំង ក្នុងនោះ រួមមាន: មណ្ឌលសុខភាពកំពង់ក្ដី ក្នុងស្រុកជីក្រែង, វិទ្យាល័យដំដែក ស្រុកសូទ្រនិគម, សាលាគរុកោសល្យ និងវិក្រិតិការខេត្ដ, វិទ្យាល័យអង្គរ ក្រុងសៀមរាប, អនុវិទ្យាល័យដូនទ្រ ស្រុកពួក, សាលាបឋមសិក្សា ទៀ បាញ់ ដូនស្វា ស្រុកអង្គរជុំ, វិទ្យាល័យស្រែណូយ ស្រុកវ៉ារិន និងមន្ទីរពេទ្យបង្អែកស្រុកក្រឡាញ់។
សូមជម្រាបថា គិតត្រឹមល្ងាចថ្ងៃទី០៥ ខែកក្កដានេះ ខេត្តសៀមរាប មានអ្នកឆ្លងជំងឺកូវីដ-១៩ សរុបចំនួន១,៦៥៤នាក់, បានព្យាបាលជាសះស្បើយចំនួន ៦០៥នាក់, ស្លាប់ ១៨នាក់ និង១០៣១នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប, មណ្ឌលចត្តាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែក ស្រុកសូទ្រនិគម៕
អត្ថបទ: លោក ឈិត សាវី
កែសម្រួល: លោក អ៊ុន ណារាជ្យ
