នៅព្រឹកថ្ងៃទី០៩ ខែកក្កដា ឆ្នាំ២០២១នេះ ខណ្ឌរដ្ឋបាលព្រៃឈើសៀមរាប បានរៀបចំដាំកូនឈើទាលចំនួន៦២៥ដើម នៅលើផ្ទៃដីទំហំ១ហិកតា ស្ថិតក្នុងភូមិត្រពាំងថ្ម ឃុំឃុនរាម ស្រុកបន្ទាយស្រី ដើម្បីអបអរសាទពិធីបុណ្យរុក្ខទិវា៩កក្កដា២០២១ ក្នុងគោលបំណង បំផុសចលនាដាំដើមឈើឡើងវិញ និងឱ្យប្រជាពលរដ្ឋចូលរួមថែរក្សាសម្បត្ដិព្រៃឈើ ជាពិសេស ដើម្បីបណ្តុះគំនិត ថែរក្សា ការពារ និងគំនិតស្រឡាញ់ព្រៃឈើ និងបរិស្ថានធម្មជាតិរបស់ប្រទេស ។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានឱ្យដឹងថា នៅក្នុងឆ្នាំ២០២០ និងឆ្នាំ២០២១នេះ ខណ្ឌរដ្ឋបាលព្រៃឈើ បានរៀបចំដាំកូនឈើប្រណិតៗចំនួន៨ប្រភេទឡើងវិញ ដើម្បីស្តារគម្របព្រៃ និងបម្រើឱ្យវិស័យទេសចរណ៍លំហែរកម្សាន្តផងដែរ ខណៈទីតាំងដាំកូនឈើនេះនារយៈពេលកន្លងមក បានរងនូវការគម្រាមកំហែងជារៀងរាល់ឆ្នាំ បង្កឡើងដោយជនខិលខូចលួចដុត ដើម្បីទន្រ្ទានយកដីព្រៃរបស់រដ្ឋធ្វើកម្មសិទ្ធិ ដែលជាក់ស្តែងក្នុងឆ្នាំ២០១៩ តំបន់នេះត្រូវបានភ្លើងឆេះទាំងស្រុង។
ក្នុងឱកាសនេះដែរ លោក ទា គឹមសុទ្ធ បានធ្វើការអំពាវនាវដល់ប្រជាពលរដ្ឋ ឈប់កាប់បំផ្លាញព្រៃឈើ ហើយត្រូវចូលរួមស្រឡាញ់ថែរក្សា ការពារព្រៃឈើ និងចូលរួមដាំដុះ កូនឈើ ថែរក្សាការពារបរិស្ថានធម្មជាតិ ឱ្យបានគង់វង្សនៅគ្រប់ទីកន្លែង ដើម្បីជាប្រយោជន៍ ដល់ការរស់នៅរបស់ខ្លូនយើងផង សហគមន៍យើង ជីវិតសត្វព្រៃគ្រប់ប្រភេទ ប្រព័ន្ធជីវៈចម្រុះជាច្រើន ដែលជាសម្បត្តិ របស់មនុស្សជាតិនៅគ្រប់ជំនាន់ និងការបម្រើឱ្យវិស័យទេសចណ៍ ។
សូមបញ្ជាក់ថា បុណ្យរុក្ខទិវា គឺជាទិវាដ៏មហានក្ខត្តឬក្សដែលក្រសួងកសិកម្ម រុក្ខាប្រមាញ់ និងនេសាទ មានរដ្ឋបាលព្រៃឈើជាសេនាធិការ តែងតែសហការយ៉ាងល្អប្រសើរជាមួយក្រសួង-ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិតែងតែប្រារ្ធឡើងជារៀងរាល់ឆ្នាំ ក្រោមព្រះរាជវត្តមានដ៏ថ្លៃថ្លារបស់ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ប៉ុន្តែដោយសារហានិភ័យបណ្តាលមកពីជំងឺឆ្លងកូវីដ-១៩ ដែលបាននឹងកំពុងរាតត្បាតជាសកល និង នៅក្នុងព្រះរាជាណាចក្រកម្ពុជា រាជរដ្ឋាភិបាលបានសម្រេចផ្អាកការរៀបចំ “រុក្ខទិវា”នេះ ចាប់ពីឆ្នាំ២០២០មកទល់ពេលនេះ ក្នុងគោលបំណងទប់ស្កាត់ការរាតត្បាតជំងឺឆ្លងជាសកលនៅក្នុងសហគមន៍៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
