សមត្ថកិច្ចនគរបាលនៃស្នងការដ្ឋាននគរបាលខេត្ដសៀមរាប បានធ្វើការស្រាវជ្រាវ និងស៊ើបអង្កេតរហូតឈានដល់ធ្វើការឃាត់ខ្លួនជនសង្ស័យម្នាក់ ពាក់ព័ន្ធករណីឃាតកម្ម កាលពីវេលាម៉ោង ១០យប់ថ្ងៃទី០៥ ខែកក្កដា ឆ្នាំ២០២១ ត្រង់ចំណុចភូមិព្រីង ឃុំជីក្រែង ស្រុកជីក្រែង ខេត្តសៀមរាប។
ជនសង្ស័យមាន ឈ្មោះ ជិន វណ្ណា ភេទប្រុស អាយុ ១៨ឆ្នាំ មុខរបរ ធ្វើស្រែ រស់នៅភូមិព្រីង ឃុំជីក្រែង ស្រុកជីក្រែង ខេត្តសៀមរាប។ សមត្ថកិច្ចនគរបាល បានឃាត់ខ្លួននៅថ្ងៃទី០៦ ខែកក្កដា ឆ្នាំ២០២១ ស្ថិតនៅទីតាំងខាងលើ។ ការឃាត់ខ្លួននេះ ក្រោមបទបញ្ជាពីលោក ឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្ត, លោកឧត្តម សេនីយ៍ត្រី ភឹង ចិន្តារ៉េត ស្នងការរងទទួលផែន ព្រហ្មទណ្ឌ និងលោកវរ:សេនីយ៍ឯក ណុប សារ៉ាក់ ស្នងការរង ទទួលជំនួយការដឹកនាំការិយាល័យនគរបាលព្រហ្មទណ្ឌកម្រិតធ្ងន់ និងមន្ត្រីនគរបាលពាក់ព័ន្ធជាច្រើនរូបទៀត បានដឹកនាំកម្លាំងដោយផ្ទាល់ សហការណ៍ជាមួយលោក វរសេនីយ៍ទោ តាំង លីហេង អធិការនគរបាលស្រុកជីក្រែង។
បើតាមការអោយដឹងពីសមត្ថកិច្ចថា នៅថ្ងៃទី០៥ ខែកក្កដា ឆ្នាំ២០២១ វេលាម៉ោង ២២និង០៥នាទី មានករណីឃាតកម្ម ត្រង់ចំណុចភូមិព្រីង ឃុំជីក្រែង ស្រុកជីក្រែង ខេត្តសៀមរាប បង្ករឡើងដោយជនសង្ស័យ ឈ្មោះ ជិន វណ្ណា ភេទប្រុស អាយុ ១៨ឆ្នាំ បានផឹកស៊ី ជាមួយជនរងគ្រោះ ០២នាក់: ១.ឈ្មោះ រិន លាប ភេទ ប្រុស អាយុ ២៦ឆ្នាំ មុខរបរ ធ្វើស្រែ, ២. ឈ្មោះ រុន ដូង ភេទប្រុស អាយុ២១ឆ្នាំ មុខរបរ ធ្វើស្រែ អ្នកទាំង២ រស់នៅភូមិកើតហេតុខាងលើ ដោយពេលកំពុងផឹកស៊ីនោះ ក៏មានទំនាស់ពាក្យសម្តីនិងគ្នា ជនសង្ស័យ ឈ្មោះ ជិន វណ្ណា បានយកកាំបិតចុងស្រួចពណ៌ស ដែលហាន់សាច់ខ្លែម ចាក់មកលើជនរងគ្រោះ ឈ្មោះ រិន លាប ១កាំបិតត្រូវចង្កេះ និងចាក់ជនរងគ្រោះ ឈ្មោះ រុន ដូង ត្រូវចុងដង្ហើម ១កាំបិត។ ក្រោយពេលធ្វើសកម្មភាពហើយ ជនសង្ស័យបានរត់គេចខ្លួនបាត់ ចំណែកជនរងគ្រោះទាំង២នាក់ខាងលើ ត្រូវបានបងប្អូនដឹកយកទៅពេទ្យទាំងយប់ បានពាក់កណ្តាលផ្លូវ ជនរងគ្រោះ ឈ្មោះ រុន ដូង បានស្លាប់ នៅសល់ជនរងគ្រោះឈ្មោះ រិន លាប រងរបួសធ្ងន់ កំពុងព្យាបាល នៅមន្ទីរពេទ្យ ។
ក្រោយពេលកើតហេតុ លោកវរសេនីយ៍ទោ សុខ ម៉េងអ៊ាង បានដឹកនាំកម្លាំង សហការជាមួយកម្លាំងអធិការនគរបាលស្រុកជីក្រែង ធ្វើការស្រាវជ្រាវ និងស៊ើបអង្កេត រហូតដល់ម៉ោង១៦ និង ០០នាទី ថ្ងៃទី០៦ ខែកក្កដា ឆ្នាំ២០២១ ទើបឃាត់ ខ្លួនជនសង្ស័យឈ្មោះ ជិន វណ្ណា ដែលកំពុងលាក់ខ្លួនក្នុងព្រៃបានតែម្តង។ ក្រោយធ្វើការឃាត់ខ្លួន ជនសង្ស័យ ឈ្មោះ ជិន វណ្ណា បានឆ្លើយសារភាពថា ខ្លួនពិតជាបានធ្វើសកម្មភាពករណី ខាងលើនេះពិតប្រាកដមែន ។ បច្ចុប្បន្ននេះជនសង្ស័យកំពុងត្រូវបានកម្លាំងជំនាញ រៀបចំសំណុំរឿងបញ្ជូនទៅតុលាការ ដើម្បីចាត់ការទៅតាមផ្លូវច្បាប់៕
អត្ថបទ និងរូបភាព៖ លោកបូ សាវី
កែសម្រួល៖ លោក លីវ សុខុន
